مشكلتي مع بيتي وبناتي ووجهة نظركم

بسم الله الرحمن الرحيم

السلام عليكم ورحمة الله وبركاته

انا ماقدر اطول عليكم وكمان لاني مشغوله :09:
انا بقولكم مشكلتي وابي استشيركم فياليت الي ماعندها خبره ترفع الموظوع فظلا لاامرا

انا بيتي صغير ثلاث غرف وصاله وعندي ماشاء الله سبع بنات خمس يدرسون وثنتين باقي صغار سنتين ونص وسنه وثلاث شهور المشكله في حوووووسة البيت الي ماتنتهي والحين مع اقتراب المدارس البنات الكبار بينشغلون مدرسه الى الضهر وبعدها غدا ونوم الين العصر وبعدها مذاكره وحوسة اوراق وكركبة كتب وبعد المغرب نجلس كلنا سوا مع ناكل ونشرب الشاي ونتفرج على التلفزيون الين الساعه تسعه اوعشره وبعدها نوم المشكله كل واحده على كيف كيفها الي تدخل المطبخ وتحوس وتطلع وصراخ لان الي عليها المطبخ ماتبغى احد يحوس واصلا من زين ترتيبها بس اعذرها علشان وقتها والي عليها الغرفه تصارخ البنات يلعبون فيها ويحوسونها والي فيها الصاله مكان جلوسنا الدائم دائما تبكي تقول ليش الكنيس مرتين او ثلاث في اليوم والي فيها الحمامات الله يكرمكم تبكي ليش غرقانه وكل شوي تمسحها الثنتين الصغار لوحدهم يربكونني وانا مادري اشبني صرت كسوله افكر استخدم منشطااات هههههه
يعني اكيد عرفتوا وين المشكله بناتي حواساااات كل وحده تحوس على الثانيه ولا يهمها والمشكله ماترتب الا اذا قلتلها واحيان تصير مشكله علشان ذا الشغل الي ماينتهي وفي الاخير البيت مايكون مرتب الا في الصباح

وبيني وبينك بناتي قويات شخصيه انا احيان ماقدر فيهم لاكن مابين لهم واذا جيت بظرب يقدرون يشدون يدي ويدفون وانا ماقدر افك نفسي ماشاء الله اجسامهم قويه
حاولت كثيييير انضمهم يبون يمشون كلمتهم وانا احاول اخلي الكلمه كلمتي وذا الجيل كل الامهات يشكون منهم فصرت اعاقبهم يعني مثلا ذا السنه قلت لهم مافيه شناط مدرسه جديده داوموا بشناط العام تجننوا بس مشوها ويحلفون اجيب وهم عارفين اني عند كلمتي بتقولون وين ابوهم هو عنده مشاغله وما يجلس في البيت كثير ودايما يقولون امنا متسلطه وقاسيه وماتحبنا مع اني اظحك معهم واخليهم في الاجازه يسهرون واحيان اعطيهم الكمبيوتر مكافئه واحيان اكافئهم بفلوس يعني مرنه وحازمه شوي

انا احب كل شي بالمسطره نظااام في كل صغيره وكبيره والبنات فوظويااات مره رغم العقاب والحرمان والحزم وكمان يظحكون علي اذا اخذت قرارات جديده ولا يتأثرون والله حتى الصغار يلعبون واذا خلصوا يخلون العابهم ويروحون واذا رجعتهم يرتبون وراهم يبكون ويرفظون والله احيان اظربهم ويعاندون رغم الظرب واحرمهم اليوم الثاني من الالعاب ولاينفع والله ماعاد اشتريت العاب من الحوسه والمضاربه على الالعاب فضييييعه
ياليت تكونون فهمتوني
بناتي متفوقات في المدرسه وحتى المعلمات يمدحونهم لاكن يشكون من غرورهم على البنات وصاحباتهم يحبونهم ويجون عندهم البيت انا ماخلي بناتي يروحون لزميلاتهم اخاف عليهم ورفظت اعطيهم جوالات اقلهم باقي صغار لسى في المتوسط ولابتدائي وهم يموتون وياخذون جوال لان كل اقاربهم وزميلاتهم عندهم جوالات وكمان ابوهم رافض الفكره مرررره حتى شغل البيت زميلاتهم يستغربون ليش يشتغلون
والله حتى الصلاة يصلون غصب
شوروا عليه وين الغلط
مشكلتي ابغى البيت منظم مره مثل الفندق اقلها غرفتهم
وسلامتكم