السلام عليكم
اشكر كل من رد علي
هلا نعومي كيوت
( طيب روحي عندها واجلسي وقولي لها ترا انا احبك وانتي زوجة اخوي وبصراحه بقلك شي بس لاتاخذ ين بخااطرك منى واشرحي موقف اخوك منها وقولي ليش ماتحبين تجين عندنا وصل منا كلام لا سمح الله ولا شي وحاولي ادخلي معاه المطبخ وكذا والله يصلح النفوس يارب

تدرين اخت زوجي هي الصديقه المقربه لي ياارب يسعدها ويوفقها والله لو تسير لها اي مشكله تقول انت الي تجين في بالي اول شي وانا نفس الشي يارب لا تغير علينا >> سوري خرجنا بر الموضوع )

فكرت اسوي كذا بس خفت ما تتقبل و تزيد المشاكل و فكرت أني اكلم اختها الكبيرة لأنها قريبه مني و أحنا اصحاب بس أنا محتاره يمكن تقول أني اتليقف مثل ما قالوا بعض الأخوات هنا و على فكره أنا عندي اربع اخوان اكبر منه كلهم متزوجين و زوجاتهم ماهم من قرايبنا و علاقتي معاهم مثل علاقتك مع أخت زوجك الله يسعدكم و نمون على بعض بالمره لدرجت أنهم يكلموني يوميا

عنيده بس رهيبه
والله ياقلبي انا من رايي انك ماتتدخلين فيهالانها اصلا مو متقبله منك اي
شئ و بتظن انكم تحرضون زوجها عليها ولو قدر الله وتزوج بتحطها فيكم
فانتي لاتتدخلين واذا اخوك يشتكي منها ومن اهمالها فهو اللي يتصرف
يجيب شغالة او يصارحها ويقولها انا مايرضيني اهمالك واذا ماسمعت
وتعدلت اخوك يروح يكلم امها او ابوها العاقل منهم بهدوء وبدون عصبية
وباسلوب عشان يتفهمون الموضوع

الله يسعدك احس إني ارتحت لكلامك و اقتنعت فيه و راح أقول كذا لأخوي لو اشتكى مره ثانيه لا يجي يشتكي لنا بصراحة أنا مو متزوجه و احس ماني مؤهله لحل مواضيع زي كذا و ترى هو قبل لا يجي يقولي عن مشاكله كلم زوجته و فهمها أكثر من مره بس ما تجاوت معاه

نخله مثمره
معليش حبيبتي اسمحيلي الخيل من خيالها والحرمه من رجالها...........حبيبتي مافي حرمه متخاف من زوجها........وستحيل اخوك صارم معها لو صارم ماسوت كذه.............لازم يغصبها قومي نظفي البيت ولا يطردها
ولايروح حق امها...........وياخذ العيال ............اليت تتأدب................وليش مايجبرها تجيكم بالغصب ذولي اهلي وغصبن عليك تروحين لهم
صدقيني يمكن اخوك مش حابها ويبيها كذه عشان يصير عنده العذر انه يتركها
لو يحبها كان احرص انها تتغير.................والله يهديهم

هلا اختي ما عليه اسمحيلي أنا اشوف ما في شي يجي بالغصب أو الطرد و بعدين كيف يطردها و ياخذ عيالها هذا ما هو حل ابدا اخوي صارم بس ماهو عنيف و لا يمد يده على احد و راقي بتصرفاته و بعدين كيف يغصبها تجي عندنا حتى احنا ما نرضى عليها هي ام عياله و تقرب لنا و موضوع زيارتها لنا ماهي المشكله و أمي قد قالت لها مره يوم قالت لنا أنهي تتضايق من زيارتنا أن احنا مو زعلانين عليها إذا هذا الشي يريحها أهم شي عند امي أن أخووي و زوجته يكونوا متفاهمين و مرتاحين حتى لو ما حبت تزورنا

وعلى فكره أنا احس أنه ما يبغى يتركها و لا يفكر بالطلاق أبدا حتى موضوع الزواج أحس أنه مو جاد فيه يعني شاريها بس يبغاها تعدل من تصرفاتها بس

