مشكلتي مع زوجي

السلام عليكم أخواتي العزيزات ، عندي مشكلة كبيرة مأرقتني جدا مع زوجي وواصل التفكير فيني للانفصال ، اللي يراجع مشاكلي معه يعرف انه من ١٨ سنة وهذي مدة زواجنا وهو عنده طبع لا يطاق وهو الخصام بشكل ما تتخيلوه ولمدة ٦ شهور احيانا ولأسباب تافهه بس تكبر بسبب اسلوبه المستفز وطبعه القاسي في الكلام ، تعبت جدا على مدار هذه السنوات وانا متحمله خصامه ولما يخاصم ينعزل في غرفة لوحده لمدة شهر وشهرين واحيانا اكثر ، هو والحق يقال ما راعي حريم ولا خمر ، لكن فيه كبرياء وغرور ما له حد
ومشكلتي الثانية معه انه يستخسر يهديني متخيلين عندي منه ٦ اطفال ولا مره بولادة من ولاداتي اهداني اي شي لا لي ولا للمولود مع انه اخواته لما يولدوا يعطيهم ٣٠٠٠ ريال ، عليهم بالعافية ويستاهلوا لا تفهموا اني ما اريده يهديهم بس اتمنى يهديني زيهم
انا علاقتي في اخواته وامه من احسن ما يكون هو عنده ١٢ اخت ، وامه انسانه تخاف ربها ومعتبراني مثل بناتها وانا احبها زي امي لاني ما شفت منها طوال هالسنين كلها الا كل الخير والحمد لله
اخواته كلهم عسل وطيبات وأخلاق وعلاقتي معهن ممتازة والحمد لله ما عدا واحده منهن بس الله يهديها تحاول تخلق مشاكل وتكلم زوجي في الجروب وتقول له يا فلان تعال خاص ابيك في موضوعنا الخاص ، او تقول له اللي بيننا ما يطلع لاحد او الموضوع الخاص جدا وهكذا وكل هذا في الجروب عشان تخليني اسمع، واخواتها الباقيين ملاحظين اسلوبها وما عاجبهم ، المهم ، هو حاليا مخاصمني من ٣ اسابيع ويستفزني في الجروب وينادي اخته هذي بالذات بإسم الدلع ويقول لها تعالي على الخاص اكلمك في موضوع يا حياتي او شوفي الخاص رسلت لك شي من اللي بيننا، وهي ترد عليه أبشر يا حبيبي والموضوع اللي بيننا في بئر وهكذا ، وعرفت انه من يومين راح بيتها وتخيلوا انه أخت زوجها جلست معهم وهي بنت ما متزوجة وواصل عمرها ال٣٠ سنة ، وانا استغربت كيف زوج اخته يسمح انه اخته تجلس مع اخو زوجته
وانا كل هذا ومطنشه بس حاسه انه خلاص ما قادرة اتحمل وافكر بالطلاق
سمحولي كلامي ملخبط من القهر
كيف اتصرف؟!