مشكلتي مشكلة والله

السلام عليكم ورحمة الله وبركاته ،،،

في البداية أحب إني أوضح قصتي بالمختصر المفيد إن شاء الله تعالى .
أنا متزوجة من حوالي سنة وعشرة أشهر ، وسافر زوجي بعد 8 أشهر من الزواج في رحلة عمل ورجع بعد تسعة أشهر تقريبا .
أخت زوجي ما أعرف شو صار لها ؟ بدت تتكلم عني واتقول كلام مب زين في حقي وتتهمني بأشياء باطلة من إن لي علاقات مع رجال وإني أتكلم في الموبايل فترة طويلة ( مع إني دايما أكلم زوجي أكثر من عشرة مرات في اليوم الواحد بحكم إنا تونا عرسان جدد ) واتقول أشياء فظيعة مع إنها إتصلي واتصوم ودايما إتروح العمرة ، بس هي دايما تختلق المشاكل للجميع وحاولت أكثر من مرة إنها إتطلق أقرب الناس لها وهم خواتها ، يعني الكل يعرف بهذا الشي وأنا دايما أسمعها لما تجي بيت عمي ( أبو زوجي ) وتقعد تتكلم عني كلام مب زين ، لكني والله العظيم ما أرد عليها وأقول إذا لي حق الله سبحانه وتعالى راح يرجعه لي ودايما أقول حسبي الله ونعم الوكيل .
المهم كلما حاولت أشتكي لأهل زوجي كانوا يقولون بأنها دايما تعمل هالأشياء ومحد يصدقها .
أنا ما حبيت إني أضايق زوجي وهو في السفر ، والمشكلة إنها كانت تتصل في زوجي وهو في الخارج واتطلع علي كلام مب حلو ، وكان زوجي يسكت وما يرد عليها .
المهم لما رجع من السفر راح لها البيت واتفاهم معاها وأنا شخصيا رحت واتصالحت معاها مع إنها هي إللي كانت تتكلم عني ، لكني قلت أقصر الشر .
لكني لاحظت في الفترة الأخيرة إن زوجي لما يكون في البيت أكرهه وما أحبه وحتى ما أحب إنه يلمسني أو يقول لي كلام حلو ، والعكس لما يكون خارج البيت أشتاق له وأتوله عليه ، لكن يوم يرجع أفتعل المشاكل معاه ، وكم مرة قلت له يطلقني بس الحمدلله زوجي عاقل وكان يتفهم الموضوع .
ما أدري هل أنا معمول لي عمل ؟ ولا هذا شي طبيعي ؟
لأني لاحظت إني دايما أشتاق لزوجي يوم يكون برع البيت ، لكن يوم يرجع أكرهه وأختلق مليون مشكلة .
الله يخليكم ردوا علي وأفيدوني .
وآسفة على الإطالة .