سلامي عليكم خواتي الغاليات
اشحالكم جميعا عساكم بخير وعافية
بصراحة انا ترددت وااااايد قبل ما اعرض مشكلتي عليكم واطلب مساعدتكم لأني مستحيه وااايد
بس شو اسوي ما لي حد غيركم بعد الدعاء لله
وانا كلي ثقة انكم ما بتخيبون ظني وما بتقصرون معاي بأفكاركم وحلولكم ومقترحاتكم الثمينة
مشكلتي الله يعافيكم من كل بلاء هي (( خادمة بيتنا))
قصتي وظروفها بالتفصيل كالآتي (( تحملوني ان طولت عليكم)):
انا من تزوجت الى الآن اسكن مع اهل زوجي في نفس البيت (( ما عندي ملحق خاص فيني)) وعندنا شغالة وحدة
ومن فترة قررت ام زوجي تييب شغالة ثانية لأن العايلة بدت تكبر بعد ما تزوج ابنها الثاني واصلا من اول العايلة كبيرة والبيت كبير بس توهم حسوا
المهم قبل ما تستقر الشغالة الاولي معاتا عانينا وااايد من شغل البيت كنا كل ما نييب شغالة تشرد وما صدقنا وحدة ثبتت ويانا ولما وصلت الشغالة الثانية (( وهي اساس المشكلة بالنسبة لي)) انصدمنا كلنا!!(( اهل البيت)) تعرفون ليش؟!!
لأنها طلعت شغالة (( جمــــــــــــــــــــــيــلة) ) جدا بما تحمل الكلمة من معنى والصدمة الأكبر كانت...........
توقعوا؟!!! بقولكم كيف جمالها وعقب بقولكم شو الصدمة الأكبر
الله يسلمكم شغالتنا اللي استقدمناها من اثيوبيا( الحبشة )) كانت جميلة وبيضاء ومليانه وشعرها اسود ونااااااااااعم وهذا اللي استغربنا منه انا وعمتي ولما سألتها عمتي طلعت الحبيبة......الصدمة الاكبر.......... من اصل عربي!! تخيلوا!!!! لا وتعرف عربي عدل مع ان هاي اول مرة تشتغل بس لأنها كانت تدرس بالعربي في الحبشة
ماله داعي احكيلكم تفاصيل حياتها المهم
انا لما شفتها خفت بصراحة من فتنتها على اهل البيت وكلمت عمتي بس قالت لي طنشي ولا تحطين شي في بالج
وفي ايام قليلة بهرتنا بشغلها ونشاطها وسرعة بديهتها ....كل شي تعلمته بسرعة وابدعت فيه حتى الطبخ
وكسبت حب عمتي وعمي لين ما طفرت الشغالة الاولى وطلبت تسافر وبقت هي وحدها ...
بحكيلكم باختصار لأني تعبت من الكتابة ..السالفة وما فيها ان زوجي قام يمدح طبيخها ويقول مثل طبيخ امي( وهو وايد يحب طبيخ امه))
وسافر مرة هو واخوه وما نساها يابلها هدية مع انه اخوه ما يابلها شي !!
واخيرا طلبت منها مرة شي بكل هدوء وقامت تطول لسانها وتتدخل ليش تبيني اسوي وليش وليش ....والى آخره وتهاوشت وياها انا ((( وكانت اول مرة في حياتي شغالة تطول لسانها علي وتراددني ..)) اصلا انا في حياتي ما تهاوشت مع شغالة لأني بطبعي اشفق عليهم وارحمهم ..............بس بعد هذا كله انا ما رمت اتحمل
وعمتي قالت تحملي ما عندنا غيرها اذا سفرناها الشغل كله بيطيح فوق راسنا (( خاصة ان خوات زوجي ما يساعدون في شغل البيت ابدا)) وانا عندي عيالي بعد ماشاء الله
انا سكت وقلت ما عليه بفتح عيوني عليها عدل وبصبر لين ما تيي الشغالة الثانية .......
والحين يات الشغالة الثانية وانا مب عارفة كيف اقنع عمتي نسفر هاي الجميلة مع العلم ان عمتي تموووووووت عليها وفرحااااانه فيها بشكل ما تتصورونه ! من شافتها قالت حسيت كأنها بنتي
وانا متوهقة وبصراحة خااايفة منها وااايد وحدة شراتها فتنة وما عليها امان !!
ســـاعــدووووووووني وقولولي شو الحل؟؟؟؟؟
شو اسوي؟ ابا اسفرها بس ما عندي شي ضدها غير احساسي بعدم الأمان بوجودها وخاصة ان زوجي لافته انتباهه وايد!!
ملاحظة:: لا تقولون لي ما يجوز تقطعين رزقها بقولكم هي اصلا فتنه ولايجوز احضار امثالها الى بيت فيه رجال
اتريا ردودكم خواتي لا تتأخرون علي جزاكم الله خير
Om_Ali @om_ali_1
عضوة جديدة
يلزم عليك تسجيل الدخول أولًا لكتابة تعليق.
الصفحة الأخيرة
بس بصراحه مشكله
الله يوفقك