النهاردة عملت لكم معجنات دايت سهلة جدا و لذيذة و قايمة علي عجينة العشر دقايق و يا رب تعجبكم
انا عاملة كمية قليلة عشاني انا بس
مقادير المرحلة الأولي:
1/4 كوب دقيق أبيض
ا ملعقة صغيرة سكر
1 ملعقة صغيرة خميرة جافة
1 ملعقة صغيرة لبن بودرة خالي الدسم
1/4 كوب ماء دافيء
نقلبهم مع بعض و هيبقي شكلهم سايل و نسيبهم 10 دقايق
مقادير المرحلة التانية
3/4 كوب دقيق أسمر
1 ملعقة صغيرة زيت زيتون
نضيف الدقيق و الزيت علي المرحلة الأولي و نعجن لغاية ما تتماسك و ممكن تدهني ايدك دقيق اسمر لو بتلزلق
ونسيبها تخمر انا سبتها حوالي ساعتين و
ده شكلها بعد التخمير
بعد كده نفرها علي سطح مرشوش بالدقيق الأسمر
و بعد كده انا قسمتها 4
و بعد كده حشيت كل واحد بجبنة رومي و بسطرمة
و عملت أشكال مختلفة
دهنت وشها بصلصة طماطم قبل ما أدخلها الفرن
و ده بعد ما خرجت
و دي لأحلي رد
بالهنا و الشفا يا رب تكون عجبتكم