هلا أم نايف
كل كلمه هينا انتي قلتيهاا محسوبه عليهـــاا ،لاان احسك بالغتي كثير ، عموما الله يعينكم بس ودي اسئل ، ه الحين وش تعتبرين نفسك يوم تروحين وتسالين بنت اخوك عن امور بيتهم موو {لقافــــــــه } ، لو انها اختـك كان سترتي على الموضوع وحاولتي مره واثنين ، بس ماعليه الدنيـــــــاا دين ، كماا تدين تددان ، وراح يجي اليوم الي تكونين انتي في محلهاا لو وحده من خواتك اوو حتى اذا تزوجتي من بناتك ،
اختي ، لكل انسان مناا يقدر يبدع في شي معين فيه منا السنعه وفيه منا الي فيها لباقه ، وفيه منا الي لسانهاا حلو وفيه بعدد الناجحه في مجال الدراسه ، لااتحاسبين البنت وتطلبينهاا تكون مثلك في كل شي ،وقولي ل اخوك بدددال ه الشكاوي للحريم روح دور لك مراه ولاا طلع فضايح بيتك ،:)

ابدا ما بالغت بالعكس في اشياء ما ذكرتها ثانيا انتي فهمت غلط مو أنا اللي سألت بنت أخوي أخوي نفسه هو اللي سألها تدرين ليه لأن ملابسه ما تنغسل دائما و مفكر أن باقي حريم اخواني كذا و بعدين أخوي ما بدى يشكي إلا بعد فترة ومو على طول بعد زواجه و بعد ما كلم زوجته أكثر من مره و أنا مارحت حكيت عند احد أنا كتبت في المنتدى لأني مو عارفه ايش الحل ولا حبيت استشير احد يعرفنا حتى ما حد يحكي فيها و هو ما كلمني إلا لأنه مره متضايق و أنا ماحرضته عليها على شان تقولين كما تدين تدان بالعكس كل ما كلمني أقول له ماعليه هي عندها اطفال صغار و يمكن ما يمديها تنظف البيت و اقوله اصبر و لما قال ادورله مره ما عطيته وجه ولا راح افكر في يوم اسعى في زواجه حتى امي ماتفكر تسعى في زواجه إذا يبغى بكيفه هو يدور له على مره ثانيه
و أنا ما أطلب منها تكون مثلي بس اتمنى تشوف اللي يضايق زوجها و تعدله وترضيه خصوصا أنه شي بسيط مو شي محال

المهاجره
اخوك رجال خلاص هو يسنع نفسه لاتقولين له شي حتى اذا سعيتي انه يتزوج عليها ربي بكرا يبلاك بوحدتن تسعى لزواج زوجك وانتبهي من دعوتها هي كافه شرها هذا اريح لكم

هلا والله أنا مالي نيه أني اسعى في زواجه زي ما قلت و انتي صادقه هي عمره ما غلطت علينا أو جانا منها أذيه و هذا شي حلو منها وما انكره ابدا الله يسعدها بس بس مشكلة البيت و الترتيب مسبب مشاكل و قلق لهم الله يصلحهم أحس ما عندها إدارة للوقت و اتمنى اقدر احلها لهم بدون ما اسبب مشاكل لهم بس أنا قررت إن ما اتدخل بينهم و الله يستر عليهم

