مشكلتي مشكله ..أبغى منكم بس الدعاء

السلام عليكم ورحمة الله وبركاته
اخواتي يسرني ان انضم اليكم في هذا المنتدى الرائع الذي أشعر وأنا اتصفحه أننا كالأسرة الواحده
( مثل المؤمنين في توادهم وتراحمهم كمثل الجسد إذا اشتكى منه عضو تداعى له سائر الجسد بالحمى والسهر ) :39:

انا اليووم قررت افضفض وأقول اللي بقلبي اللي له سنين أحس أني مخنوقه وما أقدر أتكلم لأنه مو من طبعي أشتكي لأحد :icon33:

بنااااات أنا تزوجت صغيره والحمد لله ربي عطاني زوج ما أحد يحلم فيه دللني وطار فيني وكان بس يناظر الله ثم يناظرني وهذا من فضل الله علي له الشكر وحده

أيضا كان هالدلع سبب كبير لمشاكلي اللي بقول لكم عليها الحين

قبل اي شيء أنا ما عندي اخوات بس عندي اخوين اولاد وامي يا لبى قلبها ما أحب اقول لها شيء حتى ما أضيق صدرها وما اثق في الناااااااس أبد علشان كذا ما اقول اسراري ومشاكل بيتي لأحد

نرجع للدلع اللي دلعنيه زوجي كنت ساكنه مع أهل زوجي بس لي مطبخ مستقل ومطبخي فوق مطبخ أهل زوجي

تزوجت أخت زوجي قبلي بكم شهر وهنا المشكله تعرفون الرجال قبل الزواج يكون مع اخواته دايم وفاضي ماعنده شيء وبعد الزواج ينشغل عنهم واخت زوجي هذي كانت تموووووووت فيه مو حب عادي( عشق ) المهم من تزوجنا وهي بس تقارن حياتها بحياتي اخوي يسوي كذا وزوجي ما يسوي واخوي حنون وزوجي لا واخوي مدلع زوجته وزوجي لا وعلى هالحال لنا متزوجين 6 سنوات وهي تقارن نفسها فيني على أنها ومو مدح لنفسي تظلمني بهالمقارنه أنا أجمل منها و أذرب في الحكي وربة بيت ممتازه جدا بشهادة الجميع المهم مو هذي المشكله أنا كنت مطنشه هالكلام كله وكانت أحيانا تغلط علي بالمجلس وقدام زوجي واطنشها وما كانها موجوده مع اني كنت صغيره وهي اكبر مني ب5 سنوات وزوجي كان ينقهر من تصرفاتها وكذبها علي عند امها وتؤلف قصص لين كرهت اهلها كلهم فيني وأنا مطنشه واقول دامني مبسوطه وزوجي مدللني بكيفهم وش لي فيهم مع اني كنت أًقابل بالحقران وحمواتي كلهم بالترحيب والتهلي من بعيد مع أني ما قصرت بحقهم مو لسواد عيونهم يشهد الله إني اتقرب لله ثم لرضا زوجي واعينه على بر أمه لعلي أشوف هالبر بعيالي

وكنت دايم اشوف كوابيس مرعبه ثعابين وعقارب تقرصني وتقرص زوجي وكانت تجيني ضيقه وما طبت منها الا بعد ما رحت لاحد المشايخ وقرا علي شهر كاامل والحمد لله صرت احصن نفسي بالاذكار وخفيت كثير

ومرت السنين اخت زوجي على ماهي عليه من كرهها لي من دون سبب و زوجي صار ماعاد يطيق يشوفها وما أحد يلومه كانت تطلع على اخوها كلام فاحش ما ينقال مثل أنه كان يتحرش فيها قبل لا يتزوج وما يقاوم جمالها وأنا مطنشه لاني كنت أعرف غرضها من هالكلام وأثق بزوجي جدا لأنه انسان يخاف الله

وتمر السنوات واخت زوجي تحمل مرتين وجابت ولد وبنت وانا وزوجي ما ربي عطانا ورضينا بقسمة ربي وطبعا ما يحتاج اقول لكم نظرات الشماته والتشفي اللي اشوفها في عيونها ولسانها اللي ما سلمت منه ومحاولات تزويج زوجي من قبل امه واخواته :icon33:

وبعد هالسنين يسر الله لنا شيخ عن طريق أحد الاصدقاء يقرأ علي أنا وزوجي وهنا كانت الصدمه زوجي فيه مس بسبب العيييييييين ونطق اللي فيه واحمد ربي اني ما كنت معاه والا كان مت من الخوف وقال انه حسد من اخت زوجي وانه يقتل الحيوانات المنويه حتى يفرق بيني وبين زوجي :icon33:

طبعا اكيد تعرفون ردة فعله جاني وجلس يبكي يبكي يبكي لين حسيت ان روحه بتطلع سبب عقمه اخته بصراحه فاااااااااجعه

حاولت اخذ من اثرها وغسلت زوجي فيه واغمي عليه وبعدين صحى وجلس يصارخ علي ويسبني بكلام ما عمري سمعته ابد بس سكت لاني كنت فاهمه الوضع وانه مو منه من هاللي فيه

