السلام عليكم ورحمة الله وبركاته
حبايب قلبي مالي بالمقدمات ادخل بالموضوع ع طول من بلغت يا
بنات يعني تقريبا من عمري 11 سنه وانا اعاني من الحبوب كنت
اول اعاني بس من الحبوب ومع تطور الزمان صرت اعاني من الحبوب
والاثار طبعا اعالج بس عشان اكون صريحه معاكم اعالج وما استمر
اقطع العلاج وابي نتيجه ما استمر واتذمر اقول ما جاب فايده
بصراحه بداية اهتمامي الحقيقيه من دخلت الكليه صرت اهتم بنفسي اول اعالج بس مو ذاك الزود المهم ماخليت شي ما استخدمته قالو لي في ترابه حلبيه لازم من سوريه تجيبينها وتنقعينها بماي وتحطين لوجهج ((ماقصر اخوي الكبير وصى صاحبه
كان مسافر سوريا بذاك الوقت يوم كانت بخير الله يفرج لهم وينصرهم على هالخسيس مو هذا موضوعنا وجابها الرجال واستخدمتها ومافي فايده ))وبعض بنات الله يسامحهم لما تصفى وجيهم من الحبوب
واسألهم شنو سويتو يقولون نقعي مره وغسلي منها كل يوم وشوفي النتيجه المشكله انهم من اقرب الناس
وخرطي ما حصلت فايده من الحين برد على اللي تقولي الا المره فيها فايده بس ما نفعت بشرتج
بقولج ندري المره زينه بس مو شهر واحد يصفى وجهج من الحبوب وتقصين علي تقولين مره
المهم قالو لي الترمس وغيره وغيره وما ظل شي ما استخدمته واحس لو في تقدم يكون بسيط
والاحباط لما احس اني تحسنت درجه وحده وتجيني وحده تقولي الله يعينج ماتستعملين شي
للحبوب انتي مملوحه بس بشرتج الله يعينج وتقعد تفلسف علي تصير دكتوره حطي وحطي
المهم هالكلام كله صار معاي لين جا رمضان اللي فات وادخل واحد من هالمنتديات عشان ادور
خلطه تحسن وجهي للعيد خبركم ندور الزين بالمناسبات المهم وادخل منتدى واقرا موضوع وحده الله يسامحها
ويعافيها كاتبه خلطه مره تنقعينها بخل تفاح بعدين تطبخينها بزيت زيتون وشمع العسل وتمدح بخلطتها
قلت لاخوي ودني السوق ونفتر انا واخوي نسأل عن شمع العسل بصراحه عن نفسي كنت اول مره اسمع فيه قالو تحصلينه بمحلات العسل وناس قالو بالعطارين بعد عناءا طويل لقيته بالعطار وشريته
ورجعت سويت الخلطه الله لا يوريكم يوم حطيتها صارت تحرقني بس تحملت يوم حرقتني واسيت نفسي وونستها قلت يا نفسي اصبري يمكن تفاعل الخلطه مع بشرتي عشان تجيب نتيجه ولا اقعد ثاني يوم وطالعه بوجهي حبوب كبيره قالت امي وقفي لا تحطين قلت لا بحط يمكن بس اولها بعدين تجيب نتيجه واحط وذبحتني واروح بعدها لصيدلية الدواء ويشور علي الله يجزاه بالخير الصيدلي اني اخذ خلطة افالون
وخذتها اول اسبوع او اسبوعين قشرت وجهي بعدين صفت وجهي ربي لك الحمد الاثار خفت شوي شوي
طبعا خذتها هي والحمايه معاها بصراحه اول مره استخدم شي واحس بنتيجه ترضيني وخلطة افالون مو بس
تصفي تفتح البشره هي مكونه من اربع كريمات والحمايه اللي هو الخامس طبعا الحمايه يطول يقعد شهور
بس الخلطه تكفي لمدة شهر انا تقريبا عمري الحين 22 يعني معاناة 11 سنه ما نفع معاها الا افالون
وانا الحين بكمل سنه وانا استخدمها وبترك الخلطه وبحافظ على بشرتي طبعا حسيت بالتطور بشكل ملحوظ
من ثالث شهر الشهر الاول زين والثاني تفتيح وصفاء اكثر من الاول بس الثالث احس حيل خفت الاثار تقريبا صفت بشكل ملحوظ ما اقول بشكل تام هذا مثل ما قلت بالشهر الثالث والحين الحمدلله بشرتي ربي لك الحمد راضيه عنها والحين النحيسات اللي كانو يقولون لي ننقع مره لما سالوني شنو تستخدمين قلت ابد مافي احلى من المره تنقعينها وتستخدمينها طبعا ما كذبت وقلت
استخدم مره بس مدحت لهم المره سووووري طولت عليكم بس لا تلوومني اختصرت لكم 11 سنه بصفحه
وهذي الكريمات للي ماتعرفها
الصوره من المنتدى
بس قولي لصيدلية الدواء خلطة افالون وطبعا اللي خاطرها تستخدم افالون عشان
التفتيح وهي مافيها لا حبوب ولا اثار نصيحه لا تاخذ المقشر لانه راح يلعب ببشرتها اطلبي الصيدلي خلطة افالون بدون المقشر
انا تكلمت عن هالخلطه بردودي على بعض البنات وفي بنات نزلو موضوع عن الخلطه بس انا حبيت
انزل تجربتي وأكد لكم كلامي وكلام البنات اللي تكلمو عن افالون وموفقين خير وترى عادي اللي
تسفيد وماترد وجزاها خير اللي ترد واللي ماترد
لاني ما احب سالفة لازم كلمة شكر ولا ما احلل اللي تقرا وماترد كيفكم يا حبايب ان جاز لكم
الموضوع زين على زين وان ما جاز لكم
العذر والسموحه