مشكلتي مع الخياطة أرقتني ياليت تساعدوني

أخواتي الكريمات

السلام عليكم ورحمة الله وبركاته

أنا من المتابعات للمنتدى واستفدت منه وايد خلال فترة حملي والولادة وناوية بأذن الله أكتب قصة ولادتي بالتفصيل عشان أشارك بقية الأخوات لكن قبل كل شي حبيت تشاركوني مشكلتي يمكن ترتاح نفسيتي شوي .

ولدت قبل ثلاث شهور وهي أول ولادة لي ( بكرية ) ونتيجة لعدة ظروف منها أني تأخرت لين ما رحت للمستشفى ولسوء الطاقم اللي أشرف على توليدي صار عندي تمزق أثناء خروج رأس الطفل وطبعاً اللي ولدتني ما تلاحقت الموقف من قبل وسوت لي توسيع ، بعدها خلوني أكثر من ساعة ونصف من غير ما يسوون لي خياطة ولما جت الدكتورة تخيط ما قدرت استحملها وهي تدخل ايدها داخل عشان تنظم وتعطيني ابرأة البنج ونتيجة سوء معاملتها لي رفضت إنها تسوي لي الخياطة إلا بتخدير كامل واضطر زوجي يوقع على الأوراق عشان يدخلوني العمليات لكن عطوني بنج موضعي ( في الظهر ) لإني كنت مآكله وسوت لي الدكتورة الخياطة ، وطبعا ما حسيت بشي لين اليوم الثاني بعد ما راح مفعول البنج لكن والله شفت الموت ، يومين ما اتحرك من السرير حاطين لي قسطرة ومغذي .

في المستشفى لما كنت أسأل الممرضة ليش أحس بألم كبير من الخياطة قالت لإنه صار عندج تمزق والغشاء عندج من النوع اللي يتفتت لذلك ما في مكان في المنطقة ما تم تقطيبه وخياطته

المهم في الموضوع إني قعدت أعاني من الخياطة والخيوط خذت وقت طويل لين ما طاحت يعني لين بعد الأربعين والخيوط بعدها ما طاحت ( علماً بأني ما طهرت إلا بعد خمسين يوم من الولادة)

بعد الولادة بإسبوعين رحت لدكتورة في عيادة خاصة تكشف على الخياطة قالت لي الخياطة غلط ولما سألتها شو تأثير الخياطة الغلط قالت ما في شي بيبين لين بعد شهرين أو ثلاثة .

بعد أربعين يوم الولادة حسيت بإلتهابات رحت راجعت نفس الدكتورة ( وبصراحة أنا من النوع اللي يخاف وايد يعني بصراحة تعبت معاي وايد عشان بس تشوف مكان الخياطة بدون ما تلمسه وما خليتها تدخل فيني أي أداة من أدوات الكشف اللي تستخدمها ) عاد هي من النرفزة ولإني مضيعة وقتها أول ما شافت الخياطة قالت اصلا ما اقدر ادخل فيج شي لإنج بتتعبين وايد لإنهم مخيطينج غلط ومضيقين المنطقة وايد ( وقالت أنه حتى في ......... بتتعبين وايد )، قالت إذا تحبين بفتح هالخياطة وبعيدها مرة ثانية بشكل صحيح بعد شهرين أو ثلاثة .

أنا بصراحة خايفة وايد أولا من كون الخياطة غلط ( واللي بصراحة ما أعرف شو تأثيرها لو كانت غلط ) وخايفة بعد من أني أعيد الخياطة ، وأخاف أنه الدكتورة تبالغ لمجرد أسوي الخياطة مرة ثانية عندها .

اللي يضايقني بعد إنه في كتلة بارزة من اللحم على طول منطقة الخياطة ( اتصور اللي سبق لها الولادة صار لها نفس الشي ) هالكتلة لين الحين ما خفت رغم مرور ثلاث شهور على ولادتي ، أتمنى من الأخوات أنهم يقولون لي هل الأمر هذا طبيعي ولا هالبروز كان لازم يروح من فترة

خواتي أنا فعلا متأزمة من هالموضوع لدرجة أني مانعة زوجي عني بسبب الخوف لإن هالخياطة ومضاعفاتها عقدتني وزوجي إذا استحملني كم شهر ما بيستحملني مدة أطول .

أدري أنه الأفكار مش مرتبة لكن كتبت الموضوع بعجالة وأتمنى ألقى إجابات مطمئنة عندكن

أختكم

لامع البرق