بسم الله الرحمن الرحيم
السلام عليكم ورحمة الله وبركاته
اولا وقبل ان ابدأ موضوعي اسأل الله ان يرزق كل وحده فيكم بالذريه الصالحه المعافاه وان يجعل كل لحظة تعب وكل لحظة الم وكل لحظة انتظار وكل لحظة صبر اجور وحسنات لاتنتهي......
كل وحده فينا بعد التبويض يبدأ عندها القلق والتوتر والحيره والانتظار وهل انا حامل او لا وهل الدوره بتنزل والا لا وتقضي فترة الاسبوعين قبل نزول الدوره الجديده بنفسيه سيئه وتعب وقلق والبعض ممكن يتطور الوضع لبكاء وحزن وسهر وقلة نوم وكل هذا اكيد غلط واكبر غلط!!!!!!!
ليش غلط؟؟؟؟؟؟؟
غلط لان هذا الشي بيأثر بشكل سلبي على نفسيتنا وصحتنا ويدمر كل شي حولنا حلو ويستاهل اننا نستمتع فيه
الصحه اكثر شي ممكن نفرح فيها ونستمتع بصحتنا ونستغلها بالشي اللي يرضي ربنا اولا ويرضينا ثانيا وكثير اشياء تستاهل نلتفت لها وننسى اننا في فترة انتظار لان القلق والتوتر ماراح يحل شي ولا راح يجيب اللي نبيه اذا كان مو مكتوب لنا .......
طيب والحل ؟؟؟؟؟
بسيط جدا وكلنا نقدر عليه.....
اولا الايقان الكامل بإن المكتوب هو اللي راح يصير اهم شي اننا عملنا بالأسباب وتوكلنا على الله ودعينا واستغفرنا ومهما كان المكتوب لازم ادرب نفسي على الرضا والحمد والشكر لان من رضي فله الرضا ومن سخط فعليه السخط ........
الذكر والقرآن من اكثر الاشياء اللي تهدي نفوسنا في هذي الفتره وتطمن القلب وتريح النفس ( الا بذكر الله تطمئن القلوب)
الدعاء مايضيع عند رب العالمين فإما ان يحقق لك اللي طلبتيه او يدخره لك ويعوضك باللي احسن مما طلبتي او يصرف عنك شر كان مكتوب لك وفي كل الحالات انتي الكسبانه وربي مايضيع عباده والمؤمن امره كله خير فيارب لك الحمد على كل حال.......
الدعاء يخلي عندك امل كبير بإن الفرج قريب ويعطيك احساس بالراحه وخصوصا في هذي الفتره وكل عمل طيب لله يساعد بشكل كبير على الراحه والرضا .......
في هذي الفتره لاتتركين للفراغ مجال ابدا في حياتك اشتغلي اقرأي زوري احد سوي اي شي يعجبك بس ماتجلسين فاضية ابدا لانك اذا ما اشغلتي نفسك الشيطان راح يشغلك بالافكار والوساوس وراح يجتهد عليك لحد مايشوفك حزينه ومهمومه تعرفين ليش لان الشيطان يفرح اذا احزن المؤمن هدفه يقلل من ثقتك بالله ويقنطك من رحمة الله فلا تستسلمين له ابدا خلي عندك قوة اراده وعزيمه خليك قويه واغلبي الشيطان تراه ضعيف بشكل ماتتصورونه.....
فيه بنات كثير في هذي الفتره وخصوصا ماقبل الدوره بأيام تجلس تتحسس للأعراض عندي الم والا لا وتشوف صدرها اذا تغير او لا تراقب نفسها كثير لو تصدع من اي سبب قالت اي هذا شكله من اعراض الحمل لدرجة ان بعضهم ممكن تتوهم اعراض غير موجوده ومن كثر المراقبه ممكن تحس بأعراض من كثر التفكير تلخبطت هرموناتها وصار عندها اعراض وهي تسأل هنا وهناك هل انا حامل يابنتي حرام عليك الناس ايش دراهم اذا انتي حامل اولا ؟؟؟؟؟؟؟
نصيحه لوجه الله لاتتحسسين لاي اعراض تصيبك قبل الدوره حتى لو كانت واضحه ومعروفه طنشي وانسي ولا تراقبين نفسك ابدا ولا تسألين احد عن اعراضك ابدا لان والله لو كنتي حامل راح يبين في التحليل بعد تأخر الدوره انسي نفسك ولا تحاولين تراقبين جسمك ومتى ماجا وقت الدوره اذا تأخرت حللي وارضي بالنتيجه مهما كانت.....
