مشكلتي مع اختي وزوجها

السلام عليكم ، انا شاب عمري ٢٢ سنة قبل فترة اختي تشاجرت مع زوجها في البيت وهو ضربها وهذه ليست اول مرة يضربها ، اختي من النوع الي لسانها طويل واي احد يقول بها انطمي ترد بكلام قذر ، المهم هي ممكن بعد ما طولت لسانها عليه هو عصب وضربها ضرب قوي لدرجة انها تعورت واصيبت بكدمات على وجهها ، المهم هي اتصلت علي وانا ذهبت لأرى ما الموضوع عندما وصلت وجدت الباب مفتوح دخلت ورأيت زوج اختي قاعد حاط رجل على رجل وشماغه على كتفه ويشرب شاي ويطالع في جواله ولا كأنه مسوي شيء سلمت وانتبه لي واول ما شافني قال لي اختك اتصلت عليك انت تجي تاخذها وبعدها جلس يضحك انا سكت لأني ما حبيت اكبر الموضوع ولا حبيت اتهاوش معاه لأنه بصراحه هو ضخم وطويل ومعضل وانا قصير نوعاً ما ونحيف يعني ما حبيت اكبر الموضوع عشان ما يتحول لعراك جسدي رحت لأختي وشفتها كان في كدمتين على وجهها وجرح على رقبتها وهو جاي يقول والله ما تاخذها انا رجالها وانا اللي اقولها متى تطلع ومتى ترجع قلت له احنا عطيناك بنتنا معززة مكرمة وانت ماخذها تطقها وتهينها وكلام مني وكلام منه بعدها تضاربنا لكن بصراحه الرجال فقع وجهي ومسح فيني الارض والله وجهي صار فيه كدمات وهو ماسكني ويضرب فيني وبكس يمين وبكس يسار وانا ما قدرت حتى اسببله كدمة او جرح سطحي والله حتى ثوبه امتلأ من دمي صرت انزف من خشمي وفمي انا اضرب فيه لكن هو ما تأثر ما ادري ضعف مني ولا هو قوي بزيادة المهم رجعت للبيت وانا مطقوق وحالتي حاله حتى بلوزتي مليانه دم علمت ابوي بالسالفة وقال لي تستاهل ليش تتعدى على الرجال في بيته انصدمت من ردة فعل ابوي قلت له اختي مضروبه قال كل الازواج يتضاربون وبعدها يتصافون وبعدها جلس يهزئ فيني لأني انضربت من زوج اختي ويقول لي انا رخمة وردي ويقول اختك زوجها رجال ما خلاها تطلع معك واليوم اللي بعده اكتشفت ان زوج اختي مشتكي علي في الشرطة واختي شهدت معاه وقالت للشرطة اني انا الي ضربتها وليس زوجها ، للأمانه انقهرت وهذا وانا فازع لها وانضربت وبهدلت عمري عشانها واخرتها تتبلى علي وتتهمني كذب ، لكن بعدها ابوي تكلم مع ابوه وتنازل عن الشكوى لكن انا حسيت بالقهر لأنه ضربني ومن غبائي رحت انتقم منه لحالي عقبها بيومين رحت اراقبه وهو ما شي في الشارع وكنت مخطط اجيه من وراه واضربه بالعصى اللي معي وكنت وراه لحد ما وصل باب بيته وجيت وضربته لكن ابن الذين ما تأثر واول ما التفت وشافني عطاني بقس خلاني افقد توازني وبعدها رديت له الضربه لكن ما تأثر وسحبني للحوش وصرنا نتضارب و من سوء حظي كان اخوه جالس في المجلس وطلع وشافنا نتضارب وضربوني هم الاثنين لين تفلت العافية ، انا احس حقدت عليهم وحقدت على اختي لدرجة ودي اذبحهم بسبب كرامتي اللي انهانت مرتين واختي احسها وقفت مع زوجها ممكن لأنه مهددها ما اتوقع انها وقفت ضدي انا اخوها بدون سبب وانا جاي افزع لها ، الحين انا فكرت اجمع اصدقائي ونروح نضربه ، هل تؤيدون فكرتي لأني ما اقدر اشتكي للشرطة لأن الهوشة صارت في بيته بيقول تهجم علي في بيتي