مشكلتي مع زوجي دخول المتزوجات ومجربات الحياة الزوجيه فقط ارجوكم

السلام عليكم




بنات بدخل بالموضوع على طول بس قبل بقولكم اعذروني 
ع الموضوع لانه ملخبط وطويل وترا فيه كثير جوانب ماقدرت اقولها لانها بتطول الموضوع زيادة لكن يمكنكم مراسلتي بالخاص او السؤال هنا وراح اجاوب ان شاءالله بس لاتطنشوني طلبتكم واللي عندها رد يقهر ويزيد همي انا مستغنيه والله اللي فيني مكفيني انصحي وانقدي تصرف مني لكن باسلوب حلو 



انا هالاسبوعين جالسه عند اهلي عشان عندي اختبارات وهو بعد اختبارات 
المهم يوم الاثنين الاسبوع اللي راح اول الفجر كنا نسولف بالواتس اب ونضحك عاادي مالنا من الشيطان طاري 
المهم سالني قال وش جدولك انا حافظته عندي بالنوت صورتها وارسلتها قال هذا جدول قلت ايه قال وين الجدول نفسه قلت ماعندي جدول قال طيب وين التفسير قلت ههه اي تفسير ماعندنا تفسير قال احنا عندنا قلت اي احنا،بنات ماعندنا قال والحاسب طبعا انا فهمت قصده بس قلت مابس مشاكل قلت وشفيك نسيت انت جايبني قبل اسبوعين واختبرته لانهم يقدمونه قال انا مااقتنع مدري ايش ابي الحدول نفسه قلت ليه طيب قال بس ابيه، قلت لا علمني ليه طلبك غريب تبي تعرف الجدول هذا هو ارسلته ليش الاصرار ع الورقه قال هذا رغبتي قلت رغبتك عطني سبب مقنع غير انك مكذبني وابشر اجيبه لك قال مافي سبب بس جيبي الجدول قلت ماراح اجيبه انا اكرررره حركته هذي تخيلو رابع مرة تقريبا تتكرر غي الاشيا البسيطة واحنا مالنا غير سنة متزوجين كل شي يطلب دليل عليه المهم انا عصبت واشتد النقاش خصوصا اني حامل ومااتحمل شي وهو مايقدررررر ابد وصرنا نتهاوش وتفرعنا لمواضيع ثانية وهو كل شوي يقول الجدول تجيبينه مدري ايش قال بجي للمدرسة واخذه قلت تعال المهم مع الكلام اصر اخخر شي قلت انا بروح اتجهز للمدرسة قال جيبي الجدول قلت ماراح اجيبه دق ع المدرسة وخذه سلام قال الجدول تجيبينه اللهم اني بلغت اللهم فاشهد مدري ايش قلت بنفسي يمكن هالمرة ماحب يرجع بكلامه بجيبه واشوف المرة الجايه خصوصا اني ماكنت اتكلم وابين ان هالشي مضايقني الا هالمرة تقريبا المهم جبته وجلست اقول اعجبك نكدت علي ولو صار بالجنين شي انا مالي علاقه ترا كله منك مدري ايش كلام كثير اهو سكت مارد ابد وتسكر الموضوع معد كلمنا بعض 




