معقوله في ناس كذا للان ؟

السلام عليكم
وانا اتصحف احد مواقع التواصل الاجتماعي شدني موضوع او بالاصح موقف
في بنت اهلها ماشروا لها جوال و الجوال عند امها و ابوها ممنوع نهائي واعتقد ان كل التناقش بينهم يكون بحدود مكان الدراسه اللي قالت القصه ماوضحت هل فيه طريقة تواصل اخرى وقت هم بالبيوت المهم
صديقات البنت قطوا فلوس كل وحده مبلغ حسب مقدرتها وشروا لصديقتهم جوال عشان يصير عندها واتس وتتواصل معاهم ومواقع التواصل وتصير مثل البنات وتكون معاهم على الخط وقت ماهم يتناقشون بامور الحياه واهتمامات البنات والبنت قبلت الهديه وصار الجوال مع صديقاتها يعطونها اياه وقت مايشوفون بالجامعه واذا انتهى الدوام تاخذه وحده منهم وترده ثاني يوم للبنت وهكذا طبعا البنت معاها في البيت او قدام اهلها بالاصح جوال كشاف فقط للمكالمات الضروريه وشكله مراقب بعد وتفتيش !!


معقوله في ناس لهدرجة ! وسمعت بعد في ناس تراقب اجهزة عيالها من بعيد لبعيد عن طريق برامج وما الى ذالك ممكن اللي يراقبون الاجهزه اهون بنطري من اللي كابتين البنت لدرجة مافي جوال وومنوع تختلط طبعا خارج الجامعه او المدرسه مع صديقاتها
هذي نفس ياناس انا ماني مستوعبه منع الجوال نهائي هذا شي ضروري بالهوقت وكلن ونفسه ومراقبة الله قبل كل شي ومدارات الاهل لابنائهم ثاني شي ممكن بعضكم بيقول يمكن البنت غلطت وسحبوه نهائي بس انصدمت انه من عمرهم كذا يعني نهائي مامسكوا الجوالات واللابتوبات والتكنولوجيا بايدينهم !! يعني لهذي الدرجة مافي ثقه بتربيتهم لعيالهم وحتى لو البنت سوت غلط في طرق حل اخرى غير المنع النهائي هذا مايلجىء له الا بالشديد القوي ومع اني ما ايد مهما كان ذنب البنت بالاول والاخير العتب على اهلها سواء اساؤا التربيه او ماحتوها او سمعوا لها وراحت الدور الاحتواء وانه احد يسال عنها ويسمع لها برا المذنب الاول والاخير الاهل باي شي من وجهة نظري واتمنى تطرحون وجهات نظركم بهذا الموضوع و هل تصرف الاهالي اللي مانعين نهائي الجوالات بدون ذنب لعيالهم يعني مامسكوا عليهم شي فقط خوف ومداراة لهم وخوف من اختلاطهم بالعالم الخارجي وتفتيح عيونهم وعقولهم على امور ؟
نصيحه اخيره اي ام تقرا موضوعي ومتبعين هالاسلوب مع عيالهم بقولكم مهما شديتوا وقفلتوا كل المخارج لابد بيوم البنت بتلقى مخرج فعطوا بناتكم شوي متنفس وحريه شخصيه لا افراط ولا تفريط
منتظره ردودكم وتقبولوا مروري 🌸