معاك التقييم في أمان الله🧜‍♀️⭐️⭐️⭐️⭐️⭐️

السلم عليكم ورحمة الله

اليوم في الدوام تسولف علينا زميله
وهي من النساء الي ربي أعطاها
قبول وخفة دم
وقدره على تحويل أي سالفه
لموضوع ضحك وسخريه.

المهم تقول زوجي يابنات لما يتواصل
مع أي شركه أو جهه حكوميه
وترد عليه موظفه تتغير نغمة
صوته ولهجته من قمة الغضب
لقمة الرقه والجنتله
وتطلع الألفاظ الذربه منه
ياعزيزتي
يا أختي
لله يعطيك العافيه
وبدل ما يتصل عشان يقدم شكوى
ألقاه يشتكي نفسه ويحملها الخطأ
إنه ماعرف يتعامل مع النظام
من جهاز أو أي شي بنفسه!!

ولما تقول له الموظفه يومك سعيد
معاك التقييم في أمان الله
ألقاه خلاص تبخر سااح
ويحرص إنه يسمع رسالة التقييم
كامله ويتأكد إنه أختار رقم الإمتياز
ميه بالميه
ولا يقطع الإتصال لين يتأكد إنه
خلاص مابقي شي يسويه.

لكنلما يرد موظف اللهجه تزيد جفاف
ويعصب ويشتكي ويهدد يغير الشركه
الي تعامل معها ويهدد بوزارة التجاره
ولما ينتهي ماينتظر الولد يقول يومك سعيد!

ولو الولد خدمه وحل مشكلته التافهه
مستحيل يقيم بممتاز.
وأصلًا يقفل والولد يودعه!

طبعًا فيه مبالغه منها
لكن الحاصل ليش يحرص البعض
يقيم البنت بخمسه نجوم؟
بينما الولد مسكين خطر يقيمه سيء أصلًا!

الكلام طال وتشعب
وبعض الموظفات قالوا يمكن يرحم البنات
مسكينات محتاجات!

رد الفريق الثاني طيب والأولاد مهم محتاجين؟

والولد راتبه لزوجته وأولاده
أما البنت للفيلر والماركات

أنا الحقيقه ما أقيم لا ولد ولابنت
ما أصدق أخلص سبب إتصالي وأقفل.

هل تقيمون؟
هل يفرق معكم ولد أو بنت؟
زوجك كيف تعامله مع هذي التقييمات؟
هل فعلًا البنت راتبها يروح مكياج
وغيره بينما الولد بيت وأجار وعائله؟