يوم الخميس الساعه سبع المغرب انا كنت نايمة دق علي كم مرة رديت بالسادسة تقريبا كنت مقصرة ع جوالي المهم قام يسلم عاااادي ماكان فيه زعل بس برسميه وانا ارد عادي قال وينك قلت بالبيت قال نايمة قلت ايه قال انا عند الباب انا انصدمت كيف عند الباب ماقالي من اول سكت شوي بعدين قلت طيب بس بتاخر شوي لاني نايمة ومو جاهزة ابد قال كم يبيلك قلت ربع ساعه كذا اقل شي قال ليه قلت على مااصحى والبس واجمع الغراضي الضروريه قال انتي وينك استغربت قلت انا بالبيت اقولك قال لا موب بالبيت كان احد ضربني ع وجهي قلت وشو موب بالبيت وكنت اتكلم شوي شوي لان اختي نايمة عندي بالغرفه ماحب اوضح هالاشياء لهم قلت والله باابيت يعني وين بروح قال لا موب بالبيت كانك بالبيت ليش ماقلتي طيب وطلعتي على طول قلت لاني نايمة واكثر من اسبوع ونص انا عند اهلي يبيلي وقت اتولم وانا والله مدري وش السالفه ليه دق فجاه يقول انتي طالعه قلت كلمني بااواتس اختي عندي قال ليه مااتتكلمين عندها قلت ماراح اتكلم عندها وانت عارف اني ماوضح هالاشيا لاهلي المهم قال انتي طالعه بس علميني وين قلت قلان والله والله بالبيت وبسريري ونايمة بعد مدري وش السالفه قال علميني وين رايحة مدري ايش قلت انا ماطلعت غير هالكلام ماعندي قال طيب انا عند الباب قلت طيب وانا متوقعه انه يكذب 
سكرنا وقام يكلمني بالواتس يقول دقي من ثابت اهلك 
انا رفضت ادق لسببيين اول شي اني طفششششت من عادته هذي ولو دقيت الحين راح يستمر كل شي كل شي لازم يدلل مايصدقني بولا كلمة مدري ليه دايم ظنه سوء فيني مع اني والله والله مااكذب عليه ابد ثاني شي ان ثابت اهلي دايما ينفصل وانا مرة صارت نفس الساالفه ققال دقي قلت طيب بنزل ونزلت لقيته مفصول قلت مفصول قام كذبني زيادة والحين انا فوق مادري وش ووضعه هو تحت المهم  قلت هالمرة لو وش تسوي ماراح ادلل ع كلامي قبل كنت اجاريك اقول معذور مالنا الا كم شهر يمكن مابعد عرفني بس الحين لنا سنة متى بتثق فيني المهم بعد شوي انا جهزت اغراضي احتياط لاني ماادري عنه سالته ومارد المهم قبل يوم يكلمني قلت طيب انت علمني وين تتوقع رايحة له عشان اعلمك قال انتي علميني تناقشنا وسكرنا بعد شوي دق قال يعني مارحتي لفلان ( خالي ) قلت انت من جدك يعني بيت خالي لو بروح ليه منيب قايلتلك دايم اروح واقولك ماعندي مشكلة ليه بغبي اصلا انصدمت يوم قاله قلت انا دايم اقولك واروح ماعندي مشكلة وش بيخليني اكذب عليك بفهم قال مدري انتي ادرى قلت انا مارحت غير هاالكلام ماعندي المهم قلت طيب ليه قلت كذا انت وش خلاك تتوقع قال اخوك يقول مودي اهلي لبيت خالي او بجيب اهلي من بيت خالي قلت والله مدري يمكن امي رايحة لحالها انا فوق مدري وش الوضع تحت ماصدق انقهرت قلت كلمها وارسلت رقمها معد يهمني شي خل كلن يدري عن اسلوبه ودي




