مشكلتي وزوجي مع الفيس بوك

السلام عليكم
اشكر كل من سأل عني على الخاص ويسألون وش قصتي بالضبط
لاني كتبتها في موضوع وحدة من الاخوات يوم كشفت خيانة زوجها
راح اقولها باختصار مع اني مااحب اشكي همي الا لربي بس لازم افضفض شوي علشان بكرة اكون متماسكة اذا استشرت اهلي
انا متزوجه من ولد عمي وعندي ولدين وكنا في سفرة خارج المملكه في العطلة بين الفصلين وقبل رجعتنا بيوم قالي افتح له النت لان يبيله وقت ادخل الباسبورد تبع الفندق وادخل رقم الغرفة عقب مايصلي
وياللهول فتحت النت وياليتني مافتحته وكان في الليل فاتح على الفيس بوك وشفت الفيس مفتوح شفت الرسائل فتحتها اخذتني ذيك الرجفة شفت رسالة مرسلها لوحدة مصرية يقول والله لادلعك وابسطك انا احب المصريات ووحدة مرسلة له اتوقع كويتية تقول طلعت رقم باسم خدامتي وماراح اتكلم بالغلط حسبي الله عليك تكلمين رجال غريب وتقولين ماراح اتكلم بالغلط
المهم نزلت دموعي غصب عني حتى ولدي الصغير قال بابا ماما تصيح حسيت بخنجر يطعن في ظهري ياربي زوجي لالالالالالا مومعقولة كنت اقرا قصص بس ماكنت متخيلة اني راح اكون من ضمن ضحياها
صحت صرخت
قالي لا موانا هذا اختراق لحسابي
وانا ماعرف في الفيس بوك غير اسمه مااحبه من كثر مااسمع عن مشاكله
المهم حاولنا نتفاهم وحاولت امسك اعصابي وسايرته مع ان فيني غصة
ياحليله يقولي لاتخربين بيتك بيدك والله دنيا عجيبة اهو الغلطان ويغازل ويقول لاتخربين بيتك بيدك
المهم سكت وانا راجعين لسعودية في الطيارة دموعي مانشفت ابد
وصلنا لسعودية وماجني نوم احس بخنجر في ظهري وقبل الفجر حولت حسابه في الفيس لايميلي واهو عرف
وقال اهو لك ماابيه حسيت ان نيته صافية وجلسنا الفجر ساعة كاملة نتفاهم وتفاهمنا على كل شي وقال ان الكمبيوتر في الدوام يعرف رمز الدخول للكمبيوتر واحد شاب يمكن اهو الي متعبث فيه ويمكن كان ناسي يسوي خروج من الفيس بوك
حرام حطها في ظهر الشاب المسكين
المهم سكرنا على الموضوع وكان يوم خميس وقالي كنسلي الفيس بوك كله وخلنا ننسى كل شي وانا والله العظيم صدقته ونسيت وكأن شي ماصار
جاء يوم الاحد بعد ماراح زوجي وولدي للمدرسة تذكرت الفيس بوك قلت خلني ادخله واكنسله وارتاح
قلت لكم ان مااعرف في الفيس شييييي
المهم دخلت وشفت الرسايل وقلت معقولة مافيه شي اسمه وارد ومرسل وعرفت ان فيه شي اسمه الرسائل المؤرشفة
فتحتها ياربي ياربي وش اشوف مصيبة حسيت بطعنة في قلبي ليشششششش يازوجي وش قصرت معك كل شي سويته لك لبس وكلام وفراش تعلمت كل شي علشان ماينقصك شي
شفت اكثر من عشرين رسالة يطلب صداقة بنات
ومرسل لوحدة رقمه لا ومرسل رقمه لها مرتين مصمم انها تاخذه ليششش ليششش ذبحتني والله
ومرسل لوحدة مصرية يقولها انا نازل مصر خلينا نتقابل والله لابسطك وادلعك اوي اوي اوي
ليشششش ماتدلعني وتبسطني انا ولا بنات الحرام لهم طعم خاص
والحقيرة حاطه في الصور الخاصة لحسابها صور جنسية لممثلات والله العظيم يوم شفت الصور حسيت ربي غضب علي ياربي
لا والرجاجيل ذايبين عند الصوروكاتبين تعليقاتهم وسخة مثل اخلاقهم
ليش يازوجي رقمك مع وحدة حقيرة وتطلب تقابل غريبة عنك وش تبي منها يعني تبي تنصحها
بديهي الرجال وش يبي من الحرمة الغريبة عنه الا الحرام والعياذ بالله كيف يبي يبسطها ويدلعها
اهو الحين مايدري اني عرفت برسايله هذي
وانا وعدت نفسي مااكلمه في الموضوع ولاراح اقوله غير رقمك اهو مافكر في عياله وقبل هذا كله ماخاف من ربه لكن انا احب نفسي اكثر من احبه وماعندي استعداد يجيب لي المرض انا مااقدر اتهمه بشي بس الدلائل قدامي
واحسن شي اسويه انسحب بكل هدوء من حياته
بكرة زوجي مسافر لاهله وراح يجيب امه لرياض لان عندها موعد في المستشفى
وانا قلت لابوي يوم الاحد اني ابي اكلمه في موضوع وان شاء الله مايكون مسافر لانه قالي تعالي بكرة قلت له مااقدر خلها يوم الاربعاء اذا سافر زوجي وراح اقوله ولامي كل شي وراح تكون صدمة لابوي في ولد اخوة لاني اعرف ابوي زين ماراح يرضى بهذا الشي ويخاف من الامراض
وانا عندي 8 خوات وانا ال9 وابوي مرة جمعنا وقال من تجيني من بيتها تترك عيالها لاني مااقدر عليكم وعلى عيالكم تجيني زيارة حياها الله اهي وعيالها بس يتركها زوجها عندي كم شهر لا
وبكذا عيالي لازم يكونون عند ابوهم والحمدلله ان امه جايه علشان تجلس عندهم
الله يعين امه والله اني احبها مثل امي
المشكلة اني ماقصرت معه في شي حلوة وجذابة بس الرجال مايملي عينه شي
ادعوا لي يمكن الله يستجيب منكم ان الله يكتبلي الخير مع اني استخرت وحسيت بالراحة للانفصال
واتمنى ماحد يسألني عن شي لاني مالي خاطر ارد الحين والله تعبانة مرة لاني انطعنت مرتين من زوجي