مشكلتي مع أخواتي العلل !!! كيف أتصرف معهم ؟

يا بنات والله أحاول ما أكون سلبيه بحياتي وأغصب نفسي أحتاط بالحياة الإيجابية لكن ما قدرت مع هالعائلة !!! طفشوني وتعبوني الله يسامحهم ..


مشلكتي إن عندي أختين ما أقدر أقول عنهم آوادم من كثر شرّهم وحقدهم، وحده كبيرة عايشه حياتها بالطول والعرض وأكثر وحده أخذت حنان من أمي وأبوي، للحين ما فيه شيء.. لكن عليها حركات لو أقول لكم عنها تنصدمون من صغر عقلها !!! هذا غير إني أشوفها تكلم عيال وقلة حيا تصير بالجوال (من كثر الثقة اللي محسسه أمي فيها) وأمي عادي على نياتها 😁 وأتوقع إنها بيجي يوم وتتجرأ وتقول إنها تسوي هالشيء 😅، المهم حركاتها علي شرّ بشرّ تفتن علي عند أمي بأي شيء أسويه، لما أبوي يحول مصروف بصرافتها تاخذ حقي وما تعطيني ولا تقول لي لين أعرف من أبوي بعدين، إذا طلعت مكان مع أهلي وصورت بالسناب ولاّ نزلت اني انبسطت تقعد ثلاثه أيام زعلانة إني طلعت ورحت عشانها ما جت لأي سبب، حقودة بالفلوس بكل شيء، مره رحنا مطعم وكنا قدام عماتي وقالوا يلا قطة وانا طلعت قطتي وما أخذتها وهي حلفت انو ما تاخذ من أحد شيء، وهي حاسبت وخلصنا، جيت بكلم أختي الصغيرة من جمبها تحت الطاولة قالت جيبي الفلوس اللي طلعتيها قدامهم!! تخيلوا تحت الطاولة ما أمدانا حتى نطلع من المطعم!!! تسوي يعنني قدامهم إنها هي اللي دفعت!


والأخت الثانية الأخس منها اللي تحتها دايم برا العايلة وتطلع نفسها من المشاكل! تخدم الناس وتشيلهم بعيونها وأهلها تزبلهم!! لدرجة عادي تدفع نص ما تملك للغريبين وأخواتها لا !! اغتربت بدراستها بالجامعة والحين وظيفتها برضو بغربه عند أخوالي في مدينة ثانية ! لما نجي عندها تتنكد ما تفرح، نست إن عندها عائله ما تفرح لما تشوفنا، ما تكلم ولا تسأل عني وتجي وقت المصالح، ودايم هي والكبيرة يتحدون علي القذرات !! حتى مره كنت متضايقة وشكيت لها عن أختي وانا على حق قامت طالعت فيني كذا وطنشت ولا كأني قلت شيء !! وانا قلبي محروق من السالفة ما واستني ولا شيء !! ولا حتى قالت طنشي !! أكرهها حقودة شيطانة عدّوة


يا بنات وربي اني اكتب وقلبي محروق من جوا وابكي ابكي منهم الله لا يسامحهم هم وتصرفاتهم هذي شيطانة ما هي أخت هذي عدوة حسبي الله عليها وعلى كل لحظة حرقت دمي فيها، يا جماعة أنا ماني عارفه انتوا يالاخوات تعيشون كذ ؟؟ ولا أنا اوڤر وأحسه شيء مو معقول !!
اللي قلته وربي شعره من تصرفاتهم القبيحة ما خفي أعظم..
للعلم أمي دايم تحطم فيني وتسبني قدامهم وتهينني وأنا أكثر وحده أقعد معها وأطيعها، تفرّق بيننا كثير كثير، تحب وتغلي أختي الكبيرة وأنا تكرهنني وتجرحني دايم بكل جلسة.. الوضع العائلي مزعزع في البيت ومفكك، حسبي الله ونعم الوكيل !
صرت بس أنشغل بدراستي الجامعية وأتفوق فيها عشان ألهي نفسي من هالنكد اللي عايشته!! عانيت كثير كثير، الدنيا أشقتني وأنا باقي بهالعمر الصغير.. أبي تعطوني حل كيف أتصرف مع الثنتين ذولا ؟ كيف أخليهم أخوات طبيعيات ؟ كيف نحنّ على بعض ؟ كيف نصير مثل الناس ؟ ادري السبب أمي في إنها تفرق لكن أحاول أدور حلول