مطبق بعجينة السمبوسة....

السلام عليكم ورحمة الله وبركاته :

اسمحوا لي يابنات هذي أول مشاركة لي في هذا القسم وان شاء الله ما تكسفوني

ا نا سويت المطبق بعجينة السمبوسة وطلع معاي زي الجاهز بالضبط

حاولي تختاري عجينة مزيتة شوي انا اخذت عجينة اسمها دلتا وطلعت روعة معايا

شوفوا الطريقة
تاخذي اثنين من الرلقاق وتحطيهم بالطول جنب بعض وتكوني حاطة الطرف على الطرف وياليت لو تدهني الطرف دهنه من البيض عشان يلصق وبعدين تحطي اثنين من رقاق السمبوسة بالعرض يعني كانك تسوي علامة +

ولاتني انك تدهني بالفرشة بيض في الوسط قبل ما تحطي الرقاق بالعرض عشان يلصق بس دهن البيض يكون خفيف جدا يعني مسحه

بعدين تحطي الحشوة في النص مكان تقاطع الرقاق

والحشوة بالنسبه للمطبق المالح راح أقلكم عليها تجيبي حزمة كراث وتغسليه كويس وتصفيه من المويه بعدين تقطيه صغير جدا

وتكوني عاملة اللحمم المفرومة لحم وبصل ووفلفل أسود وملح أو البهارات اللي تحبيها

بعين تخلطي لحم مفروم مع كراث وانتبهو ان الكراث يكون أكثر من اللحم المفروم يعني حاولي تكثري الكراث

وبعدين حطي من هذا الخليط شوي في المربع اللي في النص اللي يغطي المربع بس لا تكثري

وبعدها وهذي النقطة جدا مهمة اكسري حبه بيضة في الصحن ولخبطيها بس شوي بالشوكة يعني يدخل البياض في الصفار عشان تفضل لزجة وما تكون سايلة لأنها لو كانت سايلة راح تخرج برا حبة المطبق

وبعدين حطي البيض بالملعقة على وجه الخلطة لا تكثري ومو ضروري الخلطة تاخذ بيضة كاملة وبعدها رشة ملح وبهار فوق البيض

انتبهوا ولا تكثروا الخلطة من جوا , بعدها نجي لطريقة تقفيل المطبق

شوفوا أول شي ادهنوا الأطراف بالبيض يعني بس مسح وبعدها تاخذوا واحد من الأطراف اللي من تحت يعني من الرقاق اللي كان تحت اول شي وبعدين اللي في الجنبين وبعدين اللي من تحت الاخيرة وحاولوا وانتو بتقفلو شدوا شوي عشان مايطلع البيض

ونسيت ما اقلكم حاجة احيانا تكون العجينة قصيرة شوي زي عجينة دلتا مثلا انا حطيت نص حبة الرقاق في النص فوق البيض وبعدين قفلت لأنه يفضل فراغ مفتوح واللي عجينتها طويلة تحاول تقص منها, وأحيانا تكون العجينة طيلة بالمرة زي الرقاق البلدي ومرة كان عندي وحطيت ثلاثة بالطول وثلاثة بالعرض

بعدين تدهني الصينية زيت وتحطي حبة المطبق فيها بس كيف تحطيها ؟؟
تشيليها بالملعقة المسطحة وتتقلبيها يعني مكان ما قفلتي المطبق يكون من تحت في الصينية عشان ما تتفكك وبعدها تدهني الوجه زيت

تخبزيها في الفرن ولما تستوي من تحت وتحمر شوي تقلبيها على الوجه الثاني ولما يحمر الوجه الثاني شوي تخرجيها من الفرن وتعصري عليهاشوي ليمون وتحطيها في الحافظة
عشان تنكتم وتصير طرية ( القدر اللي يحفظ الحرارة )

لا تولعي الفرن من فوق يخلي المطبق ناشف
وبعدين المربع الكبير يتقطع اربعة مربعات وتقدمي معاه الليمون والفلفل الأخضر
بس والله يا بنات انا احيانا احط الفلفل الأخضر في الخلطة

وعلى فكرة ممكن الخلطة تكون كراث وجبن بيضاء والبيض عشان يخليها تتماسك عشان كدا لا تكثروا البيض

وكمان ممكن مطبق حلو تهرسي موزة بالشوكة وتحطيها في النص وتحطي سكر فوق الموز شوي وفوقها شوي بيض مثل اول
بس اهم شي انه يفضل شوي في الحافظه على الأقل ربع ساعة

وعلى فكرة يا بنات انا لما يجيني ضيوف اعمل عشرة حبات مطبق مع بعض في صينية الفرن الكبيرة المستطيلة واكون خلصت قبل ما يجوا الضيوف واخليها في الحافظة ووقت التقديم اطلعها من الحافظة وتفضل حارة زي ما هي

وممكن الحشوة تكون قشطة مع شوي سكر وممكن تكون جبنة بلدي الحلوة مع شوي سكر وبيض وممكن موز وقشطة وسكر شوي والبيض ولو شوي هيل يعطيه نكهة


واللي عندها حشوات ثانية تقول لنا وانا زوجي طلب مني حشوة بالتونة بس ما عرفت اللي عندها حشوة بالتونة تقول لي

وسووها وقولوا لي رأيكم وانا حاضرة لأي سؤال..

وان شاء الله تعجبكم..

اختكم قرقورة ,,