هلا أم دودو المزيونه
طيب انا ما ازور اهل زوجي الا بالمناسبات مع اني اول اسبوعيا كنت عندهم والله احبهم بس تغير الوضع عندي لأني صرت ما احب طلعت البيت وافضل بيتي وارتاح فيه غير جذي اكبرت بنتي وادخلت الأبتدائي وزادة المسئوليه والتدريس اليومي حتي بيت امي بالأسبوع مره ازورها وارجع بيتي علي طول احس ابراحه ابيتي وانا انسانه مو اجتماعية وايد وما احب القيل والقال وجمعت الحريم الا ما فيها فايدة غير النميمة والعيون تتطاير علي كل شيئ وافضل قعدة البيت والشبك علي النت وما ادور علي طبخات الا برمضان فقط كله ديكور وملابس
وبعد ما أحب المطبخ نهائياً ولا عندي اهتمام بالطبخ والنفخ غير برمضان اول عشر ايام وبعدين الخدامة تتكفل بالباقي واغلب عشانا مطاعم بس احب ترتيب البيت واعيالي الحمدالله مرتبين
سؤال هل راح يتزوج علي زوجي علشان ما اطبخ له ؟ ؟؟؟؟؟
الجواب :- الخدامة ليش تاخذ معاش اذا عوضني عن وظيفتي ومعاشي ممكن افكر انفخ واطبخ له
هل وظيفة الزوجة فقط الطبخ والنفخ علشان ترضي سي سيد ؟؟؟؟؟
الجواب :-شرعا غير ملزومه الحمدالله يكفي تربية الأطفال والتدريس ابروحه يبيله وقت وتفرغ خل يحط لها طباخه ويكفي بين فتره والثانية تطبخ له عن خاطره
هل اذا ما زارت اهل زوجها صارت قليلة اصل وما توجب لأنها كافيه خيرها وشرها ؟
يكفي بالمناسبات اواصلهم عن المشاكل والتدخلات الي مالها داعي وتطلعين من الزواره مرفوع ضغطك وسكرك بسبب كلمة انقالت لك
واخيرا خافي ربك ولا تدخلين ابحياتهم تري بينهم اطفال حرام واذا فيها عيوب فأخوك اكيد فيه عيوب أكثر منها
والرجل ما يحتاج سبب للزواج كلهم يدورون الشاره حتي لو زوجتة ملكة جمال وقايمه قوم بالبيت حط علي راسها شريكه وما خاف ربه فيها ولا بعياله

هلا اختي أنا صح ذكرت أن هي ما تجينا إلا نادر و انا و الله ما زعلت عليها على شان هذا الموضوع ولا قلت أن هي قليلة اصل و مو المشكله هنا بس اسمحيلي أنتي قلتي يجيب طباخ و و شغاله اي نعم هو قادر بس إذا هو ما يحب اكل الشغاله و المطاعم و يبغاها تطبخ له أيش المفروض تسوي ؟
خصوصا أن هي تدري أنه انسان رياضي و يحب الأكل الصحي و هي اللي سألتنا يوم خطبها و أنا ما كذبت عليها و قلت لها هذا الشي و بعدين اللي عندها اطفال صغار بالهي تبغينها تأكلهم طول عمرهم من المطاعم و هم في سن يحتاجون اكل زين يفيدهم و طازج
يمكن زوجك ما عنده مشكله من ناحية الطبخ وبس اللي زوجها موعاجبه هالشي وش تسوي؟
, و أنا خايفه ربي و لا تدخلت و لا كلمتها و اخوي دائما اصبره ولا اشيشه عليها لو أنا ما أخاف ربي كان دخلت موضوع الزواج في راسه و زوجته بس هذا موحل ابدا وحتى لوفرضنا انه اعفاها من الطبخ طيب ترتيب البيت و ايش الحل معه و العيال اكثر الأوقات لبسهم مبهذل لييييييه خصوصا هي مو موظفه يعني عندها وقت

ام دودو المزيونه
احنا ما قلنا انها تهمل ببيتها وزوجها وتترك الأطفال مهملين بالعكس هذا دور الأم والزوجة بس هل مقياس المرأة الصالحه انها تطبخ وتنفخ له :angry: ولازم تترس عينه بكل النواحي وحضرته شنو وظيفته بالبيت هل اهو تارس عينها ومو امقصر معاها بشئ؟
بس ابي اعرف اخوك يساعدها بتربية العيال ويشرف علي دراستهم و هل صدع راسه وهو يشرح درس لطفله و يسأل عنهم و لمرض واحد منهم يساعدها ولا من ديوانية لديوانية ومن سفره لسفره و لتعبت زوجته يقوم بدوره كأب هل اهو كامل الأوصاف وما منه قصور ؟ مستحيل
حبيبتي الى فهمته انك مو متزوجة صدقيني لما تتزوجين بأذن الله ويرزقك ربك بعيال بتحسين بحجم مسئولية الزوجة والأم ومقدار التعب الي تتعبه الزوجة لقصرت بشيئ هذا مو معناته اهمال منها لا ومو كامل الا ربك سبحانه و تعالي
حبيبتي الحياة الزوجية تعاون بين الطرفين الزوج والزوجة علشان المركب يمشي والعيال الزوجة ما خلفتهم من الهوا :04: هم مسئولية مشركة

