معاناتي من اول زواجي وبعد ولادتي

السلام عليكم ورحمة الله وبركاته

اخواتي حبايبي ربي يفرج عني وعنكم هموم الدنيا والآخرة ويشفينا ويصلح لنا جميع احوالنا
بشرح لكم حكايتي والله يرضى عليها اللي مرت ب مثل حالتي تفيدني


انا حملت بعد شهرين من زواجي وكنت عايشة احلى عيشة مع زوجي مثل اي عرسان بس من اول مابدأ يبين بطني وعرفت الناس بهالحمل صرت احلم ببقرة تبي ترفس بطني وانا بصعوبة اقدر ابعدها عني وكان زوجي بعد بهذيك الفترة دايم يحلم احلام مرعبة ويصرخ بوسط نومه .. وصلت للشهر الخامس وباسبوع كنت تعبانة وتركني زوجي عند اهلي ولما جاء ياخذني لقيته رجل ثاني داايم معصب ومكشر ومايحبني اقرب عنده ويتنرفز مني وصار مايشتاق لي ابدا احس بحبه لي بس صار فيه بيني وبينه مثل الحواجز صار ينام بعيد عني ويحب يشغل نفسه عني حتى يتعب وينام بالصالة مانروح ننام مع بعض بنفس الوقت دايم سرحان وشارد والكلام بيننا كلمة ورد غطاها
وعلاقتنا بالفراش وقت ماكنت حامل بالشهرين مرة وبس اذا تزاعلنا يرضيني بها مع اننا عرسان بس كنت. اعلل له بانه خايف على الحمل ومرت شهور الحمل بثقلها واحزانها وولدت وكنت اتحرق من الشوق له وجاء يوم رجعتي له واصرت خالتي ام زوجي الله يسامحها الا تسوي لنا عزيمة كبيرة بنفس يوم رجعتي حاولت وحاولت اخليها يوم ثاني لان هذا يوم خاص ب زوجي ماالي الكل يشوفني فيه مارضت لا هي ولا زوجي .. ووافقت غصبا عني والحمد لله على قضاءه وقدره
رجعت وصار هذاك اليوم ابشع يوم في حياتي تتخيلون زوج ينام عن زوجته بيوم رجعتها له .. هذا اللي صار كنت متزينة له ومتكشخة بس لاحظته يتحاشاني ويشغل نفسه بأشياء كثيرة من اصلاحات البيت لحد مانام وكسر قلبي وبنفس اليوم مرض ابني نصف الليل جلس يصارخ حسبته بيموت علي .. وعشت من بعد هذاك اليوم نكد في نكد من نفور زوجي مني ونفوري من بيتنا والقلق والبكاء اللي في ولدي والان عمر ولدي سنة حياتي مالها لاطعم ولا لون ..

ماعشت مع زوجي ولا في بيتي مثل ماتعيش العرايس والحمد لله على المكتوب .. وبعد هالمدة الطويلة توي انتبهت لوضعنا وقررت ابدأ ارقي انفسنا وانتبه لبيتي وحياتي الزوجية وصرت احلم ببيتي معفوس وفراشي انا وزوجي مكركب واحلم بحريم من اهل زوجي مضايقيني ومزعليني في بيتي ..
لحد ماعرفت بعضهم واخذت منهم اثر .. وامس اخذت اثر وحدة منهم ورجعت ل بيت اهلي انا الفترة هذي قررت اجلس ببيت اهلي لاني كرهت بيتنا وكرهت وجود زوجي فيه ..
ولما ابعد عن بيتنا اشتاق له واشتاق لزوجي ..

طول الوقت بطني فيه اصوات فرقعه مع اني شبعانة وبالليل على الصبح يطلع من خشمي مثل البلغم الله يكرمكم وصابني اسهال وحرارة في مكان الاخراج اكرمكم الله ، وبالمساء اليوم جاني شد عضلي بفخذيني اكس كأن فيهم كدمات وانا ماتحركت حركة كثيرة وماطحت عليهم ..

تفسيركم لحالتي ..
وايش التصرف الصحيح اللي اتخذه نفسي نعيش انا وزوجي حياة مستقرة وسعيدة مثل اول زواجنا
وتنصحوني اخذ اثر مرة ثانية من هالبنت والا يكفي ؟؟