مصلى النساء ودورة المياه السهل الممتنع

أبو سليمان : ياولد يا هيه يا هيش

أم سليمان : سم سم يابو سليمان

أبو سليمان : باب الحريم عنده حرمه افتحي لها

أم سليمان : من هي الله يحييها

أبو سليمان : عابرة سبيل تبي تصلي، و انا مع زوجها عند الباب حتى تخلص لأنه عيا يقلط

فتحت أم سليمان للمرأة و قادتها الى غرفة استقبال النساء

أم سليمان : هذي والله الساعة المباركة يا أختي، هذي دورة المياه و هذا المجلس وفيه الجلال والسجادة وانا بروح ازهب القهوه

المرأة : لا يا أختي مشكورة ، زوجي مستعجل و بيتنا بعيد وعيالنا ما عندهم احد

أم سليمان : صلي ويكون خير

ابو سليمان وزوج المرأة يتجاذبان اطراف الحديث

الرجل : والله لولا أني خايف تفوتها صلاة المغرب كان ما اشغلتكم

أبو سليمان : وش اشغلتنا فيه الله يهديك، الا هذا التصرف الحكيم وليت كل الناس مثلك

الرجل : مسجدكم قريب من الشارع العام وفيه قسم مخصص لصلاة النساء قد صلوا الأهل فيه في رمضان ولوحته توها مجددة في هالرمضانية

ويوم نزلت الأهل لقت الباب مقفول مير اقول لها خليني الحق الصلاة مع الجماعة بدل ما تفوتنا كلنا

أبو سليمان : اشوفك كلمت الإمام عن الباب المصكوك

الرجل : نعم كلمته ولكنه اعتذر بان مصلى النساء في رمضان فقط

أبو سليمان : منتب اول واحد يكلم الإمام عن هالمصلى

الرجال : يا أخي هذا مسجد قريب من شارع عام و الذي بناه خصص فيه مصلى بدورات مياه للنساء فلماذا يستغل مستودع او سكن عمال او يترك مهجور والنساء بامس الحاجة له

أبو سليمان : انا اعرف اللي بناه الله يرحمه، كان حريص جداً على مصلى النساء و العناية به و بدورة مياهه

الرجل : اشوف الأهل طلعت، جزاك الله خير

أبو سليمان يدخل منزله ويناقش الموضوع مع أم سلمان والأسرة

أم سليمان : قل لإمامكم الله لا يهينه يفتح مصلى النساء او يشيل هاللوحة

أبو سليمان : إمامنا رجل فيه خير كثير وحريص على نفع المسلمين لكن ما عرفت سر إصراره على إغلاق مصلى النساء

فضة : انا اعلمك يا خال، كثيرات من النساء الله يهديهن ما يهتمن بالنظافة وتلقى دورة المياه عقبها ينخش عنها الوجه ويمكن تحضر معها أطفالها، وفرصة لتغير الملابس واللي منه

أبو سليمان : يمكن هذا السبب لكن اخذ المحسن بجريرة المسيء والتضيق على المسلمين لا ينبغي

أم سليمان : سواء كان هذا السبب او غيره لازم يشيل لوحته الله لا يهينه ويخليها عنده من رمضان لرمضان

أبو سليمان : لو أن الحكومة خصصت دورات مياه في كل شارع رئيسي ولو برسوم لما تضايق القائمين على المساجد من الزحمة على دورات المياه

أم سليمان : اشوف صرت تشجع على الرسوم ما انذبحت منها

أبو سليمان : الرسوم ولا الفضيحة في الشوارع و الخربات

فضة : اذا اردت ان تطاع فأمر بما يستطاع و ترى مهوب كل الناس يقدرون على دفع الرسوم

أبو سليمان : اشوف طلعنا عن الموضوع

أم سليمان : الزبدة ان تصرف الأمام ما اعجبني ابد ابد، كلش تقفيل في تقفيل، عسى ما يقفل المسجد عنكم

نور عيني : ماما انتي في يبغا انا

أم سليمان : ايه، نضفي حمام النساء وقفليه وقفلي مجلس النساء ورجعي لي المفاتيح :)

موضوع قرأته فأحببت أن تشاركوني في متعة قراءته
للأخ ضحية صمت