معاناتي مع زوجي ادخلي وانصحيني

السلام عليكم
هذي اول مشاركة لي في عالم حواء بس انا صار لي تقريبا سنتين وانا يوميا ادخل واطالع مواضيعكم واستفيد منها وايد.
المهم يابنات ابي منكم ترشدوني وتعلموني شسوي مع زوجي والله ضاقت فيني الوسيعة .
انا صار لي متزوجة سنتين وثمانية شهور المشكلة في زوجي انه انسان حساس وزعول ويسوي من الحبة قبة والمشكلة اذا كانت صغيرة يكبرها ويزعل بالاسابيع وحتى اذا هو الغلطان مايجي يعتذر بل ينتظرني انا الي اعتذر منه وياليت لمن انزل نفسي له واعتذر يقبل اعتذاري ويرضى الا يقوم يتغلى ويعاتبني عتاب قوي ويجرحني بالكلام ولا حتى ينام معاي ( اعذروني على هل كلمة بس انا مو قصدي اني ابيه ينام معاي بس ابي شي يكون نقطة ضعفه عشان نتراضى بسرعة بدون مانطول الزعل)
انا في بداية زواجنا كنت ما اقدر اعيش بدونه فكنت اروح اعتذر منه عشان الحياة تمشي بس هو تعود على هل اسلوب والحين ابي اغيره ما اقدر فمثلا اذا صارت بينا مشكلة وكان هو الغلطان اقول حق نفسي مابعتذر منه عشان مايتعود فاقعد اقاوم لمدة اسابيع وبس مرتين نجحت هالخطة اما باقي المرات انا استسلمت ورحت اعتذرت منه والي قاهرني ان هو الغلطان بس تدرون ليش اعتذر منه بعد ما استسلم ؟ لانه يحرمني من كل شي من الطلعات من زيارة اهلي مع انهم قريبين من بيتنا ويحرمني من احتياجاتي الضرورية ومن روحة السوق وما اسمع منه الا الالفاظ البذيئة والله يابنات سنوات زواجنا قضيناها زعل ونكد بسبب حساسيته صاير هو المرة وانا الريال . ياربي شسوي علموني يابنات شالحل معاه احنا ماراح نكمل مع بعض اذا هلون لا ونسيت اقول لكم انه على اتفه الاشياء يحاسبني ويسوي لي سالفة ومشكلة ويبي يلغي شخصيتي ويمشيني على كيفه حتى انه مايرضى اخذ شي من عند اهلي مسوي روحه عزيز نفس وهو اصلن مقصر معاي مايعطيني كل شي ابيه ما انكر مرات يكون كريم
مومبين في عينه التعب الي قاعدة اتعبه والله يابنات اكرف ولا راضي عني تدرون اني ادرس في الجامعة وعندي طفل وعايشة مع اهله واشتغل في البيت الشغل يوم علي يوم على زوجة اخوه واتعب كل يوم دوام من الصبح وارجع البيت تعبانة مرات ما انام اقوم اغسل ملابسه وملابس اخوانه وانظف البيت والحوش واسوي بعض اشغال البيت وانا مونفس اكثر الحريم الي يغسلون ملابسهم مرة وحدة في الاسبوع لا انا اغسلهم كل ثلاثة الايام لان اذا حصل شي من ملابسه وسخ يسوي لي سالفة ويقول انتي كسولة وبعمرج ماتتعلمين ولاراح تتعدلين . وغير هذا قاعدة ادرس واسهر ليالي عشان احصل الشهادة وانفعه وانفع عيالي بس هو مايفكر بهل شي والله انقهر لمن اشوف ازواج حاملين زوجاتهم على كفوف الراحة لانهم يدرسون ويشجعونهم على دراستهم مونفسي انا .
الحمدلله على كل حال
والحين يابنات ارجوكم فيدوني جعل ربي يسعدكم ويهنيكم ويسخر ازواجكم لكم وماتذوقون الي انا ذقته