مطلوب حلول لرد المياه الى مجاريها بعد الزعل

ادرى ان الموضوع اصبح مكرر .... لكن فعلا موضوع احنا المتزوجين الجدد محتاجين لخبرتكم ولتجاربكم ارجوكم لاتبخلون علينا فيها لان احنا بامس الحاجه لها .....

يمكن من تزوجت واحنا يوم والثانى بزعل رغم انى احب زوجى وايد وايد وسعيده وايد انى الحمدلله حامل منه رغم متاعب الحمل اللى مخليتنى اكرهه روحى ... مره اراضيه ومره يراضينى وماشيه بس اغلب زعلنا بسبة انه يطلع كل يوم ويتركنى بين 4 حيطان بروحى اكلم نفسى واقعد ابجى من القهر لانى ماتعودت على هالشى ويراضينى يوعدنى ان راح يحاول يتغير بس المسأله محتاجه لى وقت ويرد اليوم الثانى كأنك يابوزيد ماغزيت زوجى من النوع اذا طلع ينسى نفسه يعنى ممكن ينام طول اليوم بعدها يطلع الساعه خمس العصر مايردلى الا الساعه وحده بالليل وانا قاعده اكلم روحى بالبيت ماقدر اضحك بويهه ولا اسوى جنه شى ماصار ماقدر ... انا ماطلبت منه يغير سستم حياته علشانى ولا يترك ربعه واهله بس هم انا لى حق فيه وعليه لا وساعات يطلع ولما يرد مبجر عقب 4 ساعات استانس علبالى بيطلعنى اثارى يكون راد علشان يبدل ملابسه ويكمل السهره بره البيت ... وطبعا ممنوع اطلع بره البيت الا معاه او مع امى (ومصيبتى انى فى بيت اهلى اطلع واروح وارجع ومحد يقولى وينج فيه وبالوقت اللى ابيه بس الحمدلله طول عمرى قد ثقة اهلى فينى لله الحمد فا صعبه على هالحبس) لدرجة انى بديت احس ان بيتى سجن كبير انا ماراح اجذب واقول انه مايخلينى اطلع بالعكس حتى واحنا متزاعلين لوقلتله بروح بيت اهلى عقابه الوحيد لى انه يقولى روحى بسيارتج يعنى يعاقبنى انه ماراح يوصلنى بس يخلينى اروح بس مادرى ليش حتى اليوم اللى اطلع فيه من ارجع شقتى احس بقامت واحس ان الشقه تخنقنى كرهتها .........

وفيه شغله غريبه اذا طلع ياويلى اذا سألته وينك فيه يعتبر هالسؤال كأنه امر!!! استفسار يعتبر عنده امر ممنوع منع بااااات اسأله هالسؤال عيل شقول!!! والله تلاقونى اذا اتصلت اكسر الخاطر الف وادور علشان اعرف وينه فيه جنى قاعده ادور على فضولى .....

