معاناتي مع طالبات مدارس بناتي/ استوفى الرد

السلام عليكم ورحمة الله وبركاته
اخواتي العزيزات ابي اطرح موضوع بين أيديكم وابي رأيكم فيه
عندي بنتين واحده بصف رابع والثانيه بأول متوسط هم بمدرسة حكوميه لكنها بأحياء راقيه بالرياض وبنات عز ومرفهين زياده عن اللزوم اسميها الضياع للأسف
المهم انا احرص على بناتي كثير وعلى تربيتهم وأخلاقهم ودينهم وأدبهم وتفوقهم في كل شئ ولله الحمد عيالي من الأوائل على مدارسهم بنات وأولاد ولله الحمد والفضل ثم متابعتي وحرصي عليهم وتعبي ولكن هناك بنات في مدرسة بناتي منفلتات جدا جدا للأسف ويعايبون بناتي دائم يعني كيف اوضح لكم
انا موفره لبناتي كمبيوتر ونت ولكن أشياء محدده وبمراقبه مني يستخدمونه ولكن صديقاتهم بالمدرسه يعيبونهم لأن ماعندهم حسابات في تويتر ولافيديوهات كيك ولا حسابات انستقراك تخيلو اليوم وحده بصف رابع تقول لبنتي عطيني حسابك في انستقرام ابي أوريك صوره حبيبي فصول قالت بنتي ماعندي حساب قالت لها مالت عليك قديمه قرويه وراحت تضحك عليها مع صديقاتها بالفصل وكل وحده تقول اسم حبيبها متعرفه عليه من النت ويرسمون قلوب وكل وحده تكتب اسمه اللي تقول فيصل وإلي محمد وإلي مدري مين ووالله بنتي رجعت تسأل ياماما صح انا غلط مره انقهرت ولاعرفت اتصرف قلت ياماما انتي انتبهي لدراستك وأي شئ انا أوفره لك والكيك وتويتر والإنستقرام والواتس والجوال بيد الأطفال ماوراهم غير الضياع وانا وأبوك وأخوانك ماعندنا هالخرابيط
وتوني من أسبوع أشرح نفس الموضوع لأختها بأول متوسط والأولى على مدرستها ولله الحمد وصديقاتها يعايبونها يالمتخلفه ماعندك جوال ولاواتس ولا تويتر ووالله يابنات اني سمحت لها يوم واحد تستخدم جوالي مع صديقاتها وأضافتهم بالواتس إن صديقاتها يرسلون فيديوهات خاصه فيهم وهم على البحر أو في مسبح أو في غرفهم وبعدم ولا حجاب وهم كبار أكبر واطول من بنتي وين الأدب والحياء وين اهلهم مايراقبون بناتهم يشوفون كيف يصورون حالهم ويرسلونها لصديقاتهم ويوم شفت الدعوه كذا حطيت لهم بلوك وقلت لبنتي قوليلهم امي حطت لكم حظر لأنكم ماتستحون ولاتبيني أراسلكم
تعبت ياأخوات من حرصي على بناتي ومن هالجيل احس راسي بيطق من الصداع وش أسوي فكرت اطلب من المدرستين يعملون محاضره للأمهات عن هالشئ لأني تعبت والله
زوجي يقول لاتتعبين حالك فيه أولياء أمور مهيتين عيالهم مره وش رايكم ؟وش الحل ؟ياأمهات عالم حواء معقول فيه ام منكم او حولكم تسمح لبنتها تدخل وترز صورها أو تنشرها في الأنستقرام وعادي ؟؟؟؟