معاناة سمار مرافق الجسم راحت وبإذن الله من غير رجعة

السلام عليكم ورحمة الله وبركاته
الحمدلله حتى يبلغ الحمد منتهاه
الحمدلله على بلوغ هذا اليوم
حبيباتي يعلم الله اني ما اريد من كل وحدة اي شيء سوا اني اعطيها خلاصة تجربتي وش مصلحتي؟ صدقوني ولا شيء حتى رفع للموضوع ما يهمني ولا احتاجه
كل الي ابيه إنك تستفيدين او حتى تتطلعين على تجربتي الي ربما لاتغني ولاتسمن من جوع .. لانه في يوم من الايام كنت احتاج مثل هالشيء واذا بتعطوني دعوة حلوة مثل حلاوتكم اكون من الشاكرين
انا هنا ما املك صلاحية باني اقول الخلطة الفلانية خرطي والصابونه العلانية مدري شفيها لا لا ،، تجارب الناس على كثرها لاتعمم ،شيء فاد غيري ممكن مايفيدني عادي جدًا الجسم انواع واشكال انا جربت كثير خلطات تكللت بالفشل ليه؟ يمكن السبب مني اني ماداومت او يمكن ما استخدمتها بالشكل الصحيح او يمكن انها ماتناسبني واحتمال انها ضرتني
يمكن مو كل خلطات العالم جربتها لكن جربت كل شيء فيه جلسوليد وجلسرين وليمون وموية ورد واسكنول ودلكات وحمام مغربي وصابونة بابايا والي لونها اسود ودوف والفلبينية والي تبيض وسيتافيل والطبيعية التركية وبيكربونات الصوديوم وحليب وبطاطس ومايذكرني وش بعد
جسمي اذا رطبته يزيد جفافه جربت لوشن فازلين ونيفيا كل الأنواع من هالاثنين بس ما فاد والجلسوليد أتعبني اذا حطيته حاس الدنيا علي ما اقدر أمسك شيء وسيتافيل الكريم يجنن تبارك الله بس غالي حتى لو كان مفيد مايحق لي أشتريه بهالسعر
الجسم مثل ما انا اعرف يحتاج ترطيب طيب انا للترطيب قعدت عليه سنين ومالقيت الي يناسبني علمًا الي ناسبني اسمه سيتافيل بس ما اقدر أشتريه كل ماخلص من عندي ولكذا شلته من بالي خاصة اني استهلك كمية كبيرة بالشهر
جربت ملح وزيت ضرني وليمون وسكر وزيت صرني(سمر المكان زيادة)
جربت زيت زيتون يازين الجلسوليد عنده! وصرت لفترة متقطعة استخدم الزيتون على جسمي وهو رطب بس مثل ماقلت يجفف جسمي ، قلت مالي الا حل اخير توكلنا على الله وجربت مقشر طبيعي سكر وزيت زيتون بحيث اني لو اتروش بعد يخف تركيز الزيت ولا يخرب ملابسي ويشهد الله على كلامي من بعد ذاك اليوم وانا مرتاحة مرتاحة مرتاحة وكلها اسبوع ونص وشفت يدي من دون مبالغة قطعة وحدة يعني الحل صار تقشير وترطيب! هذا الحل انا جسمي يتحسس من المقشرات الي تنباع تجيني حساسيه منها والسكر هادي على جسمي ، طبعًا ما احط على جسمي كله بس الأماكن الجافة السمراء اول شيء طلع لي يدي لاني كنت اقشر مرتين باليوم او كل ما امر من المغسلة اقشرها وكلها على بعضها دقيقة ما احب انتظر وهي على يدي وبعدها طلع اثرها على رجولي صرت اذا قشرت يدي اقشر معها رجل وحدة ( اتعيجز اغسل رجلين) وسبحان الله صارت الرجل موقطعة وحدة لكن صرت البس الفلات الي قطعته من ٤ سنين الحمدلله على توفيقه وفضله ، الخلاصة ياحبيباتي مو بالسكر والزيتون كثر ماهي ان الجسم يحتاج شيئين تقشير مناسب للجسم وكريم مناسب للجسم وانا الحمدلله ناسبني مقشر الزيت والسكر والى الحين ودي استخدم كريمات مثل البعض بس ما اقدر يجفف جسمي او حتى يدي ... هذا شيء سريع للي ماعندهم وقت وحتى الي عندهم وقت بتكون النتائج اسرع ، طيب كيف استخدمها ليديني؟ شوفوا حبيباتي اغسل يدي بمويه بعدها اجيب السكر والزيت وأخذ مقدار ملعقة صغيرة وافرك فيها يدي، يدي تكون رطبة بالموية مومليانه لأنك حتى بتحسين اذا انتِ كثرتي موية او قللتي وخلاص انتهت المهمة اما بالنسبة للرجل فكانت مثل طريقة اليد لكن بعد ماتنشف احط فيها مسحة فازلين والبس شرابات ، الركبة والمرفق ماجربت للحين احسها تبي شغل اكثر يعني اتوقع اني بعد ما اقشرها احتمال لازم اغطيها بعد ما ارطبها بفازلين بس أفضى بإذن الله وابدأ للمرحلة الثانية الي تشمل المرفقين والركبتين وعشان ماتنحاس حياتكم جربوا مره اذا نفعت كان بها وان مانفعت فخيرة ان شاءالله وتوكلوا على الله وابدأو البحث من جديد بس نصيحة الي نفعت معهم يحطون هالمقشر في علبة لانه موكل مره بيسوونها لانها تزهق وهذا الي لاحظته اعبي العلبة مرة كل شهر والحمدلله ...