صادقه بس المشكله بدت قبل ما تجيب أول طفل و هي ما عندها الأن إلا طفلين و أما هو ما يروح ديوانيات و إذا سافر مره واحد تكون اسبوع فقط و سياحه و أحيان يسافر بس عمل 3أو 4 ايام بالكثير اسبوع وهو بيتوتي و يمسك العيال إذا شافها مشغوله و يطلعهم من البيت حتى تخلص شغلها بسرعه و الله احسه بيتعاون معها بتقولون أني ادافع عنه بس هذا الي اشوفه و عيالهم ما يدرسون باقي
و بعدين أنا ماقلت انه كامل و مافي أحد منا كامل بس يا أختي احس الشي اللي يشكي منه ماهو قضيه صعب حلها وهو كلمها بالشي اللي مضايقه فليش ما تصلح الوضع و تعيش حياتها معه مرتاحه و إذا هو مقصر معها في شي و مضايقها ليه ما تتكلم معه و تفهمه أو تكلم أحد من اهلها أو منا يمكن نقدر نحل الموضوع


يارب فرج همي
بعض ردود البنات ماادري وش تبي
يقولون مو ملزومه اطبخ له ولا انظف البيت
اجل ليش جايبك من بيت اهلك يتفرج على وجهك مثلا ؟
شوفي اللزم ماعلي راحة اخوي
ماعليك من الردود السلبيه اللي تقول لا تدخلين
دام الموضوع يمس براحة وسعادة اخوي الا اتدخل ونص
اجل انتظر الى متى لين مايطيح بالحرام ويدور بنات الشوارع
اذا شفته مو مرتاح ودايم يشتكي بروح لها البيتها وافهمها
ان اخوي يشتكي وبراسه زواج ياتتسنعين
ولا البنات واجد
اخوي مايبي تسوين له مفطح
راس ماله هدمه نظفيه وطبخه حلوه
بعدها اعذريني اذا طلب مني ادور له على بنت الحلال
ماافيه احلى من الصراحه


هلا اختي حسيتك مولعه مره على البنات ههههههه
لا ان شاء الله ما يطيح بالحرام مو لها الدرجه خصوصا هو مو شاب صغير عمر فوق الثلاثين
حلوه الصراحه بس خلينا واقعيين في ناس ما يتقبلونها و ينقلب عليك الوضع تصدقين مره دخلت زوجته غرفتي و شافت درج ملابسي الدخليه مفتوح و شافت الصناديق اللي ارتي فيها ملابس و سألتني قالت ( انتي دائما ترتبينها كذا على طول ؟ ) تحسبني ارتبها فترة بس و بعدين أحوسها انا انصدمت من سؤالها و حلفت لها أني دائما ارتبه كذا حتى علمته كيف ألف الكولتات و انا ما ودي يتزوج عليه و عندي أمل أنها راح تتغير إذا كبروا عيالها شوي

هلا لولا

يمكن هي مو اجتماعيه .. يمكن الطلعات والجمعات ترهقها ..؟!!
انا قريت الموضوع مرتين .. وين معاناتك معها..؟!!!

وطبيعي حبيبتي بتتعاطفين مع اخوك وتحطينه كامل مكمل ..
بس لازم تعرفين ان لكل فعل ردة فعل .. يعني ممكن تصرفاتها هي ردة فعل لتصرفات اخوك..؟؟!ما تدررررررررررين .. البيوت اسرار ..


أخوي يأخذ اجازته و يسافر أوروبا و دول آسيا كل سنه و يتركها أحس لأنه ما ارتاح معها ما ياخذها يارب أيش الحل و الله كاسرين خاطري عيالهم مع أن زواجهم ماله إلا 3 سنوات و المشاكل بدت بعد شهر و احد بس من زواجهم.

