مشكلتي مع سواق المشاوير/ استوفى الرد

صباح الخير انا احتاج مشاوير خاصه زي اروح اقدم او اروح مستشفى او معهد تدريب او صيدليه وما عندي احد يوديني اخواني زي عدمهم واذا واحد وصلني مره في العمر يكرهني عيشتي في الصراخ كنه شايلني على راسه والمشكله مانعين السواق منع بات المهم لقيت بعد جهد سواق كبير في السن معه زوجته وثقه فقلت كويس لولا الله ثم هم كان تعطلت كل اموري وكان يوديني لمشاويري فكنت اروح معهم الصباح صار لي اتعامل معهم خمس سنوات وهم ايضا يودون مشاوير غيري بتقولون وين المشكله المشكله ان ها السواق عليه تصرفات تضايقني يطفشني في الاسئله مثلا اذا مرني وشاف سيارات اخواني عند بيتنا جلس يقول ليش اخوانك ما يودونك او يقول وشصار عليك في الوظيفه الي قدمتي عليها ولا مره وداني لمحل النظارات عشان نضاراتي يوم ركبت جلس يسئل هو وزوجته هل انت شريتي عدسات ولا تكوني شريتي ملونه ومدري ايش لا وهو يتكلم يلتفت لي مطيح الميانه وانا جدا استحي انا بنت وفيه شي اخر كثير بغيت ابكي منه وهو اذا وداني مشوار وما عرف الوصف يهاوشني ويعصب وانا داخليا ابكي واحترق واقول في نفسي وش حدني على المر قال الي امر منه يعني لولا الظروف ما اضطريت اركب معه واحيانا يصارخ على زوجته قدامي وانا اموت رعب. ودي اقوله ماله داعي تهاوش وتطيح الميانه اولا انا مو بنتك ثانيا انا بنت عزباء واستحي منيب ام سبعين سنه من القواعد والشي الثاني انهم ما يشيلوني ببلاش انا اعطيهم حقهم وزياده المشكله ان تركتهم تعطلت لاني ما لقيت سواق غيرهم او اني استسلم واكمت العبره واقوله سم وطاعه واكل تبن