معاناة الفتيات مع تقدم العمر وتأخر الزواج

طبعا معاناتها تزيد بتركيز الناس عليها لا ويحسبون عمرها بعد ويبدا موال التحطيم وترى اذا البنت يأست وانطوت ع نفسها كله بسبب الناس ونظرتهم القاصره ولو بناتهم مكان هالبنت كان انكتمو ماقدرو يقولون كلمه لكن بما انهم زوجوا بناتهم ماعندهم شغله ولا مشغله الا بنات الناس فلانه ماتزوجت فلانه كبرت فلانه ماظن تتزوج صاروا الشباب يبون الصغيرات
ومن هالكلام اللي يكسر قلوب البنات المتأخرات بالزواج مع ان تكون عمرها 27 او 28 بس يوهمونها انو كبرت وان فرصة الزواج ضعيفه مقارنه باللي اعمارهم 17 و18 سنه
اقسم بالله ناس مدري كيف اوصف تفكيرهم
اللي مايراعون فيه مشاعر البنات
اذا الحرمه ماعندها كلمه زينه تسكت افضل
ولا الفلسفه الزايده
والمشكله ان حتى البنات انفسهم يحبطوا بعض بنفس اسلوب الحريم الكبار يعني الكلام الجارح ملاحقها حتى من صاحباتها
لا وازيدكم من الشعر بيت حتى الصديقات يتخلون عن صديقتهم اذا هم تزوجوا وهي لسى ماجا نصيبها يعني المسأله صارت مظاهر
وكل مامر يوم ع البنت بدون يتغير شي يعني ماتقدم شخص او مثلا تقدم بس ماصار نصيب يزيد الاحباط واليأس والحزن ودايم تفكر بفلانه وش بتقول والمشكله ان البنت ماتطلب رأي احد بس ياشين اللقافه .
المهم مابي اطول عليكم اللي ابي اوصل له من موضوعي ان كل بنت تحاول تتغاضى عن كلام الناس وما تلتفت له ابد وتحسن الظن بالله ولا تيأسي ابدا وكل شي من الله خير وكل تأخيره فيها خيره وما عليك من العقول الصغيره ولا تنطوي على نفسك وعززي ثقتك بنفسك وعيشي حياتك بفرح وتفاؤل.
دمتم بسعاده