معقول طبيعي اللي يصير !!!!؟؟

السلام عليكم
يا حوائات
تقريبا انا اجزم ان كل وحدة فيكم عندها اخ قد طلبت طلبات من اخوها
انا تربيت في عائلة اني اطلب طلباتي من ابوي الله يخليه لي واذا كان عنده ظرف اطلب اخوي
عسى الله يحفظهم لي

بنات انا اخوي هذا اكبر مني ومتزوج وعنده بنت صغيرة مرة
وزوجته كمان اكبر مني
اللي اكتشفته ان زوجة اخوي اللي احبها واحترمها ومابيني وبينها اي موقف
تكرهني وما تطيقني وتسببلي مشاكل
بنات انا صرت اشوف كيف البنات عايشين صديقاتي واللي في التيك توك وصار نفسي في كم شغلة بسيطة .
صرت اطلب اخوي كل كم يوم يوديني مول ولا كافيه
واحيانا حديقة
هذا حدي يابنات
وهو يلبي طلبي الله يخليه لي
بنات انا احيانا اطلب من ابوي واحيانا من اخوي
وصدقوني ما اخذ كثير من اخوي بحكم انه متزوج وعنده بنت الله يحفظها
أنا اخذ المبلغ الكبير من ابوي
واخذ مبلغ قليل او متوسط من اخوي
زي لما نروح المول اقوله يعطيني مبلغ بسيط اقضي فيه كم قطعة ملابس او ميكب
واذا اخذت منه فلوس فستان لمناسبة اجلس طول الشهر ما اطلبه فلوس
ما اكلف عليه انا يابنات صدقوني
ومتاكدة ان هذا المبلغ ان شاء الله ما يضره ولا رح يفرق عنده مقارنة براتبه ومسؤولياته
اللي صار ان زوجة اخوي صارت بعد كل ما اطلب اخوي فلوس تدخل على في الواتس وتجلس تتحسب وتهاوش وانا اصير مصدومة وما اجادلها ولا اقولها شيء من التحسب اللي يجيني
بس ارد عليها ب الله يخلي اخوي لي ويحفظه
تقول اني اصرف كل فلوسه وما يبقى لها ولبنتها شيء
مع اني اعرف انه مخصص لها مصروف شهري لها ولبنتها تاخذه كل شهر

اخر كم شهر الحمدلله انخطبت وملكت وبديت اجهز لزواجي والدبش وتعرفون الحوسة يابنات والتوتر
الله يحفظ اخوي
كل ما احتجت اروح مكان ولا اقضي ياخذني هو ويرجعني
واحيانا ياخذني كافيه او مطعم بعد ما اقضي ويرفض اني ادفع او اعزمه نهائيا
بنات كل ما ارجع من طلعه واكون متحمسه ابغا اشوف ايش قضيت واقيس وايش بقالي ما كملته لسه
على طول تكلمني في الواتس
صايرة تسب وتتحسب وتدعي
اني ماخذه كل وقته ومجرجرته معي
طيب بنات هذا اخوي انا اذا ما وداني وجابني مين يوديني غيره ؟ اروح مع السواق يعني ولا اوبر لحالي
ما عمري سويتها
ولا اجرجر ابوي معي وهو يا عمري ما يتحمل كبير
ما فهمت ايش الغلط اللي انا سويته وليش قاعده تدعي علي وتسبني

وتقولي اني مخلصة فلوس اخوي مطاعم وطلعات مو صار عندك مهر ليش ما تصرفين منه ولا بس مخبيته
وانا يابنات كل قطعة اشتريها من مهري
وما اخذ فلوس من اخوي الا على قهوة ولا مطعم يعني شيء ما يجي قدام مشترياتي اللي من مهري
واساسا اخوي يرفض اني احاسب

الموقف اللي خلاني في حيرة من امري
كنت طالعة أنا واخوي اتقضى لدبشي
مرني اخوي بسيارة خوية كان فيها عطل
وداني المول بعدين ودا السيارة للصناعية ولما خلصنا رجعنا في اوبر

انا ما ادري ايش اقول
ياليتني ما رحت عشان ما تصير هذي الجلطة
والا الحمدلله اني رحت مع اخوي عشان اكتشف حقيقتها واحذر منها
اول ما رجعنا مسكت اخوي وقعدت تحرشه علي
الفت قصة اني طلعت مع ولد استغفر الله
يعني حتى مو خطيبي لان السيارة كانت تختلف
وتقول مستقبلني باغاني وانا مبسوطة واتمايل
والله اعلم ومدري ايش
وانا بنات كلها ثواني اللي صعدت فيها السيارة سوتني ارقص واتمايل
اخوي خلاها تكمل كلامها
سالها عن مواصفات السيارة
بعدين قال لها ترا اللي في السيارة هذا انا وهذي سيارة خويي كنت سايقها واختي اشرف منك
وطلقها
دخل علينا اخوي منهار وما قال الا لابوي وامي
بعدين انا امي قالتلي اللي صار

المشكلة كبرت مرة يابنات
ابوي قاله لا ترجعها
وامي تترجاه يرجعها ويستر عليها
وهو قالي اذا انتي سامحتيها انا ارجعها

يابنات انا في حيرة من امري
ما ادري اخليه يرجعها ويستر عليها واكسب الاجر
ولا اخاف اذا رجعتها تنتقم مني وتكيد لي شيء اكبر
وانا خايفة يابنات
هل يصيبني شيء من دعاويها ؟
مع اني واثقة من نفسي مو ظالمتها