معاناتي مع الحسد ...‍‍

يوم كنت أدرس بالمدرسة كنت ( ولله الحمد والمنة ) متفوقة ومن الأوائل ..وهذا شىء طيب الكل يتمناه .. لكن الدنيا ماتكمل !!
بتقولون وشلون ؟!
أقول لكم : كان معي بالفصل طالبة ماشفت مثلها في الحرص والاهتمام .. لكن (الله يهديها) كانت متقعدة لي وحاطة علي أبراج مراقبة ... ( الله يشفيها ) كان مبلية بالحسد‍‍‍ ‍والغيرة .. وخاصة في أمور الدراسة والتفوق ...... فكان لي معها مواقف كثيرة..

وهاكم بعضها :

بالنسبة للنتايج والدرجات ما كان يفوتها شيء من درجاتي وتقاريري .
وياويلي إذا شافت عندي درجة أحسن من درجتها .... قالت:( والله الظلم انا إجاباتي أحسن من إجاباتك.. ودرجتك أحسن.. يا سلام بأي حق تأخذينها أنت وأنا لا . )
وغالبا الحق يكون معي بس الحسد مايخلي أحد .. وبعدين أنا وش ذنبي عشان تحط الحرة فيني ‍‍‍‍..

حتى أحيانا بالفصل إذا لاحظت إن المعلمة مركزة علي شوي وتختارني في المشاركة يفور دمها وتعصب.. ( مع إني مالي يد في هذا) وياليتها تحفظ كرامتها وتسكت ..لا تجلس تطلع كل اللي في قلبها علي‍‍‍.. طبعا بقهر ‍‍‍ ( ليش الأستاذة مركزة بس عليك تمدح فيك وتقومك وتناقشك وتسألك وحنا مطنشتنا )

يمكن يكون معها حق في بعض الأحيان _ والكلام لي أنا_ والسبب تعامل بعض المعلمات في تفضيل بعض الطالبات على بعض دون مراعاة مشاعر البقية .

فعشان كذا كنت أحاول أخفي عن هاالبنت بالذات أي كلام عني .. وفي نفس الوقت كنت أقولها عن أي شيء زين سمعته عنها عشان أرفع معنوياتها ..


مرة سوت المدرسة مسابقة ... وما كنت حريصة أني أشترك لولا إن الأستاذة أصرت علي في الفصل أمام الطالبات_ وصاحبتنا تسمع_ أنا على طول التفت عليها بس بدون ما تحس وإذا وجهها أحمر منتفخ .. لأن الأستاذة( الله يهديها) ما خصتها بالذكر ..
والمشكلة إنها اشتركت عشان تقهر الأستاذة - على قولتها- والمشكلة الأكبر إني أنا اللي فزت .. وتخيلوا أنتم موقفها ...

والمواقف كثيرة لكن ماودي أطول عليكم ...


ولعلمكم أني ماقلت ها المواقف تشمتا بها ولا مدحا لنفسي .. ولكن لنعرف أن الحسد شر كله يحرق صاحبه قبل غيره.......

‍‍
‍‍‍‍
‍‍ ‍‍‍ ‍‍‍‍‍‍‍‍‍‍‍‍‍‍‍‍‍‍‍