آخر زعله لنا كانت يوم الاحد .. يوم السبت كان مونايم زين وداوم الاحد دوامين صبح وعصر وطبعا عقب ماخلص دوامه مارد البيت من كراج لى بطيخ علشان اذا رد البيت مايبى ينام ويخرب نومته ... وانا ياتنى حاله غريبه ذاك اليوم الترجيع ماوقف عندى بالمررررررره طول اليوم ارجع بشكل غريب كنت احس انى بموت زهدت الدنيا كلها وكرهت البيت وكل شى اتصلت فيه وعرفت انه بالكراج ترجيته يمرنى البيت يطلعنى شويه لوساعه بس اغير جو يمكن يوقف الترجيع قالى اوكى اشوف اخلص السياره وامرج انا طبعا ماصدقت خبر لبست وتزهبت جنه صج مرت نص ساعه ..ساعه...ساعه ونص مليت قمت واتصلت فيه جان اقوله ماخلصت السياره قالى انا موبالكراج انا بالدوانيه !!! بغيت اموت من الحره والقهر لحظتها سكرت التلفون وقعدت ابجى بجى رهييييييب انا ادرى انه الاحد عنده دوانيه بس انا ماطلبت منه يهدها بس ساعه ساعه يطلعنى اغير جو ويردنى الدوانيه ماراح تطير انا اللى بانتهى من كثر مارجعت ... انصحتنى رفيجتى اروح بيت اهلى احسن من القعده بروحى اتصلت فيه وقلتله بروح بيت اهلى وانا موطايقه اسمع صوته قالى روحى واهوه يضحك انفجرت زياده لانى كنت فعلا بعالم ثانى وسكرت التلفون من غير ماقول مع السلامه طبعا هاذى الطامه الكبرى بالنسبه له ومحذرنى منها من قبل بس انا ماكنت بحاله طبيعيه او بوعيي انتو تدرون المرأه والحمال والنساة اشلون تكون ...أنا من كثر الزعل حسيت انه مايحبنى وحسيت انى اكرهه والعشره بينه مستحيله ومابقا فكره سوده براسى مافكرت فيها وقررت انى ماكلمه مده طويله اقل شى اسبوع ومابى اسمع صوته ولا اشوفه ... طبعا اخينا بالله مايعترف انه غلطان ولقا حجه يزعل على فيها ويحول السالفه لى صالحه بس انا مليت من اسلوبه انه يحول كل زعله بينا لصالحه وعلى قولتهم خدوهم بالصوت ... اليوم الاول مر واحنا مانكلم بعض اليوم الثانى لا العصر راح نام بالصاله امس اطين واطين اخذ الفلات وفرشله بالغرفه الثانيه يعنى باختصار شديد طول اليوم يادوام ياطالع واذا رد البيت راح نام بالغرفه الثانيه ...طبعا حدث ولا حرج كلامى كله راح بالهوا وماصبرت على هالسالفه لانى شويه هديت بس ماراح اعتذر لانى موغلطانه اهوه اللى كشت فينى ... لما راح نام بالغرفه الثانيه نطرت ساعه وقلت سوى روحج سنعه ووديله اللحاف اثارى كان الاخ ماخذ معاه الحاف بعدها استجمعت قوتى وقلت بقوله يرجع الغرفه واذا قالى كلمه شويه جارحه بتحمل ولما دخلتله كان توه نايم بس ردة فعله كانت اقوى من انى اتحملها طردنى ورد على باسلوب اكثر من جارح ماتحملته الدرجة انى ظليت واقفه من الصدمه لانى اللى طلعت من الغرفه ولانى اللى تخانقت معاه ورحت غرفتى وظليت ابجى لى الصبح ........ اليوم الثانى كان دوامه عصر وماقام ييت على نفسى ورحت اقعده مارد على وثانى مره عفس ويهه وقام يتأفف وحسيت شويه ويكفخنى تندمت حيل انى رحتله ورديت ابجى طبعا اهوه معاقبنى امس واليوم وماخلانى اطلع علشان بنظره انه قاعد يأدبنى .....


ادرى طولت وزهقتكم بس شسوى اسلوبى جذيه لازم التفصيل الممل .........
انا صعب اروحله بعد لانى لايمكن اعتذر على شى ماسويته حتى لوكنت مسكره التلفون هاذى ردة فعل ووقتها كنت مو فى وعيي ... ورحتله مرتين وطردنى يعنى لايمكن اروحله بعد ... وموقاعد يصير بينا احتكاك ياطالع يانايم بالغرفه الثانيه ...... زهقت لى متى على هالحال كنت ابيها مده طويله بس لما هديت حسيت انى ماقدر اعيش من غيره رغم كل الكلام اللى قلته زوجى اكثر من طيب ومدللنى ومومخلى على قاصر بس بسالفة الطلعه اللى مطلع روحى واهماله... بس لما يعصب يصير وحش يخوف وعنيد حيل وحتى الاعتذار مايتقبله ... بديت ايأس واحس انى زعلتنا ماراح تنتهى.......

ارجوكم محتاجه خبرتكم ..... شنو الطرق او الخطط اللى سويتوها وانجحت خصوصا بحاله متأزمه مثل حالتى ... بس ارجوكم لاتقولولى حطى هديه وورود وبطيخ واوراق حمره وزرقه ونثرى اشياء فى البيت زوجى ماتنفع معاه هالسوالف واهوه معصب راح يدقرنى اكثر خصوصا انه راعى قنص وبر ماتنفع معاه هالسوالف الا اذا كان مزاجه رايق.. ابى حل عملى مو حالم ... رفيجتى انصحتنى اكتبله رساله اقوله عن مشاعرى انا قررت اسويها بس ماراح اعطيها له لانى لو سلمتها له علشان يقراها ماراح يتقبلها وراح يكشت بكتبها وبخليها يمى بالسرير وبروح ازور اهلى يمكن يدخل الدار ويقراها يعنى كأنى مومتعمده احطها له بس المصيبه اذا ماأثرت فيه او ماقراها ........ علشان جذيه ارجوكم ساعدونى انا بروح الحمال بيقضى على موناقصه بوالشباب بعد وعناده