معاناتي في تعليم ابني على الحمام :(

السلام عليكم..


ولدي بيكمل 3 سنوات بعد شهرين إن شا الله.
وهو ما شا الله واعي وذكي ويفهمني وكلامه واضح الله يحفظه.
وسجلته في الحضانة وشارطين يكون متعلم على الحمام.
بديت من سنة تقريبا أهيئه للحمام وأعلمه الأساسيات.
أشغل له فيديوات أطفال يتعلمون وأقعد معاه وأشرح له بطريقة محببة.
ومن كم شهر بديت التدريب العملي، صرت كل ما أقدر أوديه الحمام.. وأخليه بدون حفاظة لأطول فترة ممكنة.
يمكن تقولون تأخرت بس لأني حملت وتعبت كنت أتوحم.. بس أول ما خلص وحامي بديت معاه.
شريت له نونية ومقعد للمرحاض الله يعزكم. أطلب منه أنا وأبوه باستمرار يخبرنا إذا يبي يسويها.
حطينا له النونية في مكان يقدر يوصلها ، ووعدناه نشتري له دراجة لو تعلم.
في الويكند لأن أكون إجازة أول ما يفتح عينه أوديه والحمد لله أغلب المرات يسويها.. بس مستحيل يطلب من نفسه.
وإذا سواها أخلي أبوه يجيب له شي بسيط من البقالة مكافأة.


لكن ولدي موووو راضي يتعلللللم أبداً ولا يقول لي لو يبي يسويها، ولا حتى لو سواها في نفسه لا الكبيرة ولا الصغيرة!
ما أكتشف إلا لو شميت ريحة أو تحسست بنفسي.
ولا يغار من الأطفال الي متعلمين على الحمام
ولا يغريه لما نقول له عن الهدايا الي بنجيبها له، وعن الحضانة الي بيدخلها.
على طول أقرا وأبحث في طرق تعليم الحمام.. بس ما ينفع معاه.


المشكلة الثانية إن يتوقف التدريب في وسط الأسبوع لأني أكون في الدوام والخادمة في البيت ما تعرف له.
وشكلها ما تبي أساساً تدربه وبس تلبسه الحفاظة وتفتك.. ولا أم زوجي يعجبها إن الخادمة تتفرغ له عشان ما تقصر في شغل البيت.
وانا مابي أقول لهم كثير وأفرض عليهم إذا هم مب حاسين إنه شي لازم.
انزين انا شاسوي والله محتاااارة اش فيها لو ساعدوني شوي بس في هالكم ساعة الي يكون عندهم :(
كلها شهر ويدخل الحضانة.. ولو ما تعلم ما راح يدخل وراح يبقى معاهم في البيت كل يوم الصبح!
أنا من أرجع من الدوام أبتدي معاه حتى لو تعباانة وأحتاج أريح ظهري.
لكن الصبح أهم لأن يكون يبي يسوي الكبيرة في وقت معروف وهو أول ما يقعد من النوم.


عندي حل ثاني بس بعد عشان أطبقه يبي لي أجاهد وأحارب لأن بترفضه أم زوجي..
وهو إن أقعد ولدي من الصبح كل يوم ونوديه بيت أبوي وأخلي خادمة بيت أبوي تعلمه.. مع العلم إن أمي الله يرحمها متوفية. وما في البيت غير أبوي وأخوي الله يحفظهم.


آه يا رب ساعدني.