مصره على الطلاق والسبب ..

السلام عليكم ..
كيفكم بنات ..
بدايه انا عمري21 سنه والحمدلله جميله جدا جدا وهالكلام من وانا صغيره اسمعه مو بجديد
وعلى كثر ماجاني خطاب الا ان حظي نحس مدري كيف اوصفه لكن هذي اراده ربي فوق كل شي والنعم بالله

انا تزوجت شخص بارد ي بنات وكتوووم بدرجه كبيره يعني اذا كشخت جيت بروح عرس مايمدح رغم انو كل من شافني قال ي حظ زوجها وربي وربي حتى احظان ... الخ مافيه احاول اخلق جو بعض المرات مافيه احساس مره معدوم


لي سنتين تقريبا ع هالحال ومابينا عيال العام زي هالوقت كنت متهاوشه معاه وزعلانه عند اهلي وجاني يبكي ويقول فقدتك ومدري وش الزبده والله اني حسيت انه فيه احاسيس لكن مايطلع رجعت معاه وبدون شروط او شي تنازلت عن كل شي اول ماشفت دمعه من عينه قلت خلاص طلع يحس واستانست بالرغم من انه مد يده علي


وانا اول الشهر هذا جيت لاهلي وقعدت عندهم اسبوعين خلال هالاسبوعين قاللي بيروح دبي عشان بيشتري سياره قلت له اوك انا واثقه فيك وانتبه ع نفسك وربي ماطرالي انه بلحظه بيخيب ظنوني الزبده اول ماجا السعوديه قال ابيك يومين اتمشا معك بالويك اند وبعدها بيرجع دوامه بجده لاني بالرياض مع اهلي
رحت معاه وكلي امل انه مشتاق لي وماطلب شوفتي الا من حبه لي اول ماشفته مافي اي شي يدل على انه مشتاق حتى يديني بالسياره مامسكها مغير ساكت قلت معليه اول ماوصلنا الاوتيل راح بدل ونام ع طول انا هنا احس فيه شي داخلي مات وربي قلبت ع الجهه الثانيه وقاعده ابكي بصمت ليش يتجاهلني لي اسبوعين اشتاقله وهو ماحس وربي شعور مؤلم مره مره

اليوم الثاني طلعنا من الاوتيل تمشينا وبعدين قعد يوريني صوره بهالبلد اللي راح له قعدت اقلب بالصور شفت له صور وهو يشرب تخيلو 7 قزازات سالته لحظه هذا شراب ولا يتهيا لي قام يضحك قال ايه قلت بعد مصور مفتخر ليش تصور قال احطها بالواتس بوري اخوياي انا مسكت نفسي قعدت اقلب لين مالقيت صوره له وهو فاقد ومصور مقطع فيديو وهو منتهي وطايح وبالسينما كمان انا هنا ماتحملت اللي شفته وربي اني بكيت بدون مدري شوي الا قال ليش تبكين مارديت عليه ورجعنا الاوتيل ع طول وربي ماطيب خاطري بكلمه وحده ولا مسح معه من عيني مغير يعلي صوت الاغاني

حسيت اني ذابله ومهمله احبه ومادرى عني وي ليتني شينه ولا عاديه اقسم بربي ي بنات تقدملي قبله 9 خلال سنه وحده بس لكن ليش حظي كذا

رجعت الاوتيل وقعدت ابكي في شي داخلي مجروح وكل مايشوف اهماله وعدم مبالاته بدموعي يزيد ينزف تخيلو قعد مع الجوال للصباح وانا قاعده ابكي نمت والمعه بعيني وماسال فيني قررت اني ماعاد اصبر وبطبلالطلاق فوق انه مايحس طلع يشرب وقعدت ساكته ماكلمته لين ظهر اليوم الثاني كان المفروض اروح لاهلي لبست وكشخت عشان اهلي مايحسون ونفس الموال كان ساكت مانطق بحرف حتى بالسياره اول ماوصلت ارسلتله طلقني انا عفتك واحنا جد ماعاد ننفع لبعض ومارد على رسالتي ولا شي


تخيلو مر على هالسالفه 3 اسابيع من يوم ارسلتله الرساله والى الان مافكر يرد عليها ولا فكر يزورني ولا يسالني تبين شي ولا محتاجه شي ولا فكر يراضيني رغم انه كان بالرياض الاسبوع اللي فات جاني خبر من زوجه اخوه لكن مافكر يجيني


الزبده ي بنات لو اي وحده فيكم ايش بيكون موقفها وابيكم تحكمون على هذا الشخص انا تعبت من بروده والله ماتزوجت وانا صغيره الا ابي انسان يغنيني عن الناس كلها لكن للاسف خيب كل توقعاتي

اسفه طولت لكن حبيت اطلع اللي بقلبي واشوف ردودكم وانا مصره ع الطلاق وربي مارجعله ولو رجعت كاهو بالهين بطلع عيونه وبيكون طريق الطلاق اسهل له من طريق الرجعه لكن ..

ابي دعواتكم لي وابي ارائكم انتظركم ..