مصابه بفيروس بعمري وبحياتي ماسمعت عنه انتبهو منه ودعواتكم لي بالشفاء العاجل !!

السلام عليكم
ما ادري من وين أبدا ولا كيف ولا انا مصدقه وأحس اني بحلم لكن ما أقول الا الحمدالله على كل حال رضيت بما كتبه الله لي واسأل الله العلي القدير ان يجعله تكفير وتطهير وان يشفيني ويعافيني ويرفع عني الضرر وعن جميع مرضى المسلمين
العجيب كيف التساهل مع هذا المرض من قبل المسؤولين في وزارة الصحه وكيف لم يتم ادراجه من ضمن الفحوصات الضروريه قبل الزواج ولا لأن ضرره على النساء اكبر من الرجال ما اهتمو بالمرض وتركونا على عمانا ولا حتى كان في تحذيرات وتوعيه عن هذا المرض اللي بعمري وبحياتي ماسمعت عنه ولا فكرت اني بيوم راح اكون مصابه فيه
المرض هو فيروس الورم الحليمي البشري (HPV) مرض يصيب الأعضاء التناسلية للرجل والمرأه عن طريق تعدد العلاقات الجنسيه الغير شرعيه ومعدي وينتقل عن طريق الاتصال الجنسي وهو اكثر من نوع وهو من اهم أسباب سرطان عنق الرحم عند المرأه بنسبه كبيره جدا تصل الى 90% واحنا ياغافلين لكم الله
إصابتي بسبب زوجي انا اول ماتزوجته كنت احس بحبه صغيره بارزه عنده في العضو التناسلي بس ما اهتميت بعدين شفتها وفحصتها لقيته ثالول وعلى بالي انه شي عادي مثل الثآليل اللي تطلع في اليد يعني عاديه جدا وعلاجه سهل ومو خطير وكان الثآلول صغير مره بس بارز المهم عدت الأيام والشهور وحملت واكيد مع الحمل ضعفت مناعتي وانا من يوم تزوجت وانا عندي التهابات مو طبيعيه بعد الزواج وذكرت لي الدكتوره انه طبيعي بعد الزواج تجيك هذي الالتهابات المهم سويت تحاليل وطلع عندي التهابات وجرثومه لأول مره في حياتي وأخذت مضاد والحمدالله بعدها بشهر تقريبا جاتني حكه في المهبل في منطقه الشفرات واحمرار وألم وفجأه خفت وطلع مكان الحكه حبه صغيره فكرتها حبه عاديه واستخدمت غسول وحاولت انسى الموضوع قلت بتروح من نفسها ومع الوقت زادت الحبه وصارت بارزه وكأنه فطر وكبرت وامتدت وانفجعت وفحصتها بنفسي استغربت انها ثالول وكان كبير وممتد وتضايقت من شكله وملمسه بعدين طلع في الجهه الثانيه من الشفرات صغير وجالس يكبر الان وبعدها دخلت النت وابحث وانفجعت انه خطيره ومالها علاج وتسبب سرطان وعرفت اني اخذتها من زوجي ورحت مثل المجنونه ادور وابحث وكل اللي طلع عن هالثاليل شي يخوف ويخلي الواحد ينهار ومراجعتي مع الدكتوره عشان الحمل في العسكري قريبه ورحت وقلت لها عن المشكله قالت لازم كشف وكشفت من تحت وتضايقت لما شافت وقالت زوجك لازم يعالج وأخذت من عنق الرحم عشان تحليل وقالت مره ثانيه زوجك خذيه لدكتور جلديه يكشف ويعالج نفسه ولما تطلع تحاليلك تعالي ونشوف وش اللي نقدر نسويه ممنوع الجماع ولو حصل لازم وااااااقي ورجاء نبهي زوجك ويمكن تولدي قيصري بسبب هالثآليل بصراحه خفت بس وجهها كان مايطمن
انا عرفت انه من زوجي وانا لي 9 شهور متزوجه وبحياتي ماجاتني التهابات بهالشكل ولا ثاليل والمشكله فحوصات زوجي كانت سليمه وانا الحمدالله بس للأسف انه هذا الفيروس مايبين في الدم لازم أخذ عينه من مكان معين وتحليله طبعا زوجي حامل للفيروس بس هو خامل عنده شكله من فتره طويله لكن انا لما أخذته صرت انا الضحيه صار نشيط عندي لاني حامل ومناعتي في اقل درجاتها انا ما أشك في زوجي وأعرفه زين انه مايخوني ولا عنده علاقات بعد ماتزوجني لكن الحقيقه ما ادري اذا قبل كان في علاقات الله أعلم انا مايهمني وش كان قبل يهمني الان وواثقه تمام انه الحمدالله ماعنده لف ودوران من تزوجني لكن اللي يهمني انه للأسف هو حامل للفيروس وانا أصبت فيه كان لازم فيروس مثل هذا مايترك بدون تنبيهات وانه ضروري يتم الفحص عنه للمقبلين على الزواج ويكون اجباري بعد انا أخذت اقرب موعد له مع دكتور جلديه شاطر خلال هاليومين والمشكله انه زوجي مو مقتنع انه هو اللي مصاب وانا اللي أخذت العدوى يقول لا مافيني شي وقلت هذا اللي في العضو عندك ايش ؟؟؟ قال حبه عاديه قلت اوكي الدكتور يحدد لكن الان مو وقته نقلبها محاكمه الان احنا مصابين لازم نتعالج فكر في العلاج قبل لا اروح فيها انا والجنين
طبعا انا منهاره لانه مكتوب ورم وانه في كم نوعه منه سرطاني وانه ماله علاج بس له لقاح يخفف ويعتمد على مناعة الشخص وانه يأخذ مده طويله للعلاج
انا تعبانه من الموضوع ومتماسكه لحد الان من برا لكن من جوا انا جالسه أتقطع ابي ابكي ابي ارمي نفسي في غرفه واقفل الباب مو اعتراض على ماكتب ربي ولكني انسانه وضعيفه غصب عني الموضوع خطير الله يكفيني شره ويرزقني العافيه والشفاء منه
نصيحه لوجه الله لا تتهاون اي وحده في الكشف على الجهاز التناسلي ولا تتساهل مع زوجها وخصوصا اللي على وشك زواج لازم تطلب من خطيبها يفحص عن هالفيروس لانه خطير ومايبين ممكن يجلس عشر سنين خامل وفجأه تضعف المناعة يطلع والمصاب فيه ينقل لأي احد عن طريق العلاقه الجنسيه ويمكن مايكون له أعراض ولا يدري أساسا انه مصاب لذلك انتبهو يابنات على انفسكم واذا في اي وحده سمعت عنه او عن احد مصاب فيه وتعالج تفيدني الله يبعده عنكم ويرزقكم الصحه والعافيه دعواتكم ان الله يشفيني منه وأولد بالسلامه ولا يضيع التعب