مشكلتي مع خطيبي،ادخلو جعلكم الجنه البارده.

السلام عليكم
انا صديقه قديمه في المنتدى ودايم ادخل و اقرا واستفدت منكم كثير،اليوم قررت اسجل بعضويه جديده و اطرح مشكلتي و اتمنى تساعدوني لانو جدياً مشتته تماماً و ابي ارتاح.
بدخل في الموضوع انا ملكت تقريباً قبل ثلاث اسابيع كان يوم لطيف وخفيف طبعاً المعروف انو بعد الخطوبه يكون في تواصل بين المخطوبين،خطيبي اخذ رقمي من عند اختو و صار يراسلني ع الواتس مرّ الاسبوع الاول اللي كان بيننا فقط محادثات بسيطه وقصيره جداً م اتصل عليّ ابداً،قلت يمكن يستحي يمكن انشغل حطيت له اكثر من عذر،مرّ الاسبوع الثاني وبرضو نفس الشي محادثات قصيره وكلها عن الاثاث عن البيت عن الزواج م يسأل عن اخباري حسيته مو مهتم يعرفني اكثر احسه بارد تجاهي انا اعرف اللي اول م تنخطب يكون خطيبها طاير فيها ويبثرها و يتحمس يعرفها اكثر و يتعمق فيها،انا حسيت ببروده تجاهي،قلت اعاتبه كتبت له اللي بخاطري لمحت له انو نتكلم اكثر انو نفهم بعض اكثر احنا في النهايه بنعيش حياه وحده،لما صارحته بكل شي قلي احس جاني كف م اعرف ايش ارد وجلس ساكت بعدها،انا ضاق صدري وقلت له خلاص لا تقول شي بعدين قلي انا اهلي معاي في البيت م اقدر اتكلم ووقت دوامي اكون مشغول مرا م افضى للجوال،بالله ذا عذر؟.سكت وقلت في نفسي يمكن بعد كلامي يتغير و يقرب م يبقى بعيد،وعدا اسبوع بعدها ونفس الحال واتس بس والله محادثه قصيره كلها عن الاثاث وغيرو،انا اهلي م سألو عن الولد قالو استخيري وخلاص استخرت كثير ودعيت ربي انو يسخر لي الخير ووكلت امري لله و تم عقد القران،زواجي قريب بقي له اسابيع انا حالياً مو مرتاحه و صدري ضايق وافكر بأشياء م ابي افكر فيها اللي خلاني اشيل هم اكثر انو ابوي يقلي ادعي انه يكون ابن حلال لانو م يعرفه ولا سأل عنه،امانه عطوني رأيكم انا خايفه و متردده كثير،انتو تشوفو اني استعجلت الله يريح قلوبكم ابغا حلول؟ معليش طولت عليكم