مشكلتي مع زوجتي

السلام عليكم,,
انا وزوجتي صار لنا ثلاث سنوات مع بعض. مافي بينا اي مشاكل والحمدلله تفاهم وود بينا على طول. قبل سنتين تقريبا زوجتي فجأة تبكي وانا اقول لها وش فيكي وماكانت تقول. المهم بعد محاولات عرفت منها وصارحتني انها ماهي متقبلتني ولا تشعر انها تحبني من الداخل وكانت تبكي لأن يجيها هذا الشعور. مع اني احبها جدا جدا وهي تدري بذلك. بعدها بسنة تقريبا نفس الشي فجأة تبكي ولما صارحتني قالت لي نفس الشي انها ماتشعر بحبي وهذا الشي متعبنها واجد. صارحتني قالت لي انها انسانه بسيطه وبس تحتاج مني اني ادلعها بكلام وغزل وغيره وممكن هذا الشي يجعلها تتقبلني. انا وعدتها وقلت لها اني بتغير واحاول اصير مثل ماودها. صحيح اني بارد احيانا لكني ابدا مو جاف معاها.
حاولت اغير هذا الشي في شخصيتي واصير مثل ماتبغى لكن بعد فتره احس نفسي رجعت مثل قبل مع اني والله حاولت اتغير من ناحية هذا الشي لكن ما احس ان هذي شخصيتي ابدا. المهم قبل فترة كلمتني وصارحتني مره ثالثه واخبرتني انه هذا الشي الناقص مضايقنها مره وانها كانت تفكر في الانفصال شبه يومي خلال السنوات الي راحت وانها كل يوم كانت تضغظ على نفسها عشان تتقبلني. وتقول ان تجيها افكار انها ممكن ما اختارت الخيار الصح ولا كان ماتجيها هذي الافكار من الأساس. طبعا كانت بالنسبة لي صدمة حسيت ان كل السنوات الي فاتت كانت مثل الفلم ومضحوك علي. ولأن هاذي المره الثالثه، الصراحه احس ان حتى لو تغيرت بتظل انها ماتتقبلني وعلى كلامها ان القبول يجي من الله سبحانه وانها لأسف ماتتقبلني ومو بأيديها.

ما ادري وش اسوي, اقدر اوعدها بأن اتغير وترجع الامور طبيعيه بس بعد فتره يمكن يفتح نفس الموضوع. ولا ابغى اعيش مع شخص مو متقبلني ولا يملك مشاعر بإتجاهي. لان كذا ظلمت نفسي وظلمتها معاي. الموضوع بالنسبة لي مايستاهل ان الواحد يفكر بالانفصال عشانه دام انه شي سلبي مقابل الف حاجه إيجابية. بس هذا الشي عندها مهم واهم من كل شي ثاني وان هذا الشي تعبها كثير. اسف ممكن الموضوع مو مرتب بس ان شاء الله فهمتو علي. اعتذر ان كان هذا المنتدى خاص بالنساء لكن الصراحه ما اعرف منتدى فيه مثل هذي المواضيع غير هذا المنتدى. اتمنى انكم تساعدوني وتعطوني نصايح مع العلم ليس لدينا ابناء وحاليا اتفقنا ان نتوقف عن التواصل مع بعض لمدة.