مشكلتي مع الزواج ...

السلام عليكم ورحمة الله وبركاته

مادري كيف ابدا لكن هالمشكله مضايقتني بشكل كبير ومسيطره على كل تفكيري .. انا الحمدلله بنت مو ناقصني شي كل مميزات الجمال فيني وجامعيه ومثقفه وطموحه الحمدلله لكن مشكلتي بالزواج !! انا عمري شارف على الثلاثينات وللحين ماتقدم لي شخص مناسب ، كل اللي تقدموا اما يشوفني ويروح او يكون فيه عيب مثل مايصلي او مريض نفسي يتعالج بالصحه النفسيه .
عارفه بتقولون هذا نصيبك الحمدلله راضيه بنصيبي لكن مهما صار انا بنت عندي احتياجات عاطفيه ونفسيه لما اشوف كل اللي كبري من قريباتي وصديقاتي كونوا اسرهم واولادهم ماشاء الله اغلبهم يدرسون اتضايق على حالي احس بفراغ كبير احساس الامومه يذبح نفسي يكون عندي اطفال وبيت اهتم فيه مو بس هذا صرت افكر هل بيمديني انجب اطفال واربيهم خاصة ان عمري صار حدود الثلاثين .
بعد مالموضوع اتعبني وجلسه البيت بعد فكرت اتوظف ودورت وظيفه وحصلت الحمدلله لكن حصل العكس بعد الوظيفه صرت افكر فيه بزياده كل الموظفات كلامهم على اولادهم والحمل والولاده وامور الزواج وانا ضايعه بينهم ! حتى الموظفات اللي اصغر مني تزوجوا وحملوا ماشاء الله .
مااقول هالكلام حسد لهم لا والله يعلم ربي ان افرح بفرحهم وانبسط لهم لكن شعور انك غير عن البقيه باهتماماتك واسلوب حياتك متعب .
وسامحوني كلامي اللي فوق مو مرتب لكن كتبت اللي بخاطري واللي احس فيه . خاصة هالمواضيع حساسه مانقدر نتكلم فيها مع اقرب الناس لنا ..
بالنهايه حابه تدعوووووون لي لعلى ربي يقبل دعوة احدكم .. وحابه تساعدوني وتدلوني على طرق ممكن تساعد على الزواج مثلاً فاعلات خير يبون الاجر من رب العالمين بدون مقابل وتخاف الله بالشخص اللي تبحث له

ملاحظه
* انا مو راعيات روحات لزواجات والجمعات لانو الوالده ربتنا على هالشي وهي بعد ماتروح الا زواجات الاقارب من الخوال والعمان فقط
* الخطابات كذابات يبون الربح المادي واسعارهم مبالغ فيها واغلب اللي عندهم اما معددين او مسيار وانا هالشي ارفضه حابه بعد صبري ربي يرزقني زواج مناسب ..