عندي تعليق على هالنقطه ..!!
وليش مو العكس ..؟؟!!!
ليش ما تكون هي مجروحه ومحبطه من انه يسافر ويتركها ؟.؟؟ ليش مو هي اللي مو مرتاحه لسفرياته لحاله ؟؟؟!!!
انا ما اقول اخوك المخطي ... ولا انتم ..
بس افترضي ان اخوك مهمشها من نواحي ثانيه وفهمك كافي ... فاكيد هالشي ينعكس على التصرفات ...
انا حاسه ان فيه بينهم حرب نفسيه وعناد .. وطبيعي بتفزعون لأخوكم..

هلا اختي
هي فعلا مو اجتماعيه بس توقعت انها بتتغير معنا و هذا مو مشكله عندنا بكيفها حتى اخوي يوم يسألني ليه ما تجينا ونروح لها لأنه قارنها بحريم أخواني الثانين قلت له تراها ماهي اجتماعيه كل شخص له شخصيته و لما قال نروح عندها يبغاها تتعود تطلع يمكن قصده على شان عياله كبرو شوي يبغاهم يختلطون بعيال عمامهم و يلعبون بصراحه قلت له ولا ادري إذا كان تصرفي صحيح ليه ما يعزم اصحابه و تتعرف حرمته على حريم اصحابه اكيد بيكونون بسنها و تنبسط معاهم أكثر منا مع ان حريم اخواني قريبين من سنها

و بعدين لما أشوف أخوي متبهذل و مو عارف يتصرف هذي أنا اعتبرها معاناه لي خصوصا ما ودي اخسر زوجته وهي تقرب لي قبل ما تكون زوجته

موضوع السفر اكيد بتكون متضايقه و أنا لوصار لي كذا و الله بزعل أجل هو يسافر و ينبسط و هي تقعد عند اهلها حلوه ذي حتى لما يشتكي لي أقوله تستاهل ليش ما تاخذها معك لاسافرت يمكن مع السفر تتغير مع انه أول زواجهم سافروا مع بعض و احسها أنبسطت صح داخل المملكة بس راحت أماكن أول مره تزورها كانت معه
موضوع التهميش يمكن أنا ما قول أخوي كامل بس فيه مواصفات حلوه مره حتى لوغلط عليها تحاول تحل مشاكلها و لا تخليه يمسك عليه غلطه و اتمنى تسوي كذا يعني ترتيب البيت و النظافه ما تخليه يمسك عليها زله على شان تشوف أيش يسوي احس مايسوي تصير مشاكل على شان موضوع طبخ و ترتيب



om rema

ارجو انك ماتزعلي من كلامي اللي راح تقرينه..
خليك في حالك وما عليك من مرة اخوك...احسك حاشرة نفسك وخشمك في شأن وحياة اخوك...من غير داعي
تذكري ان كل تدبير او ايحاء او تخطيط او كلام في مرة اخوك راح يرده ربي بالمثل عليك...يعني اخوك لما يجلس يسولف عن طماله مرته والا حياتهم التعيسه...المفروض تهدونه وتقولون له الله يهدي الانفس...ومن هالكلام..ما هو استغل الفرصة واشيش اخوي على مرته..واستغل الفرصه وانتقم منها علشانها ما تجيكم او ما تعبركم او ما تجتمع معكم في جمعاتكم
يا اختي احترموا حياتهم وخصوصياتهم ..وارحموا الاطفال الصغار...فكري بمنطق وعقل
يالله ذكرتيني بناس ما يواطنون زوجه ولدهم لحد ودهم يسمعون بموتتها...تعرفين ليه علشانها ما تحتك فيهم كثير...وولدهم الله يخلف عليه دلدول امه...لما يجلس مع خواته طلع كل علوم بيته علشان يرضي امه..لدرجه طلعو عليها كلام انها مريضه نفسيا . واصلا زوجها ميت عليها وما يخلي مكان على القاره الارضيه ما يسفرها ويشتري لها هدايا..واقسم لك بالله اني كم مره جلست معها واحاكيها... انه اطيب منها ما فيه ولا فيه مثل رجاحه عقلها...وادبها...
ما ادري ليه اهل الزوج لما يكرهون مره الولد ولا تدخل مزاجهم...يقومون بأي طريقة تدمير حياتها...
اتركي موضوع اخوك يحله بنفسه... وانشغلي بنفسك ....الله يجزاك بالخير

