هلا بنات احد فيكم راح لمطعم الرز المحترق وش رايكم في اكله واسعاره هههههههههههههههههههههههههههههههههه متأثره بطاش ما طاش الى الان ما نسيت اسم مطعمهم


فيه مطعم فابيانو بشارع التحله اكلهم ايطالي ساااااااااااااامج ما فيه طعم وعلى بالهم مسوين حركه جديده البطاقه اللي تطلبين فيها والله مهوب يم سالفه حتى قعداتهم كئيبه ما انصحكم فيه

بس فيه مطعم دايموند اكلهم صيني وجلساتهم رومنسيه بشارع التحليه بس اذا رحتو له تمسكي ف ابوعيالك زين لاتضيعينه بالظلام
والا اخذوا معكم كشاف
عيبه الظلام حالك وانا ما احب المطاعم اللي كذا حتى الاكل ما تشوفينه زين اجل وشلون اقوم بمهمة التفتيش على غلطاتهم هههههههه الاخت جايه من البلديه

عموما اللي معها بشكه يعني على بلاطه عيالها كثيرين تروح لمجمع وتنثرهم وكل واحد يختار نوعية اكله وخلي الرومانسيه باوقات ثانيه ما فيها مبزره
وباي تو صفولي قهوة البيت اللي قالت عنه الاخت انه بثاني غرفه ببيتهم بحي البديعه علشان باروح له يا ملحكم يا اهل البديعه والله قهوتكم اطلق من مليون كوفي بالعليا

ايه نسيت اقولكم ترى حديقة الشاي ما عنده ما عند جدتيي واكلهم عادي وهو قديم من عصر الفين وحطبه سنة عرسي كخخخخخخخ وبحلو بانفسهم كل يوم يغيرون فيه يبونه يتميلح بس ما قدروا ازين مافيه الوان كراسيهم واشين ما فيه القعدات حقتهم كلها ستاير تقل شراع اهل الرياض في طاش ما طاش لاراحو على بحر جده وبلشو ا بانفسهم وسكروا من جميع الجهات علشان لا احد يكشفهم

على فكره من اللي جربت اكل مطعم دوسا عسى الاسم صحيح لا اكون نسيته المهم اللي بطريق الملك عبدالله اكلهم زين ووش نوعية اكلهم ونظيف او لا

مطعم دوسا الي بطريق الملك عبدالله اكلهم هندي
انا مجربته كذا مرره حلو ونظيف بس المكان عادي مافيه فخامة

تبين البوفيه يكون مفتوح كل يوم مااعتقد
اغلب المطاعم بوفيهاتهم المفتوحه تكون غدا يوم الخميس او يوم الجمعه او اليومين مع بعض
عموما عندك مطعم عبدالوهاب في شارع التحليه وفي شارع الثلاثين ست الشام
والتحليه فيه برضو الريف اللبناني وكلهم قريبين من 4 سيزن

مرحبا بنـات...
سؤال...أنواع القهـوة فيه بارتيشن....؟؟
..............
فيه احد مثلي...مدري ليش ما احب اروح مطاعم مع سواق..؟؟ احس بتقطر سعابيلة:)

الله يعافيكم يابنات على هالموضوع الحلو

وابي اسأل البنات الي راحوا للكوفي الموجود في سكاي تاورز كيف اسعاره هل غاليه ولا مناسبه وهل هو مسموح دخول الأطفال اولا وهل فيه مصخرة بنات زي توتي كافيه الي في التحليه

ادري زودتها بس انتم قدها

وشكرا