معقوله ناس مايلقون ماياكلون !!! تكفون الي يبي الخير يقرا القصه .

السلام عليكم ورحمة الله وبركاته
اخواتي لن أطيل الكلام ..
حدث بالأمس أن اخبرني زوجي أن أستاذ الحلقه صديقه اتصل به
وقال: تعرف فلان ( طالب في الحلقات خلوق ومحترم يحفظ القران)
اتصلت والدته علي تقول : ابني فلان لم يأكل منذ يومين اذا كان عندكم بالحلقه أكل أعطوه !!
قلت لها ليه ما أكل ؟
اسكتت الام شوي وانحرجت ثم قالت عندنا أكل شوي عيا ياكل يقول كولوا أنتم وانا القى لي شي برا !!!
ياعمري يأثرهم على نفسه :44:
طيب تدرون وش الاكل طماااااط فقط فطورهم وغداهم وعشاهم طماط وماوده يخلصه عنهم ..
هم ولدين صغار ماتعدو 13سنه والام تحتاج عمليه والجده ..

والله اني كرهت الحياة و أوجعني قلبي معقووووله مو مصدقه وأنا مجهزه اللسته نشتري مقاضي رمضان تكفي سنه
وبروح للسوق اشتري ولا اشبع لانه مخفض ياحرام الاسعار مغريه
يالله غفلنا بهالدنيا نسينا ان ربي مارزقنا من رزقه الا ليعلم من يطيعه ومن يعصيه
ليعلم الذي لايخفاه شيء مانفقنا منه في سبيله وما انفقنا في سبيل هذه الدنيا الحقيره الزائله
نستبدل الذي هو أدنى بالذي هو خير نتستبدل وسخ الدنيا بذهب واستبرق من الجنه
نستبدل خلاقين الدنيا الي بتعفن في الدواليب محدن شافها بثياب من سندس وأستبرق !!
الي تبي الخير والاجر تتصدق عليهم هذا رمضان الله يبلغنا اياه قريب وبعده العيد خلوهم يفرحون ويحسون فيه هالمره
وجعل ربي الي ابتلاهم بالضعف والمسكنه ما يبتلينا لعل الله يحفظ نعمته علينا اذا كشفنا كربتهم ويرزقهم ويكفيهم همهم يارب ولايحتاجون لاحد .

الي تبي أعطيهم عنوانهم والي تبي تتصدق لو بالقليل جمعنا لهم مبلغ لو نسدد أجار الغرفه الي هم فيها ترسلي ع الخاص
على فكره أستاذه أرسل خواته الله يجزاهم خير يزورونهم من غير لايدري الطالب عشان لاينحرج
يقولون ثلاجتهم فااااضيه والبيت مافيه شي حتى جارهم الله يجزاه خير قبل لاينقل عطاهم مكيف واحد
والا كانوا ينامون على المروحه بهالحر :(
الله يقينا وياكم حر جهنم ومن يساعدهم يارب ..
تذكروا حديث المصطفى صلى الله عليه وسلم مانقص مال من صدقه بل تزده بل تزده


تذكير : يا ناس احمدوا ربكم واملئوا حياتكم بالحمد والشكر كثير منا يتذمر اذا ما أعجبه الأكل
كثير يتذمر انه ماسافر هالاجازه كثير يتذمر اذا ماشراء اثاث جديد مايدري انه بنعم عظيمه
يارب احفظ علينا نعمتك ويكفينا منها أعظم نعمة الاسلام ...


صلى اللهم على أشرف الخلق وسيد المرسلين وأبو المساكين محمد بن عبدلله صلى الله عليه وسلم