معاناتي مع الوسواس القهري .... الى متى ؟

السلام عليكم يا بنات حواء
أستحلفكم بالله اللي مرت في حالتي أرجوكم تساعدني تنصحني ، تقول لي أئ شئ المهم أبي أشفى و الله زهقت
6 سنوات وانا أعاني ، أحيانا أقول لنفسي لو أموت أحسن لأنه الحل ،
ما أعرف أصلي زي الناس و العالم ما أعرف أتوضأ زين ( كله شك و سوسه ) لا تقولو لي لا تهتمين و معذوره ..... سنين و أنا أحقر و ما فيه فايده كل مره يطلع لي شي جديد ،
أشوف برامج فيها حالات زي حالتي يعتبرون كل شئ مو نظيف و يقفلون الباب 3 مرات و يرجعون يتأكدون يمكن 5 أو أكثر من مره .... يسمونهم مرضى ، و أنا أحس انهم يوصفون حالتي تماما مو بس على كذا حتى دخول الحمام تكرمون معاناة مع التشطيف و العد اللي ما يخلص...........
وقتي للصلاه الواحده طويييييييييييييييل حييييييل يضيع كل يومي على الصلوات ، عندي بنت حلوه و ذكيه ودي أطور مهاراتها و أقعد معاها وقت طوييل ما يمدي ... و السبب الوسوسه و ألحين عندي بيبي أبي أعوضها و أترك هالمرض يروح من غير رجعه ( الله لا يوريه أحد منكم )
أطالع في خواتي و في زوجات أخوان زوجي كيف يخلصون و يطلعون و يروحون و يجون ولا عندهم هم الوقت و أنا دايم أتأخر بسبب الوسواس الزفت .........

خلاص أبي أعيش حياة طبيعية و جميله ، أبي أفرح مع زوجي و عيالي و أنسى هم قريب بيأذن و هم بتأكد من قفل الباب ...و غيرها و غيرها من الوساوس........

مشكلتي طبعا ان زوجي يرفض أقول اني مريضه و يقول لي هذي خرابيط اتركيها عنك و خلاص .... طبعا فكرت أراجع طبيب نفسي لكنه رفض رفضا قاطعا واني اذا صممت على الدكتور النفسي أروح بيت أهلي ......... اسكتو بس انصكت الدنيا بوجهي وهليت دموعي أربع أربع ...... حاولت جهدي ان أقنع نفسي بمحاربة الوساوس وان أنا مش مريضه بس مو قادره
.... تصدقون مره خاصمني 3 أيام لأنه دخل البيت بع أذان المغرب ب ساعتين و أنا لحينه أصلي فيه ( أدري بتقولو أذن العشاء ) طبعا هذا اللي يصير ........



أرجوكم أي واحده مرت بحالتي تقول لي و تساعدني شنو العلاج و الدواء لأني قررت أعالج نفسي بنفسي و ما أعتمد على أي كان و بالسر عن زوجي ،هذي حياتي أنا و ما أحد يحس باللي أنا أحسه ......بس دوبهم يتهزون و يسخرون مني ...

أبي حل ناااااااااااااااااجع و قريت البارح عن دواء ياخذوه يقولو فعال ....

ياريت النصيحه لأن أنا جدا منهاره

طبعا طولت و أنا آسفه بس على قد هالسنين اللي عانيت فيها و لا زلت أعاني المفروض أكتب و أطول أكثر و أكثر

الرجاء بالله ثم فيكم

مشكووووووووووورين





في أمان الله