معاناة 12 سنة مع شعري ...اللهم لك الحمد كماينبغي

معاناة 12 سنة مع شعري ...اللهم لك الحمد كماينبغي

أحمدك ربي واثني عليك ما أنت أهله الحمدلله الذي توحد بالحمد لنفسه
الحمد لله حمد الشاكرين الحمد لله كما ينبغي لجلال وجهك وعظيم سلطانك
الحمد لله حمدا كثيرا طيبا مبارك فيه
الحمد لله حمدا يوافي نعمه ويكافئ مزيده
اللهم لك الحمد حتى ترضى ولك الحمد إذا رضيت
ولك الحمد بعد الرضي
الحمد لله ملء السماوات والأرض ومابينهما وعدد كل شيء خلقه الله وعدد ما شاء من بعد
اللهم لك الحمد

اعضاء هذا المنتدى الغالي
السلام عليكم ورحمة الله وبركاته

معاناة 12 سنة مااعتقد كثير لو تاخذ من وقتك بس 12 دقيقه

بدأت معاناتي مع شعري منذ 12 سنة كان عمري تقريبا 16 <<ماتصغر نفسها
كان شعري طويل الى الركب وغزير الى درجة ان ايدي ماتسكر عليه وناعم وفيه لمعة صحية
امي كانت تجدله لي لما اتحمم ...فلما افتح شعري ثاني من جوه لسى رطب مانشف!!!
كان على الحنا بالسنة مرتين وتونك فازلين بعد الحمام وبس
صبغة ماصبغة مافي حتى الاستشوار بالسنة مرة او مرتين

<<<طبعا "كان" فعل ماضي مبني على الفتح او السكون ماادري وحدة منهم!!!!
المهم

<<<<هذا كله ماله دخل بالمسلسل اللي جاي بس مقدمات :)

ومن وقتها (من 12 سنة) بدا معي "مسلسل التساقط" دون سابق انذار ولاادري وش السبب
من بدا معي وشعري يطيح بغزاره حتى مجاري الحمام وانتو بكرامه انسدت من كثر مايطيح !!!!

كان ابوي الله يرحمه من فترة لفترة يجيب عامل يسلك المجاري والله مو مبالغة اتكلم عن جد

امي الله يحفظها قالولوها الحريم قصي الشعر وتروح النفس اللي فيه امي قصت منه شبرين ومع الوقت تقصر لي منه كل فترة
ان شعري يطول عيا لايطول هو يقصر ومع التساقط وبعد مرور سنتين صار كنه ذيل بريعصي !!!!
وكل مامشطت شعري يطيح خصل وكنت الم شعري اللي طايح صاير جنه كورة حشى واقول "اللهم عوضني خيرا منه"
لكن لكم ان تتخيلو الالم النفسي اللي صار فيني والمعاناة

صرت الفه ولااحضر زواجات

ولاجمعات وان حضرت يكون مربوط وملفوف تخيلي احضر زواج وهو مربوط قمة الالم النفسي

ايام ثالث ثنوي البنات قالوا لي زيتي شعرك بزيت زيتون انا احط منه من هنا شعري يطيح بزيادة من هنا وتركته

ايام الجامعة قلت يابنت شوفي حل لشعرك روحي هنا هنا

رحت دكتورة جلدية وقالت بنسوي لك تحليل دم طلع الدم مرة كويس قالت كلي خضار وبقدونس وجرجير!! قلت ماافي احد ياكل بقدونس وجرجير وطماط اكثر مني لازم يوميا!!!
وبيض وجبن لازم يوميا على الفطور
وكبدة كل خميس وجمعه
والدم الحمد لله ممتاز 16

قالت اجل التساقط من القشرة وعطتني شامبو وامبولات ولاكأني احط شي وترى انا انسانه صبورة واستمر على الشغلة شهور حتى لو مانفعت امشي على كلام الدكتورة الشامبو ريحني من القشرة لكن شعري صار ناششششششششششششششف والامبولات كاني احط عطر بشعري ولا نفعت بشي ريحتها حلوة وبس لكن التساقط لازال مستمر

بعدها رحت مركز "ابولو" قالت بنسوي لك تنظيف لفروة الراس وعطتني علاج
وهي تسوي التنظيف طاح شعر بالهبل!!!

وعطتني بخاخ مااذكر وش كان وشامبو وفيتامين (مدة 3 شهور) ولاكأني اسوي شي وكلها بس تنششششف شعري
هذا كله وانا ماسكة شعري ولا صرت اقص منه شي ابيه يرجع زي ماكان <<< "صدمة نفسية" وماني راضيه استوعب اللي صاير

جتني فترة من الفترات استخدمت الروكاتان لعلاج حب الشباب و تساقط الشعر صار دبلات لانه معروف يسبب التساقط
خلال هالمسلسل استخدمت:
زيت دابر املا استخدمته فترة بس من احطه يصيدني صداع عجيب غريب وتركته
زيت الحشيش مافادني ابدا
زيت النخاع التونسي
زيت الجرجير
تونك سورسير من الصيدلية مانفعني شخصيا
حلبة مع زيت
حلبة مع موية مانفعني
رجعت للحنه ولما اغسل الحنه يطيح شعري مع الحنه - مو طبيعي برضو مانفع
بيض سادة
بيض مع حنه
بيض مع زيت زيتون
جربت خلطات كثير اذكر شكلها بس مااذكر وش حطيت فيها
دولابي زيوت واعشاب وصحون وفناجيل اشكال الوان