ورجع للشيخ وقرا عليه وللاسف ما شفي لانه حسدها قوي ولازم تطيب نفسها من زوجي وتكرهه لانها عاااااااشقته ووالله الذي لا اله الا هو ان زوجها مو مقصر عليها بشيء بس ما عطاها ربي حبه وما تشوف افعاله الزينه من كثر ماهي مركزه علي انا وزوجي وانا وزوجي من حسينا انها تغار كانت علاقتنا مع بعض قدامهم كلهم رسميه وما اكلمه او يكلمني الا للضروره القصوى حتى ما يظهر من كلامنا مع بعض اي نظرات حب او شوق :35:

حتى اني مره خليت زوجي يصارخ علي ويسبني عندهم كلهم ويقول عند امه انه يفكر انه يطلقني علشان تطفى عينها بس لا حياة لمن تنادي وهي ما تبغى تصدق الا افكارها

المهم ام زوجي لما قال لها كلام الشيخ له تعاطفت معه فتره وكانت تقول انا متاكده انها
معطيتكم عين وانها مسكينه تغار المفروض ترحمها !!!!!!! بعدين الله لا يوريكم جته مرررره وانفجرت عليه وقالت انها هي اللي مخليتك تقول كذا وانت خبل وتصدق سالفتها وهي العله منها وتبغى تفرق بينك وبين اختك وكلام فيني كله كذب واخترعت علي مواقف وقالتها لزوجي وزوجي ساكت حتى مادافع عني يقول ما يجوز ارفع ضغط امي وانا واثق انك ما سويتي شيء حسبي الله عليهم ونعم الوكيل :icon33: شفتوا الظلم يا بنااااااات

المهم زوجي من بعدها قرر انه يحرمهم من شوفتي وانا مرتااااااااحه لهالقرار ومتاكده انها بيموتون يعرفون وش اسوي ووين اروح واجي لان زوجي ماعاد يذكر اسمي عند امه ولا كانه متزوج كل يوم ينزل يتقهوى معها ويسولف وياها بمواضيع عااااااامه ما يسالها عن شيء ولا يعلمها باخبار بيته مثل اول واخته اذا سمع صوتها ماعاد ينزل لين تروح ومره نزل وشافته وانحاشت خخخخخخخخخخ

المهم يا بناااااااات وش رايكم وش اسوي ابغى حل مع اخته وعيونها اللي دمرت علي فرحتي
هل تنصحوني انزل لامه اسلم عليها لاني سمعت ان الرجال مالهم خاتمه يمكن يجي يوم ويقول انك ما كنتي تنزلين تسلمين على امي مع انه هو اللي قايل لي خلااااااااص لا تفكرين تنزلين امي ما تحبك وما تطيق تشوفك

افكر اقول لزوجي ننتقل لبيت برا علشان ارتاح منهم كلهم لانه يراقبون زوجي الساعه كم يدخل والساعه كم يطلع وزوجي بيتوتي جدا والمطبخ هذا ناشر غسيلنا اي صوت يسمعونه والله احس احيانا اني مخنوقه بس مادية زوجي صعبه شوي ويمكن يزعل لما اطلب منه نطلع من عند اهله لان امه بتمووووووت لو طلعنا بتحس اني اخذته منها

بناااااات تكفون اللي عندها حل تقول لي واللي ماعندها تدعي لي والله اني في امس الحااااااجة للدعاء

وانا هالايام جالسه اقرا البقره كل يوم انفث علي وعلى زوجي المسكين ونجحت اني اطلع زوجي من جو الكابه اللي كان فيها وقدرت ارجع له ضحكته وما اذكر اهله عنده خير شر ولا طاري الانجاب لانه مو بيده ولا بيدي وبيد رب العالمين وحده اللي خلاه يحبني زوووووود بس انا اذا طلع اجلس ابكي ليمن انااااام حتى هو لاحظ علي يقول نومك كثران هالايام لا تكونين تعبانه وانا اقول لا بس اهرب من شغل البيت بالنوووم ويصدق ههههههههههههه

يارب انك تعلم اني احب زوجي ويحبني يارب اصلح لنا شاننا كله ولا تكلنا الى انفسنا طرفة عين
واكفنا شر شياطين الانس وشياطين الجن واشغلهم في انفسهم عنا
يارب تتوج حبنا هذا بملاك صغير يملأ بيتنا سعادة وسرور وتشبع غريزة خلقتها فيني انك على كل شيء قدير وارزق كل محروووم ومحرومة يارب العاااااااالمين:39:

واخواتي هل فيه احد منكم مر بتجربتي او تجربه شبيهه فيها تجي تقول لي كيف حلتها الله يجزاها الجنه
ويفرح قلبها اللي بتدعي لي او بتعطيني حل سواء كان صح او غلط بس يكفيني منها انها عبرتني وردت علي باول مشاركه واول فضفضه في تاريخ حياتي كلها :)