بسم الله الرحمن الرحيم
وعليه توكلت وبه وحده استعين
تعالي قلبي بسم الله عليك احضنك لصدري وانا اختك ويدي على ظهرك واقبل جبينك واهنيك ربي اختارك بيعطيك
اي نعم بيعطيك .. ماتخلو من هالامور السالفه : اما انه بيكفر لك ذنوب ، واما انه يبغى يرفع درجاتك ، والا انه ابتلاك ليخفف عنك بالاخره
لو تمعنتي قلبي كلها خير وطيبه ربي لك الحمد والشكر على ما انعمت وقدرت رضيت ربي رضيت
من رضي فله الرضى ومن سخط فله السخط
ايه ياقلبي اجلسي جنبي واسمعي زييين ترانا ربنا يحبنا ولحبه لنا ابتلانا وانا اختك
اسمعي يوم انه ابونا آدم وامنا حوا عصو ربنا بالجنه وخرجهم منها ربي اوحى لهم ايش يقولو ؟؟
قالا ربنا ظلمنا انفسنا وان لم تغفر لنا وترحمنا لنكونن من الخاسرين
ايه وانا اختك استغفري واقريها من قلب وكرريها واعلني التوبه عن كل ذنب والله ثم والله تجيك الارض وماعليها ويسخر لك الله كل عاصي وشديد وجبار وصعب ... توكلي على الله واعرفي عن يقين انك منصوره باذن الله ، ماتدرين انه تعالى حرم الظلم على نفسه وعلى عباده >> ياشيخه والله تكفي انا نتيقن ان الظلم زايل زايل ..
السالفه تبي وقت وانا اختك تذكري دووووم كل ماطال الوقت هناك اجر يزيد والا ذنوب تقل .. وردي على نفسك ايه ماعليه الحمد لله والشكر كل شي لحكمه
وخلاص ارمي كل حمولك على ربك
تدري وش سويت ؟؟ عن نفسي : بريت والدي الله يحفظهم ويرزقني رضاهم ، اشغلت نفسي بأي شي وبكل شي طيب وسويت زي سيدنا موسى عليه السلام لما سقى للبنتين بعدها استوى الى الظل وقال رب اني لما انزلت الي من خير فقير ... سويت نفسه اسوي الخير واروح اجلس لحالي بانكسار وتعب وارهاق واقولها بخشوع ويقين بالفرج ...
ليلي ونهاري اكرر ( اللهم اني استودعك اولادي ومالي وحقي فردهم الي يارحمن عاجلا ياكريم يامن قلت ادعوني استجب لكم ها أنا ادعوك وانا على يقين بإجابتك ) لا اله الا انت ولا حول ولا قوة الا بك عليك توكلت واليك أنبت ..
شفتي قصة سيدنا يعقوب عليه السلام ... تعالي ياعمري تعالي شوفي واتمعني :
لما قال يعقوب ( واخاف ان يأكله الذئب ) >> اختفى يوسف واصيب بالعمى
وحين قال : وافوض امري الى الله ) >>عاد بنيامين ويوسف وعيناه
كرري معي وانا اختك ( وافوض امري الى الله )
الله يفك عوقنا ويلم شملنا بأولادنا وينصرنا على من ظلمهم وظلمنا
ياعمري ربي يحقق لك كل اللي تتمنيه والله يكون بعونك وينصرك ويجعل اولادك تحت جناحك وعلى صدرك ...
الصبر الصبر صدقيني بيرجعون والله بيرجعون ربي يبغى يكفر ذنوبنا ويرفع درجاتنا الف حمد له وشكر على كل شي ..
الحمد لله حمدا كثيرا طيبا مباركا فيه كما ينبغي لجلال وجهه وعظيم سلطانه والشكر له على ما اعطى وقدر
رضيت ربي رضيت
رضاك وعفوك ارجو
لا اله الا انت
ودعتكم الرحمن اللي عينه ماتنام انتم واولادكم
اللهم اني استودعك اياهم اللهم احفظهم وابناءهم اجمعهم وحنن عليهم قلوب عبادك واماءك اللهم انهن ضعيفات فقوهن واشدد ازرهن واقسم لهن ولأولادهن الخير واجمعهن بهم وارزقهن برهم وصلاحهم .. اللهم لاتبك أما على ضناها ولا تبك طفلا على أمه يا ارحم الراحمين
وصل اللهم وسلم على حبيبي محمد وعلى آله وصحبه وسلم
راعية الاذكار
لازلت احتاج دعواتكم بعد رحمة ربي
لاتنسوني ولن انسكم من الدعاء ماحييت
في أمان الله
يلزم عليك تسجيل الدخول أولًا لكتابة تعليق.
البشرى 1096
•
عسى الله يفرج همك في اسرع وقت
الله يفرج همك وكل مهموم يارب العالمين
جزاك الله كل خير ,,
والله يحفظ لك اولادك ويردهم لك .. وينصرك على من ظلمك ..
جزاك الله كل خير ,,
والله يحفظ لك اولادك ويردهم لك .. وينصرك على من ظلمك ..
الصفحة الأخيرة