مصروف معدوم

قصتي قصة مع المصروف
أساساً انا زوجي مايصرف علي
واذا اعطاني مية مقابلها ياخذ الف
تقولون كيف انا مدرسة مع وقف التنفيذ يعني استثنائي اربع شهور بالسنة والراتب ست الاف واذا الشهر ناقص ثلاث الاف يعني اجمع هالمبلغ ويطلع حوالي واحد وعشرين الف طبعاً زوجي مو متوظف بس عنده أعمال حره بالسيارات ودائماً يشتغل بالسر عشان ماعرف وش عنده والظاهر الي اشوفه ماعنده شي اجي بنت الحلال انا اصرف على ولدي من ملابس وغيره واصرف على نفسي ويجي ابن الحلال والشين طول السنة يصير هذا زينه ودلع وحب ورومانسية وبعده هالفلوس بكره يروحن على الفاضي تلعبين فيهن المهم الاخت تعطيه نصف المبلغ الي ادخرته بشرط اذا احتجت لمصروف يعطيني واذا مامعاه لو يتسلف عشاني وخوذوا من الكلام الزين وابشري وروحي يالهبلة واشتري له جوال وساعة هدية من الفرحة الرجال تغير وطبعاً فترة التدريس كنت عند اهلي اذا جانا عطيني مصروف بنزين وغيره كثير
المهم رجعت لبيتي وبدت المصاريف مصاريف البيت من اكل وشرب ومصاريفي الخاصة واول ماجيت كان معي مبلغ وصرت اصرف ولا اساله يجيب شي الا ان مابقى غير الف ريال بالحساب خليتهم عشان الحساب ما يغلق وعرفت ان هو عنده مبلغ بالبنك تخيلوا ياخوات جاني يبي بطاقتي الصراف يبي يسحب هالالف يابن الحلال خلها لي تمسك الحساب عشان مايغلق ورح اسحب من الي عندك قال لا انا حالف ماصرف ولا ريال من الي بحسابي الا ان اضبط لي مشروع عشان يدخل علي وبعدين الف ريال لاتقدم ولا تاخر قلت تقدم وتاخر عندي على الاقل لاحتجت شي دبرت نفسي فيهم تصدقون ماخلاني الى ان أخذ مني بطاقة الصراف وسحب هالالف انا كل ماذكر هالسالفة انقهر لانه صار غصب من علي مع اني قبل كذا عطيته نص الي ادخرته وماعمري سالته عنهم لاني عطيته عن طيب خاطر
المهم الاخت فلست ولاريال تعال يالزوج نبي مصروف مامعي شي شهر فات الشهر الي بعده مافيه شي
طبعاً اغراض البيت تعرف على صاحب بقالة وياخذ منه بالدين وبعد شهر يسدده تدرون ليه لان زوجي عنده فلوس طبعاً انا زعلانه منه لي اسبوع وماكلمه ولا يكلمني ولهذا سمعته يقول لوالدته انه امن المشروع الي يتمناه
وامس يقولها انه اشترى ناقة عشان حليبها ودائماً يدخل وهو شايل الاغراض من ملابس وكماليات لنفسه وانا الي اجيب واهدي له ماعمره دخل علي شي
اكثر ماقهرني اليوم توزيع المصروف على اهل البيت وانا اشوف ومايحصل لي شي
والي يقهر انه قادر يصرف علي ويدلعني بس مادري ليه رافض
نفسي ادعي عليه بس اوفره لقهر اكبر
طبعاً انا لي ثلاث سنوات معاه السنتين الاول كانت اكثر مشاكلنا على المصروف وانا ماكان عندي هالدخل بعدها بدا عمي يصرف علي كان يعطيني كل شهر مالا يقل عن الاف وخمسمية ويقول هذا لك ولولدك وكان يوصيني ماعلم زوجي اكيد كان عارف انه لو يدري بياخذهم مني وسويت وصاة عمي وهدت مشاكلنا بس هالمصروف ماكمل خمس شهور الا وانقطع لان عمي توفى الله يرحمه ويدخله فسيح جناته
تكثر مدامعي :06:يوم اتذكر كلمته على بناته وهو يشوفني ايام مرضه ويقول ماني راحم غير هذي
ومن قصص زوجي الي ماتنتهي ان والدته يوم عيد الاضحى اعطته مبلغ عشان يجيب لها الضحيه وراح ابن الحلال ولعب بفلوس امه وترجع على راسي دبريني الادبرين لي فلوس ويتصل عليه واحد يبي منه سلف خمس مية ويقوله ابشر وهو مامعه ريال للعيد المهم انا تسلفتهم من زوج اختي الف وخمسمية وعطيته وقلت له انا تسلفتهم يعني لاصار معاك ارسلهم لاختي على طول ولا عطتنيهم وشهر وشهرين والرجال ماحوله احد واروح وادفعهم من الراتب وبعده بعد بشهرين يقول ان الرجال سدده وهو صرفهم على حاله طبعاً هو علمني من هذا درس ان ماتسلفله ريال لو يعمل الي يعمل
المهم انا الحين بقمة القهر على هالعيشة اخته والده من اسبوعين ومامعي الي ازورها فيه
طبعاً انا ماراح اكذب عليكم انا من تجربتي معاه خلتني حريصة اذ اني ادخرت الي بقى من راتبي عند امي خاصة ان مابقى غير شهر عن العطلة والمناسبات فيها بالهبل بس هو مايعرف هالشي لان احس انه ينجن اذا عرف ان عندي مبلغ
وانا نفسي ان هو الي يصرف علي ويامن جميع متطلباتي الخاصة
حالياً ان صرت اشوف الشغالات حالتهم احسن من حالتي على الاقل لهم راتب أخر الشهر اما انا اكرف وانظف واغسل واطبخ واربي ولا انا بمرتبة زوجة ولا بمرتبة شغالة
بس ماقول غير حسبنا الله ونعم الوكيل عليه وعلى امثاله
انا اسفة طولت عليكم بس ابي اطلع الي مكبوت جوء وارتاح :44: