معاناتي مع اهلي << ساعدوها يا اهل الخير ..

بسم الله الرحمن الرحيم ...


اخواتي الغاليات هـذي قصة وحده لي معرفه فيها كتبتها لكم برغبتها وعلى لسانها وتبي الحل ...


ابقولكم مشكلتي وانتوو اقروها والي تقدر تفيدني بحل لا تبخل علي


انا امراه قاربت على الخمسين سنه ..

مشكلتي تكمن باهلي وبالناس يعني مالي حظ من صغري

تزوجت مرتين وقعدت شهر مع كل واحد فيهم الحين انا فكرت بنفسي بعد فوات الاوان

انا تعبانه جسديا ونفسيا ولما فكرت اني اتزوج ابوي رفض قال كبرتي وعندي امي متسلطه علي

ماتخليني على راحتي ولا انام لازم اذاا جيت انام اعطيها مقدمات وامي من النوع العسر جداا

يعني ما همها مصلحتي وحتى انها تضغط علي لما اكون نايمه او مستانسه

وحتى احيانا اكون انا وياها وخواتي مجتمعات وانا اكون مبسوطه ومستانسه

تاخذني من غرقة انبساطي تقول يله نرجع البيت

انا بهالموقف يرتفع ضغطي وانقهر لاني اذا رحت البيت انواع الاكتئاب والضيقه

وبعدين بيتنا من النوع الي مافيه تغيير اليوم زي بكره وزي بعده وزي بعد سنه

امي وابوي ما يطلعون ولا يروحون ولا يجون ولا يحبون الي يطلع من البيت

واحيانا مايحبون الناس تجي عندنا في البيت

وانا عشت حياه صعبه تحملت امي كل عمري من عرفت نفسي وهي تضغط علي

وياما حرمتني من اشياء كثيره اقلها اني لما اكون نايمه تجي تصحيني مادري ليه تصحيني

يعني ماتكون محتاجه مني شي ولا هي قاعده لحالها يكون عندها احد

بس تصحيني غصب عني وانا انقهر واموت قهر احس اني ابسط حقوقي اني انام على كيفي واصحى على كيفي

وما جنيت شي بهالدنيااا لا ولد ولا بنت ولا زوج ولا شي

حتى صار عندي قلق شديد ما انام ومن كثر الاكتئاب الي انا فيه صرت اكلم رجال بالجوال

عشان ما انسى الكلام لان في البيت مافيه احد اقدر اسولف معاه انا اعرف انه غلط وحرام علي

اني اكلم رجال مو محرم لي وكذاا مره بكيت بس وش اسوي مجبوره من الحياه الي انا عايشتها

يعني انا اكلم رجال لهدف اني اتكلم احس اني ابي اسولف وانا اهلي مايعطوني اهميه

ولا احد فيهم يطيق يتكلم معي واخواني كلهم يكرهوني وما يتكلمون معي ويستخفون فيني


وحتى الايام هذي قلت لابوي ابي اتزوج يقولي لا ورااافض جدااا اني اتزوج ورفضه متعبلي نفسيني ومجنني

ومطير النوم من عيني حتى اني افكر اتزوج بالسر هل هذااا صح ؟؟

انا ودي انستر يعني افكر للمدى البعيد عقب عين ابوي وامي الله يطول اعمارهم

من بيبقى لي ؟؟؟

اخواني شاطبه عليهم

انا تعبانه انا حياتي راحت هباااء حتى عندي ضغوط لما يجي عريس يطل بوجهي وينحاش

على اني انسانه مقبوله الشكل ...

حتى امي دايم تدعي علي انا وخواتي المتزوجات تدعي علينا دعاوي مافيه ام تدعيها على بناتها

يعني مثلاا تقول لي جعلك تموتين جعلك تتكسرين ودعاوي كثيره تدعيها علينا

وبعدين هي تحب السيطره وعندها داء العظمه ..

انا محتاره بنفسي لارجال قابلني ولا اهل قابليني ولا اخوان قابليني وتعبانه نفسيتي

ومريضه وصحتي على قدي على اني انسانه طيبه واحب اساعد الناس

وتنومت كثير با المستشفى بسبب التعب النفسي

واذا كنت متنومه بالمستشفى محد يزورني واحس ان نومتي بالمستشفى احس لي من عيشتي عند اهلي

لدرجة اذا الدكتور كتبلي خروج يضيق صدري ما ابي اطلع من المستشفى ...

من الي اشوفه في البيت

انا مستغربه من امي هل فيه ام زي كذاااا ؟؟؟؟؟؟؟؟؟؟؟؟؟؟؟؟

وانا احب انام عند خواتي عشان انفس شوي واريح نفسيتي

بس امي تزعل وابوي يزعل على زعل امي وانا ما احب ازعلهم ..

كل مره اروح لوحده من خواتي تقعد تدعي علي وعلى خواتي وتنكد علينا

تسبني مسبات كبيره وتدعي علي باشد انواع الدعاوي عشاني رحت ارتاح عند اختي ..

الحين انا شخصيتي مهزوزه ..

وصرت اذا كلمت رجال وقالي ابي اتزوجك ارسله صورتي على طوول

من الضغط النفسي مو من ارادتي يعني مدري وش اسوي بنفسي

ويعلم الله اني ماعمري سويت الحرام مع رجال غريب باستثناء مكالمة الجوال ..

وانا الحين بين الحياه والموت واحس خلاااص معاد اقدر اتحمل ابي حل وش اسوي بحياتي

هل انا مذنبه اذا ماسمعت كلام امي ورحت انام عند خواتي ؟؟؟

وترى هذي نبذه بسيييييييطه جدا جدا عن حياتي ومعاناتي ومشاكلي وماخفي كان اعظم ...

والله يرزقها من حيث لا تحتسب الي تعطيني حل ويعافيها بكون لها من الشاكرين وبدعيلها ...

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