(معاناة زوجة من اول ليلة زواج )

السلام عليكم ورحمة الله وبركاته. الصراحه قصتي كانت من اربع سنين كنت متزوجة من شخص كانت عنده ام حقود وثعبانه بالبدايه كانت تعتبرني مثل بنتها لما اجت تخطبني ويالله ما احلى اللسانها وهي من الجنسيه المصريه بس هو مواطن وهو كان اكبر اخوانه ::44: ولما صار الزواج كنت اتأمل اني بعيش عيشه طيبه وسعيده بس لأسف من اول يوم زواج بدت تعاستي معاه ,كان يمد ايده ويضرب ويسب بالألفاظ البذيئه وكنت اسكت عشان الفضيحه قلت مايصير ارجع لأهلي من اول يوم زواج شو بيقولون الناس عني الناس مايشوفون الباطن يشوفون الظاهر وصبرت واتحملت اهاناته واهانات امه لمدة اربع شهور وانا كنت بعيده عن اهلي تقريبا ساعه ونصف بالسيارهولما اروح زياره لأهلي يشوفون الحزن في عيوني ويسألوني الظاهر انج مب سعيده يا فلانه اقولهم لا بالعكس انا مرتاحه وسعيده بس انتو يتهيالكم اني مش مرتاحه ومرت الايام وانا بالنازل وكرهت عمري لامصرف ولاملبس ولاعيشه مثل الناس لين ما انفجرت وقلتله باعلى صوتي طلقني انا ما اقدر اتحمل هذي العيشه رد علي انا بذلج وما بطلقج لين ترجعيلي كل اللي صرفته بالعرس ونصدمت من رده قعدت ابكي وابكي لكن فكرت اني اللجأ لأهلي وكلمت اخويه بسرعه وقلتله الحقني تراني متعذبه وتفاجأبالخبر وبالصراحه حتى التلفون مانعني منه من اول مادخلت بيتهم كل شي ممنوع عندهم وصدمه ورا صدمه حتى الذهب اللي يخصني باعه من اول اسبوع زواج فاجى اخويه بسرعه واخذني ومن بعدها كل واحد منا راح في حاله ورحت المحكمه وتنازلت عن حقوقي الشرعيه ومن غير اللي دفعته له والله لايراويكم مثل هذا اليوم اللي شفته وصدقوني يا اخواتي ترا الرجال كلاب وما تعرفين اساليبهم الخبيثه الا لما تعاشرينهم بس ما اقول الا الحمدالله اني ماجبت اطفال منه . وهذي قصتي الاليمه.اتمنى من كل فتاه قبل ما تفكر تتزوج تصلي صلاة الاستخاره وتفكر مليون مره قبل ما تتخذ قرار الزواج من شريك حياتها لاتغلط غلطتي وتتسرع في الزواج .والسموحه على الاطاله ولكم مني خالص الحب والاحترام.( فقيرة الحظ )