على فكره في بنات كثير بتتأخر دورتهم بسبب التفكير الكثير والنفسيه المتوتره والقلقه وبتقعد في حيره تحلل مافي حمل والدوره متاخره وتسأل الرايح والجاي انا حامل والا لا واذا كان لا ليش الدوره متأخره الله يهديك متأخره بسببك وبسبب نفسيتك هذي وتوترك اللي في غير محله ياحبيبتي والله الحمل والانجاب شي من حياتك وليس كل حياتك ارحموا انفسكم والله ماخلقنا لهذا ولحد يقولي انتي ماجربتي واللي يده في النار مو زي اللي يده في المويه انا زيك ولي ست سنوات وداخله السابعه من الزواج وانا بدون اطفال وتعرضت لكل اللي قلته فوق وحسيت اللي بتحسوا فيه وعملت اغلاط كثير بس الحين انتبهت لنفسي وحابه اصلح كل غلط انا بعمله لانه في الاخير انا بتعب نفسي على الفاضي وماراح يصير الا المكتوب ........فليش اضيع اجر صبري وتحملي كل هالسنين .......انا لازم احب وضعي وحياتي ايا كانت لانها من اختيار رب العالمين وكل شي يكتبه لنا رب العالمين خير لنا في الدنيا والآخره ( وعسى ان تكرهوا شيئا وهو خيرا لكم)...
والعمل بالأسباب واااااااااااااجب وقبله التوكل على الله.....
بنات كل شي تسوونه ينعكس على زوجك وعلى امك وخواتك وكل اللي يحبوك اقولكم كيف.....
الزوج اذا شافك متوتره وقلقانه وتعبانه نفسيا يقلب زيك تماما وماعاد يصير له نفس في شي حتى احيانا يصير نكدي وعصبي وتعودينه معاك على القلق والتوتر وبالتالي ماراح يتقبل النتيجه اذا كانت سلبيه بس اذا شافك مرتاحه ومبسوطه وعلى طول راضيه صدقيني راح يحس ان الحياه فعلا حلوه ونحتاج نعيشها بكل تفاصيلها وان الدنيا ماوقفت على طفل رضاك بالنتيجه بعد التحليل تعكس على زوجك ويصير هو كمان راضي ومبسوط ومسلم امره لرب العالمين فلاتخربين حياتك اسعدي نفسك وزوجك فانتي ماتضمنين حياتك وماتضمنين اصلا تعيشين لحد ماتجي الدوره وتحللين صح والا لا يمكن تموتين وانتي ماحملتي وش راح تحصلين قدامك غير اعمالك فإذا كان قضيتيها في نكد وزعل وعدم رضا راح تندمين وتقولين ياليتني ارجع ولو يكتبني الله عقيم طول حياتي!!!!!!!!
امك واخواتك يحزنون لحزنك ويزعلون معاك فلا تكسرين قلب امك اكثر مما هو مكسور وحزين عليك بس امك اذا شافتك راضيه ومبسوطه وراضيه بحياتك والله راح يخف عنها الحمل وراح تحس انك مبسوطه وسعيده وهذا يفرحها كثير وينقص من همها عليك ......
امك غاليه فا ارجوك حافضي على قلبها
يارب لك الحمد فنحن في نعم كثيره لانحصيها عددا فلو نقص منا شيئا يبقى عندنا اشياء ويارب يارب مايضيع تعبكم ويرزقكم ربي من واسع فضله.......
هذا اللي عندي ويمكن فيه اشياء كثيره ناقصه فاللي عندها نصيحه بخصوص هالموضوع تفيدنا وخلونا نحاول قدر المستطاع نتغلب على هالمشكله لانها والله متعبه وبالتالي اذا انحلت بنكون جبنا نصف العلاج والنصف الثاني بالتوكل على الله والدعاء والعمل بالأسباب........
شكرا لانكم سمعتوني وشكرا لانكم تحملتوني واتمنى لي ولكم حياه طيبه وسعيده مليئه بالحب والرضا.........