كامينوموتو استخدمته ولازلت اول اربع شهور الحمد لله خف التساقط عندي 70% لكن بعدين صارت عندي ظروف ووقفته ولما رجعتله زي قلته

ولازال مسلسل التساقط مستمر لم ينتهي

بتتخيلون نهاية المسلسل صرت صلعة لكن الحمدلله الحسنة الوحيدة من هالمسلسل اني ماصلعت لان شعري كان مرررة كثييير لكن صار خفيف جداااا بشكل عام ومقطع يعني مافي شعرتين طول بعض ولما اربطه شعر كثير طاير بالهوا والشعرة الوحدة خفيفة جدا انفخ عليها تطير

تبان فروة راسي على خفيف

وقبل مااتخرج صار زواج اختي وقلت شعري ولارجع خلني احترم نفسي واقصه واللي مايبيك لاتبيه و"كرامتس ماتسمحلتس يابنت"
على الاقل يكون له شكل وطعم ولون وقصيته شاقي ايام الشاقي وطلع حلو صار له حجم
لكن يتساقط صرت اقصه كل 9 شهور تقريبا مدرجات وكله قصير بس كل ماله يخف الشعر
وبعد ماتزوجت زوجي يحب الشعر الطويل وانا بعد اموت عالشعر الطويل بس شعري قصير وش السواة؟؟----------> سواة الله احسن
بعدها
حملت وخلال ماانا حامل شعري وقف مااقول خف اقول وقف تساقط شعري وتحسن صار كثير وطول وبعد ماولدت استأنف المسلسل حلقاته بشكل مو طبيعي
رحت دكتورة قالت "هزا تبيعي يابنتي انتي توك والدة"
قلت يادكتورة افهميني انا لي سنوات وشعري يطيح واللي طلع وانا حامل ماابيه يطيح <<<< تحزن من قلب
صرفت شامبو ومااعرف ايش ولا اخذتها من حر مافيني
وبعد ماحملت مرة ثانيه وقف التساقط وكثر شعري وطال وبعد ماولدت بدا مسلسسل التساقط ورحت اخذت كورس ابر الميزو ثيربي 6 جلسات بمعدل جلسه كل اسبوع بصراحة خف التساقط بس مو كثير على الاقل لما اقوم من فراشي القى بس تقربيا 20 شعرة على المخدة مو 50 !!! بس غير اللي يطيح في المشط 80 واحيانا 100 والله اني اعدها علشان اشوف طبيعي والا لا
وغير الارضيه اللي من جد اتفشل مع ان الشغاله تكنس كل يوم لكن برضو حتى ملابس زوجي ماسلمت الا مايلزق بثوبه شعر !!!
ومجرد ماخلصت الكورس رجع التساقط ومو معقوله استمر طول العمر لانه وقت بالنسبة لي كل اسبوع اضيع 3 ساعات على الاقل هذا غير الدوام غير الاطفال غير الميزاينة ابدا ماينفع اضل مستمرة طول العمر

وصرت دكتورة نفسي صرت اقرا هنا وهنا وعرفت التساقط اللي معي له علاقه بالهرمونات والدليل لما اكون حامل ماتطيح ولا شعرة الا بالنادر
ويقال له "الصلع الوراثي-تساقط الشعر الاندروجيني" وماله علاج زي مايقولوا!!!
الا بخاخ الريجين للنساء "وفيه نسبة 20% فشل" وبالنسبة للرجال له علاجات ثانية بالاضافة للريجين
واستخدمته من قال مااستخدمته!!!!

بس بعد استشارة دكتورتين وحدة من النت

ووحدة في الرياض لما رحت اكلمها في الموضوع قالت البخاخ هذا ختير مرة المكان اللي تبخي فيه يطلع فيه شعر فانتبهي لايجي وجهك ولا يدك
قلت انا "هلا هلا جيت والله جابك يالريجين" مافي مشكله اهم شي يطلع شعري اللي راح قبل سنوات
واستخدمته شهرين فقط ووقفته ليه؟ لان:

-يستخدم للاماكن الفارغة بس يعني فيك صلعه تبخي فيها 6 بخات وبس مافي اكثر من كذا لان ممكن ينزل ضغطك
-لكن اذا شعرك بشكل عام خفيف ماينفع لان مستحيل بتبخين في كل بقعه 6 بخات لان ممنوع تزيد الجرعه عن 1 مل = 6 بخات
-ولازم تستخدمينه طول العمر لانك لو تركتيه بيطيح شعرك اللي نبت
-وممكن يسبب هبوط في الضغط
-واذا انتي ناويه تحملين لازم تتركينه قبلها بفترة
-ويطلع شعر في الوجه والجسم وجهي بصراحة كثر الشعر وجسمي مابان لان انا مسويه ليزر للجسم
يعني مشاكله كثير وممكن ينفع وممكن لا

تذكير: الانسان يتوكل على الله رب العالمين ويعمل بالاسباب ويطلب ان الله يوفقه ليجد ضالته
وهذا اللي انا كنت ماشيه عليه
كل اللي صار وبيصر لي ولك بمشيئة من الله واطلب ان يعوضني خير ويوفقني للحل
كتبت قصتي هنا وانا لازال فيني امل وانا اذهب هنا وهناك لعل الله يهديني الى ضالتي واجد حلا
لازال فيني امل ان يرجع شعري مثل ماكان



والحمدلله على كل حال
والحمدلله على الصحة والعافية


اسفه جدا على الاطاله لكن افضفض شوي لان الضغط بيسبب تساقط شعر :09: