مشكلتي مع اختي !!

:26: السلام عليكم:26:
شلووونكم عساكم بخير؟؟:) عيدكم مبااااارك وكل عام وانتو بخير وصحه وعافيه ياارب
ما أطول عليكم الموضوع
مشكلتي ممكن تكون بسيطه وانا مكبرتها أو كبيره وانا مصغرتها (شلون يعني؟) انا اقولكم. مشكلتي مع وحده من خواتي اللي تكبرني بسنتين، كانت من اقرب الناس لي وكنت 24 ساعه سوالف معاها وضحك ووناسه، بس اختي تحب انها تكون محور حديث اي جلسه تكون فيها، اهيا شخصيتها قويه ولها تأثير قوي مع الناس، تحب يكون كل اللي حواليها كومبارس (مجرد تكمله لها) لكن محد ياخذ الدور الرئيسي منها، وانا مع السنين بديت استقل بشخصيتي وكونت لي شخصيه محبوبه واجتماعيه (مثل ما قالوا لي ترى مو قاعده امدح نفسي:42: ) من بعد ما كانت شخصيتي تابعه لها وفيها تقليد اعمى (يمكن هالشي ظايقها) وفي هالوقت لاحظت ان نظراتها لي غريبه لما اكون قاعده اسوولف بموضوع ولافته انظار اللي حواليني، او لما اكشخ حق طلعه تقعد تطالعني من فوووق لين تحت (بحسد)، وبدت شوي شوي تحاول تطيّح من شخصيتي جدام خواتي واهلي وبدت تمنعني من استلاف ملابسها واغراظها (مع ان الوضع كان عاااادي وكنا دايما كل وحده تتسلف من الثانيه ) لييين يانا اليوم اللي تهاوشنا فيه (ماذكر السبب صراحه لكن اذكر انه كان سخيف) وكانت هوشه مو كبيره حيل، ورحت لها الغرفه بعد الهوشه بنص ساعه اعتذر لها (كان عمري وقتها 17 سنه واهي 19 سنه) لكنها كابرت ورفعت خشمها علي، ومرت 4 سنيين لحد الحين على الهوشه والزعل، وبهذي السنين اختي بدت تشيّش خواتي علي، بدت تطيح من شخصيتي اكثر واكثر جدامهم (بحكم انها قريبه منهم اكثر مني) ، تخيلوا اني مره سمعتها باذني اول ما طلعت من الصاله بدت تحش فيني مع خواتي :surprised فعلا تظايقت وقتها (تخيلوا اقرب الناس اللي ما عمرج اذيتيهم ولا فكرتي تاذينهم يطعنونج بظهرج) ، تدرون شنو سويت لما سمعتهم يحشون؟؟ رجعت دخلت الصاله وقعدت على القنفه جابلتهم، وتتوقعون شنو سووا؟؟انصدموا؟؟لااا غيروا السالفه وكملوا سوالفهم عاااااااااااااادي ولا كأن في شي صار، يعني لو ما كنت سمعتهم قبل ما ادخل الصاله جان ما عرفت انهم حشوا فيني بالاساس، عالعموم هذا موقف من مواقف كثيره تعور تعرضت لها في البيت (اللي حسسني ان ما عاد ينقال له بيت)
من فتره حاولت اني ارجع العلاقه وارد المياه لمجاريها على قولتهم، لاحظت تطور لا باس فيه، لكن نظره الحقد موجوووده، والغرور والتكبر والكره القديم ايضا موجووود احس فيه بالجو بينا، انا ادري ان حراااام اللي قاعد يصير وانا فعلا ودي ترجع علاقتنا مثل اول، لكن اختي وايد تغيرت وصرت ما اعرف اسايرها ، اول يمكن اهي مو معطتني مجال ، مادري صراحه
انا ناااطره اقتراحاتكم لحل المشكله
وحبيت اني اعرض عليكم بعض الحلول اللي سويتها لكن ما غيرت لي الوضع (عشان لحد يكرر ابي حلول يديده)
-جربت الدعوه لها بالهدايه وبان الله يصفي قلبها لي، وان شاء الله تنفع ( ولازالت الدعوه مستمره)
-جربت اني اروح لها غرفتها واقعد ادردش معاها وما نفع
-جربت اني اعزمها على سينما او مطعم او سوق وما نفع
-جربت اني اييب لها هديه تعبر عن رغبتي في الصلح وما نفع
-جربت اني اقول حق امي واشووف رايها وشنو تقدر تسوي لكن النتيجه كانت فااااااااااشله جدا جدا (زادت الطين بلّه)
-جربت اني اذا قعدت معاها بالصاله ومع خواتي اني اخليها تكون اهي محور السوالف واني احاول اكون كومبارس بالسوالف ونفع شويه (شويه اوكي؟؟)
(ملاحظه: ترى اختي قلبها مو اسود لهالدرجه اهيا يمكن متكبره شوي بس اكييد قلبها طيب، ولما اييب لها هديه او اسوي لها معروف تقول لي مشكوره يعني مو ناكره للجميل )
واسفه على الاطاله بس فعلا شي يحز بالخاطر وانا من كثر ما اعز هالمنتدى باعتمد على الله ثم عليكم في حل هالمشكله العويصه:)