معاي حق اقلق ولا مكبرتها

السلام عليكم ورحمه الله وبركاته 

كيفكم حوائيات ياجميلات ياقمرات انتو 

 
سجلت  لاني  ابي افضفض من شغله مااقدر ابديها لأحد

الله يسلمكم انا عندي بنتين الله يحفضهم 
الكبيرة اخر سنه جامعه ربي يفرحني بتخرجها 
وعرسها ادعولها والله  تستاهل 
والثانيه ربي يخليها بسنه ثانيه جامعه 
المشكله النااااااااس آة من الناس والقراب بعد 
يقارنون دايم بينهم 
بناتي الله لايفرقهم دايم مع بعض بروحاتهم وجياتهم 
المقارنه من ناحيه الشكل الصغيرة اجمل من الكبيرة 
بس الكبيرة لانفكرون انها ماهي حلوة لاوالله انها حلوة 
بس بالنسبه لاختها عاديه 
بوصفها لكم ،، هي وجها ضعيف وهذا عيبها وفمها شوي 
واسع بس عيونها ماشاء الله واسعه وجميله وملونه 
ولونها خمري جميل وجسمها تبارك الله حلو احلا من اختها 
لاكن عيبها مالها حظور كثير هاديه ومؤدبه 
هي طبعاً تجيها ردة فعل بسبب عدم ثقتها بنفسها وتحس 
الناس يقارنون بينها وبين اختها فتصير ماتهتم كثير ببشرتها 
او لبسها او شعرها لانها تشوف اختها لو تلبس اي شي الناس 
تنبهر فيها 

وانا دايم اشري لها الكريمات والمكياج اي شي جديد ينزل كله 
للكبيرة واطلب لها الطلبيات وهي للاسف كل مازدت اهتمامي 
فيها تصد اكثر وماتلمس شي من الي اجيبه لها وتقول خليني 
كذاانا مقتنعه بنفسي وانا ادري فيها تكابر 
مشكلتي الي محزنتني مرة انه ولامرة جانا خاطب لو اي كلام 
ابداً ابداً وفي حواليها شباب من قرايبها يروحون للي حواليهم 
من قرايبهم ومايطلبونها مع انها والله ثم والله انها اجمل منهم 
بس اقول يمكن مايبون وحدة بنت دلال وعز يخافون يمكن مدري 
والي ياخذونهم يكونون من طبقه متوسطه ربي يوفقهم يارب 

نجي على بنتي الثانيه ومشكلتها الي مأنبه ضميري 
السنه الي فاتت خطبتها عمتها لولدها خاطرة فيها 
والولد والنعم فيه وبأمه والله وشهادة وادب يبونها بعد سنه 
وبعدين الزواج 
انا وابوها على طول رفضنا مع اننا قليل مانتفق لكن من غير 
وعي رفضنا  مااقدرت اتحمل فكرة ان الصغيرة تنخطب واختها 
مافيها عيب كيف اعديها واكسر قلبها 
حبيبتي الكبيرة قالت عادي عطو اختي قبلي ماازعل 
لكن احنا مااعطانا قلبنا عليها والله حلوة مافيها شي 
وصغيرة ومؤدبه ،، يعني لو كانت رافضه الزواج اقول ممكن 
او مثلاً فيها عيب او مطلقه او تأخرت بالزواج ممكن 
بس مافيها شي من هالامور كيف اعديها واخطب اختها 

رفضنا وانتهت السالفه والحين الولد يدور غير بنتي والمشكله 
انهم الله يهديهم يحومون حولي من قريباتي ،، مدري ليه 
طيب دورو وحدة بعيدة عني لازم تكسرون خاطر بنتي 

بنتي الصغيرة رضت بشورنا ورفضنا مع اني كنت حاستها 
رغبانه بولد عمتها لكنها عاقله ومتفهمه وعلشان اختها ساكته 
خايفه اني ظلمتها خايفه لو تسمع فيه خطب وتزوج تنقههر 
وتخبي علي ، قلبي متقطع عليهم 
خايفه كل وحدة منهم تحط راسها على المخدة تبكي دموع 
الكبيرة لانها مايجيها خطاب مع انه الي كبرها ماشاءالله 
مايوقف عنهم الطلاب 
والثانيه تبكي لان ولد عمتها ماتمسك فيها وراح دور غيرها 

انا يابنات ماااتحمل على بناتي الزعل 
فكرت اني لما اطلع للناس مااخذ الصغير اخذ الكبيرة بس 
احس بتأنيب اش ذنبها الصغيرة تبي تنبسط مع البنات واختها 
تبيهاا ،، 

وين الغلط في بنتي نوروني 
ليه مايجيها احد ؟؟ 
سمعتي انا وابوها طيبه بين الناس ،،، 

لاتبخلون لهم بدعوة