مشكله ليس لها حل نتخيتكم تدخلون وتساعدوني

بسم الله الرحمن الرحيم
بصراحه انا مادري من وين ابدا حالتي النفسيه من سيئ الى اسوء لدرجة اني في اسبوع نقصت 5 كيلو تعباااانه حيل وصايره بس انام .. والسكوت والكتمان تعبني وقلت مالي الا الله ثم انتو ياخواتي تواسوني وتدعونلي دعوه بظهر الغيب
السالفه ومافيها ان ابوي الي كان بالنسبه لي كل شي واحسه احسن واحد بالدنيا قبل فتره انسجن:( بقضيه كبيره واعذروني ياخواتي ماقدر اقولها المهم المشكله عويصه مرا وانا من دريت وانا نفسيتي دماااار عماني ماقصرو ماشين فالموضوع والاجراءات وهذي مو مشكلتي ..
المشكله اني مصدوووومه بالواقع المر من بعد ماكنت بنت العائله المثاليه الي كلن يحسدني عليها يصير فيني كيذا اللهم لك الحمد والشكر على كل حال .. خايفه من كل شي من المجتمع والناس ونظرتهم خايفه اكثر شي على ابوي الله يحفظه ويهديه انه مايطلع وتطول المسئله .. صرت استحي من بنات عمي وقريباتي من بعد ماكنت كل جمعه موجوده فيها صرت اتهرب منهم مابي احد ينظرلي نظرة شفقه مع ان عماني وعود امي ان محد يدري بالموضوع بس عماني وامي واخواني ومتكتمين عليه بس ولو الخبر ينتشر ..
انا احس ان مستقبلي خلاص ضاع من بعد ماكان يجوني خطاب بالهبل وامي ترفض وتقول هذا دراسته ماتعجبني هذا بيسكنك عند اهله هذا امه مادري وش فيه وكانت شايفه نفسها فيني الله يخليها لي تحسيني البنت الجميله العاقله الهاديه كانت تخاف تعطيني واحد مايستاهلني ,, الحين بعد الي صار صرت احس معد احد يبيني ومستحيل احد يفكر فيني او يفكر يرتبط بعائله ابوهم كان مسجون بقضيه كبيره ,, لدرجة اني قررت اني خلاص ماتزوج واعيش لاهلي وبس ولااتزوج واحد فيوم من الايام يدري بالماضي ويعايرني ولا يقول كلمه تجرحني ويقلل من قيمتي..
همممم ياخواتي والله هم مايعلم به الا الله خايفه على اخواني على امي نفسيتها دمار مرا بس تنام ماتبي تصحى وتواجه الواقع ماتتكلم مع اني احاول اخفف عنها وللعلم انا اكبر اخواني واخواتي وعمري 22 سنه والمفروض اكون عون لهم .. بس اضعف غصب عني ماقدر اتحمل الي صاير.. اخواني الحمدالله نفسيتهم تقريبا مستقره وماشين فحياتهم ودراستهم يارب لك الحمد وامي الله يحفظها قايمه بدور الام والاب وتحاول ماتحسسنا ان في شي ناقص بس انا ارحمها مسكينه تتحمل وتتحمل الله يستر عليها من الضغط الي تعيش فيه اخاف يصير لها شي :44:
اخواتي كتبت مشكلتي والله يعلم ان محد يدري فيها بس انا كلي ثقه فيكم ابيكم تدعون لنا تكفون دعوه بظهر الغيب واليوم جمعه لاتنسونا والله نحتاج دعواتكم لعل وحده منكم دعوتها مابينها وبين الله حجاب

اسفه ع الاطاله والكلام الي ملخبط بس ربي يعلم بلي فيني جعلكم ماتشوفون يارب الي شفته من هم وضيقه