هلا اختي
الله يهديك أنتي مفكره أن بينا و بينها حرب لا و الله أن علاقتنا حلو ما شلنا عليها لأأنه ما تجينا في جمعاتنا هي حريه شخصيه بس أنا ذكرت الشي هذا يمكن لأنه الوحيد في حريم اخواني اللي كذا

بعدين أنا ماحشرت نفسي في حياتها و لا مره سألت كيف هي في بيتها و لا يهمني ولا تدخلت بس هو اخوي اللي يجي ويشكي يبغى الحل و لا تكلم الا بعد مده من زواجه بعد ما تكلم وحاول معها و أنا يشهد علي الله إني ما شيشته و أني اهديه دائما و أقوله أن أول خمس سنوات في الزواج تصير مشاكل و هذا عادي مع الوقت الأمور تتعدل و هو يقتنع
بس انتي شكلك تأثرتي بمشكلت الناس الللي تعرفينهم و حسبتي أن الكل كذا و أنا يشهد علي الله أن اتمنى تتعدل أحوالهم ولا اتمنى اهدم و أخرب حياتهم بس أنا كتبت الموضوع قلت يمكن احد مر بتجربه زي كذا و يمكن يفيدني لأنه حسافه تروح ايامهم ما ينبسطون فيها على مشاكل ممكن تنحل


زوجة حموده
الله يعينكم .... نصيحة لو جه الله لاتتدخلين بينهم خلي اخوك هو يقرر بنفسه اش يسوي معاها عشان بكرة لاسمح الله صار بينهم شي مايكون لك يد في الموضوع

وبعدين انصحي اخوك انه يتقرب منها وينصحها ترى الزوجة عاطفية كلمة تجيبها وكلمة توديها يجيها بالكلام الين والطيب ويمدحها وياخذ كل الي يبه اذا اهتم فيها
الله يسخرهم لبعض ويهديهم ويصلح احوالهم ..

مشكوره اختي على كلامك الله يسعدك و أنا قلت له فعلا يكلمها باللين و قلت له رفقا بالقوارير حتى لو قصرت ما عليه يعدي اشياء هي توها بدايه حياتها ما تعودت تشيل مسئولية بيت كامل لوحدها و اطفالها صغار

عربانه
زوجة أخوك رفلا وترفع الضغط وأحسن له يتزوج عليها وحده سنعة نظيفة ويعيش حياته صح

حبيبتي الزواج ماهو سهل على شان يروح يتزوج مره ثانيه و أنا ما أيد هذي الفكره و خصوصا هو احسه مو حق زوجتين و مايل لزوجته بس إن شاء الله يصلح حالهم
و بعدين أنا و الله أعرف مره قمة في الإحترام و الطيبه و النظافة و الترتيب و لسانها ينقط عسل و جميله و اجتماعيه و كريمة زرتها مره انهبلت على بيتها ة طبخها و ضيافتها و قعد امدح فيها عند أمي أنصدمت لما قالت لي أمي أن المره هذي أول ما تزوجت كانت تهمل نظافة البيت و الترتيب بالمرة بس تعلمت مع الوقت

om rema
هذي حياة اخوها ومرته...وما يجوز نسمع من طرف واحد...علشان نحكم بالعدل لازم نسمع من الطرفين...يمكن تكون مرة اخوها غلط في غلط في كل حياتها.........وفي المقابل يمكن اخوها ابد ماهو معبر مرته ومطين عيشتها ومقصر معها في جوانب كثيرة........ونصيحه اتركي اخوك يقرر ينهي حياته او يستمر مع زوجته بنفسه...

