معد صرت أطيق شوفتهاا بسبب حركتهاا مع ولدي!

-
مساكم الله بالخير بناات.. 🌷
هذي الله يسلمكم سالفة صارت لي من كم شهر بعد عيد الفطر تقريباً..
في يوم جاني زوجي قالي أن اختي فلانة مسوية حفلة للأطفال في بيتها عشان يوم ميلاد بنتهاا وكذا وتبي تاخذ ولدي معهم للحفلة!
رفضت أنا وقلت الولد صغير ولازم أحد يأكله ويغير له وينتبه له طول الوقت ولدي صغير عمره سنتين وكل اللي فالحفلة أعمارهم أكبر من ٤ سنوات..
قال أوك وقال لـ اخته هذا الكلام..
المهم كلمتني وقالت لي لازم يجي ولدك وانا بنفسي بنتبه له قالت حتى ماراح أخلي الخادمة تهتم فيه انا بهتم فيه بنفسي بعد اصرار منها وافقت وقلت أوك..
بيوم الحفلة زوجي كان عنده تكليف فالدوام ومايرجع البيت الا ٥ العصر اتصلت عليها وقلت ترى ابوه مايقدر يجيبه الا بعد المغرب قالت لا أنا بنفسي بجي آخذه وباليل برجعه..
قلت أوك وجت خذته على الساعة ٤ العصر وكنت مجهزة له ملابسه وحاطة له سناك وكل شيء معه بالشنطة..
الزبدة رجع زوجي من الدوام ونام بعد العشاء على طول الساعة ٩ تكلمتي اخت زوجي تقول خلي ابوه يجي ياخذه!
قلت نايم ! وانتِ قلتي بتجيبنه بنفسك قالت طيب وقفلت..
الساعة ١١ جت تخيلو فتحت الباب الا ولدي شايلته بنتها الصغيرة عمرها ٦ سنوات وتسحب شنطة ولدي وراها! 🙂
وولدي يصيح متألم ياعمري عليه وعطتني اياه وماسك مكان خفاظته حبيبي ويصييييح!!!
تخيلو بنات انها ماغيرت لـ ولدي من العصر لين الساعة ١١ !!!
المكان كان عنده ملتهب ويصب دم! تعرفون الطفل اذا طول البامبرز عليه وهو صخ وش يصير!!
هذاك اليوم جلست ابكككي مقهورة على ولدي وولدي يصيح متألم واذا هدا شوي وشلته وجت يدي على مكان البامبرز يصرخ ويبكي!! 💔
احتجت اوديه المستوصف يعطوني مراهم !

كنت بكلمها او اكلم زوجي بس سبحان الله قلت خلاص ماراح اكلمها ولا اكلم احد! بس اللي صار يكون درس لي معد أأمن عليها ابببد!
اللي صار اني غصب عني تغيرت من ناحيتهاا معد اطيق جلستها ولا شوفتهاا
قبل كم يوم كنا ناوين نروح بيت حمولتي وقالي زوجي انها موجودة عند امه وكنسلت الروحة مافيه الا هي يعني بضطر اقابلها واسولف معهاا..
وزوجي نااشب لي الحين ليش ماتبين اختي فلانة وهي طيبة وماقصرت وو..
الأمهات لو كنتي مكاني بتكون السالفة عادية بالنسبة لك او بتزعلين؟
فضفضة بس واسفة على الأطالة..