مشكله صديقتي كلمت زوجه الي تكلمه

مساء الخيرات
كل عام وانتم بخير بمناسبه قدوم شهر رمضان الله يعييننه على صيامه وقيامه
لي فتره عن المنتدى بس اليوم دخلت بطلب من صديقتي بعرض لكم مشكلتها وهي على لسانها شوفوا معاها حق في الي سوته او لا البنت تابت وعقلت بس حاسه بتأنيب ضمير وتعب نفسي
رجاء الله يخليكم حنا داخلين على شهر فضيل لا للردود الجارحه ولا للدعاوي
والملافظ سعد مثل مايقولون خلونا نرتقي شوي بردودنا
نسخت مشكلتها من المنتدى الي طرحت فيه المشكله مافيني اكتب عجازه:22:
كل وحده تحط رأيها وهل التصرف الي تصرفته سليم او لا





المشكله


والله مدري من وين ابدء مشتته ومتوتره وتعبانه نفسيتي عدم





في البدايه ما ابي احد يلومني لأني خلاص هالتجربه علمتني درس قاسي جدا فوووق ماتتصوروا لا احد يجي يعاتبني لأن الي فيني يكفيني
البدايه كانت قبل اكثر من سنه وانا في احد مواقع النت ومن الطفش والزهق تعرفت على واحد وامتدت العلاقه ماسنجر بعدين مادري كيف وصلت للجوال
كان جدا جدا جدا طيب معي كنت اشوفه بالدنيا كلها طيب مررره لو كان فيه مثال للطيبه كنت ما اتردد واسميه بأسمه
بالبدايه كذب علي بكل شي اسمه وحالته الاجتماعيه وعمره
التفاصيل الصحيحه انا عرفتها
وبعد فتره علمني انه متزوج
والله ماكان بيننا الا الكلام فقط يعني عمري ماشفته ولا قابلته ولا شي
كان يوقف معي دايم اذا عندي مشكله او محتاجه شي
اول شخص افكر فيه هو تعودت عليه بشكل جنوني كنت معه صادقه عمري مافكرت انه راح يضرني او يسوي لي شي شين كان دائما مسالم حبوب ويضحك ويسولف حتى وانا متضايقه يقلب مودي ويضحكني
كنت اعتبره اخ وصديق والله اتمنى له كل خير وتوفيق وسعاده في حياته عمري ماتمنيت له شر او شي يأذيه قبل شهر تقريبا زوجته قريت رساله مني في جواله وحصلت مشكله كبيره بينهم وراحت بيت اهلها زعلانه وانا من يومها وانا تعبانه ومتضايقه انا قطعت علاقتي فيه خلاص والطريق الغلط والملتوي هذي نهايته وداخله على شهر خير ابغى اتغير تعبت وخايفه من الحرمه ودعاويها تدعي علي اقوم من النوم مخنوقه ماقدر اتنفس والله ما ابغى اخرب بيتها ارسلي رسايل يتحسب علي وقالي انتي تبغي تخربي بيتي والله العظيم ما ابغى اخربه
وخلاص تقريبا اسبوعين قطعت علاقتي فيه وندمانه مررره بس النوم مجافيني وضيقه بصدري تقطعني
امس قررت اكلمها وكلمتها قلت لها انتي زوجه فلان قالت ايه
قلت لها الله يسعدك ابغى منك طلب واحد بس ابيك تسامحيني
والمهم النقاش بيننا حاد قلت لها انا اكلم زوجك وغلطت ومابيك تدعي علي وتكفين سامحيني محد مايغلط وخير الخطائون التوابين
الحرمه مو راضيه تتفاهم معي تقولي لا وانا وش الي يخليني اصدق يمكن انك تبغي تخربي بيتي وتكذبي علي
تقولي اعطيني اسمك ووين ساكنه قلت لها انا مستوره وش تبغين فيني مو راضيه تتفاهم قالت انا ماراح اسامحك الا لمن تكلميه قدامي ويقول انا تبت وانتي تقولي نفس الشي
وحلفتها انها ماتسوي مشكله وتروح بيت اهلها وتحافظ على بيتها وقالت ابد والله ما اسوي مشكله ولا شي وراحت نادته وهنا الصدمه صرخ فيني وقال انتي مين انتي قلت انا فلانه قال من بنته اقول بس لاتتبلون على الناس ياحيوانه الله يبتليك بمرض قهرني دمعتي غصب نزلت يدعي علي وانا ماعملت له شي بس ابغى الحرمه تسامحني
والله مصدومه منه هذا هو الوديع الي لسانه كان يقطر عسل يدعي علي والله كم من وقفات وقفتها معه وكنت ادعي له كل يوم كنت اشوف الدنيا حلوه بس بعيونه
بس امس سبني ونكر ويصارخ قدام زوجته قال انا ما اعرفك يلا الله يبتليك بمرض خلاص فقدت الثقه في كل الناس
انا حاولت معها ماتفتح الموضوع له وتخليه بيني وبينها انا طلبت منها تسامحني بي مابي منهم شي بس رفضت ونادته
لو شفتوه كيف يصارخ علي خلاها غصب تصدق اني اتبلى عليه واكذب بالنهايه قالت لي لو انتي صادقه الله يسامحك دنيا واخره
ولو انتي كذابه الله لايسامحك
بس ارتحت بعد ماكلمتها انا ابغى ابدء حياه جديده
نوروني هل انا غلطانه او لا؟؟؟







انتهت المشكله





اعطوا البنت الحل هي راح تقرأ ردودكم ونوروها هي غلطانه ومتندمه حيل
ونفسيتها جدا تعبانه هل الني سوته صح انها كلمتها عشان ترتاح من تأنيب الضمير والتعب الي هي عايشته وعشان تسامحها وماتدعي عليها ومافي انسان مايخطئ والله يغفر في النهايه ويسامح
اترك لكم التعليق