اللي اعرفه ان الزوج ما يفشي اسرار حياته وخصوصياته لمين ماكان حفاظا على بيته...وايضا يطلب من زوجته في المقابل انه ماتفشي خصوصياتها ومعاناتها لاهلها ولا يقبل التدخل من احد والا راح يخسرون بعض بسبب هالتصرفات..لانهم قادرين على حل مشاكلهم بنفسهم الا اذا استعصى الامر ...
واذا الامر متعلق بزوجه اخوك...خلي اخوك الشديد يسفر الشغاله ان كان عنده في البيت...وخليه يكلم زوجته بحزم ويكون جاد في هالامر...ان كانها تبي تستمر في حياتها معه, تعدل من وضعها وتهتم ببيتها وتطبخ ...الخ..
او انه راح ينفذ الاتي وانه جازم وحاسم الامر ولا يقبل فيه مناقشه:
1- انه راح يتزوج عليها بسبب كذا وكذا وكذا
2- او انه بيطلقها بسبب انها تتمادى في الاهمال ...الخ
وبكذا تكونون ما تدخلتوا في حياته ولا كلمتوها ولا جرحتوها ولا شي...


صادقه أنا صحيح سمعت من طرف و احد و اتمنى هي تتكلم معنا و تقول لو هو مقصر معها و تنحل مشاكلهم
و أنا ما كتبت ابغاكم تحكمون بينهم أنا كتبت أبغى نصيحه فقط
و اتمنى ما يوصلون للخيارات اللي ذكرتيها و شكرا

ما عليه بنات أنا ابغى و حده تعلمني كيف اسوي اقتباس للردود و اضعها في رد واحد لأني تعبت وأنا انسخ ردودكم و شكرا

حسبي الله ونعم الوكيل في اخوات الزوج

أختي المفروض العنوان معاناه زوجت أخوكم معكم وش ذخلك تسألين الاطفال غسلت ملابسهم أو لا

ياقلبي عليك من كلامك حسستيني انكم فعلا اسره رائعه ومحترمه ومتواضعه
ماااشاءالله عليك
اقول حبيبتي اخوكم على حق لازم تزوروها واكيد هي بتتضايق بس ماتزوروها يعني انتم البنات لاااااااااااااااااااااا كمان امك وابوك عشان تستحي على حالها وتتحرك شويه وكوني بالشهر انعزموا عند اخوكم عشان تدبر حالها وتنظف بيتها ونفسها
صراحه مااقول الا الله يعين اخوك عليها

خخخخخخخخخخخخخخخخخخخخخخححح

في عضوات ردودهن كأنج يالسه تشتكين منهن

الله يهديكن بسس

يعني الوحده اللي تسوي هالشي صحح؟؟؟؟

اهمالها لبيتها وزوجها بهالطريقة صححح؟؟؟؟


ليش الريال يتزوج عشان يسمتع بشوفتها بس؟؟؟؟


مب من حقة هو وعيالهم ياكلون شي من ايدها؟؟؟

مب من حقهم يلبسون شي نظيف؟؟؟

شو يعني مب ملزومه تطبخ وتشتغل في البيت؟؟؟

يعني الحين الحريم اللي يطبخن ويشتغلن في بيوتهن خادمات؟؟؟

وايد حريم ما يطبخن ولا يحبن الطبخ في اشيا في تصرفاتهن
واهتمامهن تعوض


ما تبغي تزور اهل زوجها براحتها بس لا تهمل بيتها


اختي حاولي ويا أخوج يهددها بالزواج من وحده ثانيه
خليه يحسسها انه جاد في السالفه ويدخلج تكلمينها

وكلميها بأسلوب حلو،،،،يعني لا تقولين لها انتي مهمله أو وصخه لااااااااااااااااا

وضحي لها أخطائها وقولي لها تراه مبين ناوي صدق يعرس
تلاحقي عمرج وسوي له اللي يباه وريحيه وساعتها ما بيقدر يشتكي منج

انتي وعيالج أولى بالسفر وياه وووووووووووووووو


اذا سمعت الكلام واعتدلت خير لها ولبيتها


واذا ما سمعت خلها تتحمل النتيجه