مظلومة وقلبك محرووووووق تعالي شوفي حكايتي

السلام عليكم ورحمة الله وبركاته

بنات انا لاحظت هنا مواضيع كثير لبنات يشكون الظلم وقلوبهم محروقة ورديت في بعض مواضيعهن بنصيحة انا جربتها وشفت اثرها كثير وعلشان توصل لاكبر عدد قررت كتابتها في موضوع مستقل واسمحوا لي عالكتابة باسلوب عامي وبسيط علشان توصل للكل


افضل حل وقت الظلم (((( تدعين لنفسك ))))) إي نعم تدعين لنفسك لان الدعاء وقت الظلم يكون مستجاب فاستغليه لك افضل

انسي او تناسي الظالم ووظفي الموقف لصالحك

انا قبل كنت احسبن ثم صرت ادعي لنفسي فقط باللي ابيه

وغير كذا دعيت او ما دعيت الظالم راح يرجع له ظلمه وبذكر لك قصة صارت معي تؤكد هالشيء

والله العظيم ان وحدة ظلمتني وانا غافلة وفوق هذا كنت اظنها تدافع عني لو احد ظلمني فيوم مو تظلمني ويوم عرفت ظلمها لي انصدمت صدمتين لأني ما توقعت منها ابدا

المهم حسبنت في نفسي وبلعتها حتى الدفاع ما كنت قادرة ادافع لان الموضوع تم من وراي واكتشفته صدفة وصعب اروح افتح الموضع مع فلانة وعلانة اقول تراها تكذب !

وكنت كل ما تذكرت ظلمها تحسرت وتأسفت على ثقتي فيها خاصة انها ما كانت بتستفيد شيء من ظلمي ابداااا غير تشويهي بس غيرة وحسد واكثر من هذا انها تظهر الصلاح والخوف من الله

المهم مر كم سنة وفي رمضان الماضي صرت ادعي في القنوت اللهم اني عفوت عمن ظلمني لتعفو عني وتحقق آمالي في الدنيا والآخرة

عفوت عن كل من ظلمني مو هي بس

كانت مواقفهم وقهري على نفس تمر علي وقت الدعاء فيفر قلبي وتدمع عيني وازداد اصرارا على العفو واتذكر عفو ابو بكر رضي الله عنه عن قاذف عائشة رضي الله عنها واقتدي به

هالسنة عرفت بالصدفة انها انظلمت نفس الظلم اللي ظلمتنيه بالتمام والكمال واكثر من هذا ان اللي قالت لي عن ظلمها وحدة من اللي ظلمتني عندهم

لا إله الا الله

شوفي كيف تصاريف الرب العادل !!

لذلك نصيحة يا بنات وقت حرقتك بالظلم استثمريها لصالحك بدل ما تدعي عالظالم ادعي لنفسك بالاثرة والنصر والرفعة وتحقيق الآمال في الدنيا والآخرة

وتأكدي ان الله يصرف الامور ما نعلم منها وما نجهل بعدله وبحكمته فلا تشغلي بالك غير بنفسك اصلاحها والدعاء لها ولاحبابك والمسلمين

انا ذكرت موقف واحد فقط رغم اني حصلت لي مظالم كثير لكن غرضي انبه على استغلال وقت الظلم وحرقة القلب لصالحك لذلك اختصرت بموقف واحد


الله يحقق لي ولكم كل آمالنا ولا يجعلنا من الظالمين ويعفو عنا ويسلل سخائم صدورنا ويدبر لنا امورنا بمنه وفضله