معا يد بيد ضد ,,,, الكركبه والحوسه

وش رايكم بالصور ؟؟؟ روووعه !! صح !! اكيد لو خمس دقايق باليوم ترتيب ما راح تصير هالماسي في الغرف ,,, موضوعي اقصد فيه (الكركبه و الحوسه و القرابيع ) الي تتجمع في كل ركن و في كل دولاب و في كل غرفه من غرف البيت لازم نقضي عليها قضاء تام لانها تأثر عن جد على الحاله النفسيه للانسان و بنفس الوقت تحسين انك مثل العمياء لما تبين تدورين شي او غرض افتقديته من فتره و محتاجه له ,,,,, نتوكل على الله و نبدا
العمليه سهله جدا ممكن تكون متعبه لكنها ممتعه بجد و الاحلى فيها لما تخلصين و تشوفين النتيجه الي طلعتي فيها ,,,, الموظفات ممكن يسوونها في وقت اجازاتهم وحتى البنات ممكن يريحون امها تهم و يفزون طولهم شوي ويقومون بالمهمه ,,,,




ابدأي بغرف النوم واولها غرفه نومك ,,,,, خصصي يوم كامل لجميع غرف البيت
خلي معك ( ثلاث اكياس زباله + منشفه + بخاخ فيه شوي ديتول او أي مطهر مع ماء )
ابدأي بدولاب ملابسك وارمي كل شي بالارض او على السرير ,,,,,, وارمي على جنب أي بلوزه ضاقت عليكي و محتفظه فيها على امل انك تنحفين ,,, واي تنوره عليها بقع كلوركس ومخليتها ممكن يخترعون اختراع يزيله ,,, وووووو أي شي مو محتاجته ((ارمي )) أي قطعه عندك تحسين لها في الدولاب دهر و قرون وانتي ما لبستيها (( ارمي )) نفس الشي على الجزم و الشنط,,,,, كل الي رميتيه على جنب ,,,,, جمعيه في كيس من اكياس الزباله الي معك ,,,, نفضي الغبار من الدولاب ومسحيه بالمحلول الي سويتيه ورتبي الباقي من الملابس ,,,,,, بعد ما تخلصين من الملابس انتقلي للادراج و الدواليب الثانيه ونفس الشي ارمي كل شي على الارض وارجعي رتبي الي محتاجته حطيه بشكل مرتب في الدرج بعد ما تنفضينه و تنظفينه وشوفي ( أي شي مكسور او قلم ناشف او غطاء لقلم ضايع او كرت شحن فاضي او بطاريه قديمه وما تنفع ,,,,, وووووو ) المهم أي شي معبي الدرج لكن ما راح تحتاجينه طبعا لاتنسي دروج التسريحه و مكياجك اكيد فيه روج قديم او قلم تحديد لونه ما يطلع او او او او ارميه في الكيس الثاني ,,,,, و الكيس الثالث خليه للاوراق و الجرايد و المجلات وحتى الكروت ,,,,,




ونفس العمليه الي سويتيها في غرفتكي طبقيها بغرف نوم البيت كله ولاتنسين الاكياس .................... غرف الاطفال لا تنسين الالعاب اكيد بتلقين العاب مكسره و قديمه محتفظين فيها واوراق و مجلات ,,, ولا تخلين كل شي عايم على بعض خصصي درج للمجلات و الكتب و ثاني للاقلام و ادوات المدرسه واذا عندك بنات رتبي البكل و الامشاط و خاربيطهم في علب حلوه وشكلها مرتب وعلبه لشراريب ,,,,, ووحده للمكياج و ثانيه للاكسسوارات و ثالثه للكاسيت روحي لابو ريالين وقشي من هالعلب و خوذيهم مو بمقاس واحد ولا بشكل واحد علشان ما تملين




الحين تتنقل للمطبخ ,,,,
ابدأي رف رف ,,, طلعي كل شي و نفضي و امسحي و بعدين رتبي ,,,, وانتي ترجعين الاغراض حطي على جنب كل شي ما تحتاجينه ( صحن من بقايا طقم قديم عندك ,,, كوب جاء مع كرتون شاي ,,, ملعقه وحيده من بقايا طقم كن عندك ,,, الصحون البلاستيك الي تجي فيها الحلويات الجاهزه ,,, كوب حليب مخدش او مكسور جزء منه وخطير انك تشربين فيه ,ووووو ) أي شي مو محتاجته حطيه في كرتون ,,,, وكملي ترتيب الدواليب كلها

وبعدين شوفي هالاغراض اذا مو محتاجه لها وعندك استعداد ترمينها شيليها على جنب ,,, اما اذا مو هاين عليكي ترمينها او بعضها لها ذكريات عزيزه على قلبك او جت هديه من شخص عزيز بعد ,,, حطيها في كرتون واحد و ارفعيها في احد خزائن المطبخ او في المستودع او المخزن اذا مو جود في البيت ,,,,, احسن من انها تكون ماليه مكان و ماخذه حيز في المطبخ وانتي ما تستخدمينها ,,,, والحمد لله المطبخ انتهى



ويوم ثاني خليه للغرف الباقيه من البيت و خصوصا غرفه التلفزيون و المكتب و المخازن وطاوله الكومبيوتر هذي بكل دولاب ورف و درج بتلقين فيها بلاوي ,, انتي بس دققي و قوي قلبك في (( التخلص من الاغراض )) ,,,,, رتبي كل مكان فيه ونفس غرف النوم رتبي الاغراض في علب مرتبه حتى بعض العلب او السلال تعطي شكل حلو للمكان وبنفس الوقت تجمع لك الحوسه ,,,, وخلي في كل درج في البيت علبه او صندوق شكله حلو (في المطبخ في غرفه النوم حتى عزكم الله في الحمام )

وخلاص بعد ما تنتهين ( الحمد لله على السلامه ومأجوره ان شا الله ) الله لا يهينك الكيس الي فيه الملابس و الي فيه الاوراق و المجلات و الكرتون الي جمعتي فيه المواعين و الاواني الي مو محتاجه لها ارسليها لجمعيه خيريه او مستودع او اعطيه احد محتاج له ,,,, والكيس الثالث الي فيه حوسه و قرابيع على اقرب زباله في الشارع ارميها فيه ,,,,, وخلاص البيت نظيف و مرتب و حتى تحسين انه و سيع ,, من جد مو كلام وهالعمليه ياليت تتطبق مره كل ثلاث شهور او على حسب الحاجه متى ما حسيتي ان الدواليب و الخزائن مكركبه و محتاسه قومي فيها





خلاص انتهى الموضوع ,,,, وتمنياتي لكم بيوت عامره على ذكر الله وبعيده عن الكركبه و الحوسه