المهم جلست اقرا رسايل الواتس اب لقيت امي كاتبه بقروب اخواني تبي احد يوديها بيت خالي صورت المحادثة وارسلتها قلت شف توني اقراها المهم يوم دريت ان اخوي اللي قايل هالكلام دقيت دقه من الثابت وسكرت قلت ارتحت الحين وكملت حكي طويل ان لو فيه احد بيتسبب بالجنين فهو انت المهم من ضمن الكلام قال انا اصلا عازم من الاثنين اني مارجعك ( يوم سالفة الجدول) قلت انا مااكلمك عن الرجعه ماهمتني انا اتكلم عن هالظلم اللي كل يوم قال هذا غلطة اخوك قلت اخوي كلمة ورماها تعال واسالني او تاكد ع الاقل بطريقه ثانية قل مشتاق بسولف معك بس دقي من الثابت عشان لايصرف اي شي مو هجوم اهو حس بغلطته لكن مستحيل يعترف بغلطه اعرفه قال انا واصله معي وان زودتيها برسلك وورقتك قلت انا واصله معي اكثر منك ومعد تهمني سو اللي تبي قال خلاص كلمي ابوك قولي انك معد تصلحين لي تخيلو ماقال مااصلحلك قلت انت اللي ماتصلح لي ومو انا اللي اكلمه انت الغلطان المهم قبل هذا قال ولاتزعجيني بمراجعات المستشفى خلي اهلك يودونك انا مالي علاقه مالك مني الا مصروف يوصلك كل شهر قلت اهلي ماراح يودوني الا للطوارئ انت ابوه انت اللي توديني قلت اذا صار نقص حديد لاتقول ليه وانتي ماتاكلين وماتفعلين كل الحريم ياخذون حديد بهالفترة وانت اللي بتتسبب عليه قال انا ابن كلب وبتسبب عليك وعليه بحريقة انتي وياه انا معد رديت 
يوم السبت ارسل قال بعد خمس دقايق طلعي احد ياخذ المصروف طبعا مارديت وحالفه ماارد عليه فكرت احسب خمس دقايق واطلعه قبل مايطلع اللي عندي ارسل قال دخلته يظرف من تحت الباب الفلاني رحت اخذتها خفت يشوفونها اهلي والا 200 ريال تخيلو وش اسوي بها هذي 




سكت ماحاكيته اببد لليوم 








المشكلة الاكبر ان اليوم الاربعا هو ذكرى زواجنا وانا عند اهلي اااااااه ياقلبي كنت انتظر هاليوم والمشكلة اختي عارفه انه ذكرى زواجنا لانه اول مرة وسالتها هي متزوجة من زمان
وثاني شي اهلي متوقعين اني بروح بكرا اوو بعده واذا جينا نخطط لشي او نسولف يقولون كان رحتي الاربعا كذا واذا الخميس كذا يعني متوقعين اني بروح انا ماودي يعرفون بالزعل اللي بينا مااحب وهالشي هو اللي مخليني اراضيه هذيك الفترة حتى لو هو غلطان صار يشوف نفسه علي وينتظرني اراضييه بكل مرة لا ولايرضى من اول مرة بعد شايف نفسه  








والمشكلة الجمعه عندنا مناسبه والسبت حفلة نجاح مع اهلي ولازم احط او اجيب شي كيك هدايا اي شي وانا معد معي فلوس احتجتها بشي ضروري مية ريال وصرفت شوي باقي ستين يمكن بس وش اسوي بها ماودي اطلب منه والاحد بعد حفلة نجاح وكبيرة مع ناس بعيدين وابي ملابس ملابسي ضاقت علي مع الحمل والصيف كله ماشريت البس حقت العام واصلا مااطلع كثير بس هالفترة مناسبات كثير 
وغير كذا مابي اكلمه واساله اني بروح لكذا واخاف مااقوله ويقلب السالفه علي مدامها الحين واقفه ان الغلط عليه
هو قد حط لي 500 بالبنك بحسابي والصرافه معي قال لا تسحبين منها ابد خليها للضرورة ماعمري سحبتها تتوقعون اسحبها الحين وكيف اوصله هالشي 
ومعاي فلوس مخليتها مع ابوي ايام مهري مايدري عنها حول الفين او ثلاثة بس ماودي اصرف منها اخاف احتاجها بشي وماقدر اقوله :( 




وماودي اطلب منه عشان ماابين له اني محتاجته ويمسكها علي لانها قد صارت بس مو بشكل واضح
بس الطلعه لازم اقوله بروح كذا كيف اقوله اخاف يقول لا وغصب عني اجلس اخاف اطلع من غير رضاه يصير شي لاقدر الله 
صح ذكرت يوم الخميس ابوي مسوي عزيمة بنجتمع وبيعزم رجالنا انا وخواتي طبعا مدري يجي او لا 
















اعذروني الكلام طويل وملخبط ان شاءالله فهمتوو :(