اول شي ابي اقول مبرووووك للحوامل واللي ولدو واللي ماحملو اقولهم خلو ايمانكم بالله قوي
وكثروا من الاستغفار والدعاء وصلاة الليل والله يرزقكم جميعا بالذرية الصالحة
حبيت يكون موضوعي هالمرة غير
يعني ابي يكون كله معلومات تهم كل وحده فينا سواء قبل الحمل او بعده
ولي طلب بسيط بليز مابي اي وحده ترد على الموضوع برد مثل:- مشكورة - يعطيج العافية - يسلمووو
وغيرها من كلمات الشكر
اللي تبي تشكرني تقدر بطريقة وحده وهي انها تدعيلي بالولد الصالح وهاي اكبر شكر لي
ابي رد كل وحدة منكم يشمل معلومة او نصيحة فادتكم وغيره لا لا لا لان بكلمة يعطيج العافية او شكرا راح تزيدون عدد الصفحات وبتصير المعلومات المفيدة في صفحات بعيدة واللي بتقرا بتملل وهي تقرا مثل هالردود اللي ماتفيدها بشي..
اتمنى محد يزعل من كلامي
طبعا ماشالله وايد حوامل في هالقسم واغلبيتهم اول حمل لهم يعني مالهم خبرة في شي ويوم عن يوم ألاحظ ان الأسئلة في قسم الاستفسارات تزيد و****لله هالموضوع يفيدهم
كل وحدة ادش تكتب معلومة قرتها في منتدى او سمعتها من دكتورة سواء قبل الحمل ولا وقت الحمل ولا بعده او اي شي يفيد البنات بصفة عامة او نصيحة استفادت منها والأفضل انه تكون تجربة شخصية
مانبي اي وحدة تنسخ موضوع معين وتكتبه هني لان ماشالله هالقسم مليان مواضيع منقولة نبي شي جديد ومب المهم انه يكون منقول المهم يكون مكتوب بإسلوبج
ببتدي انا
قبل الحمل المعلومة اللي استفدت منها واللي بعد الله ساعدتني على الحمل انه عقب الجماع ارفع ريولي فوق لمدة 10 دقايق واحط مخدة تحتي
والحمدلله في نفس الشهر حملت..واللي سمعته ان عصير الأنناس والمريمية وملعقة عسل غذاء ملكات النحل مع حبوب اللقاح (اختاري واحد منهم) وقت الدورة وان شاء الله يزيد حجم البويضة
وقت الحمل للتخفيف من اللوعه كنت امص ليمونة او ثلجة والحمدلله اللوعة خفت
وبالنسبة للحرقة اللي تصيب الحوامل كثري من شرب اللبن
وبعد الولادة وبالذات لخيوط الولادة اللي تحرق كنت احط كركم مع زيت الزيتون على مكان الخياطة
وان شـاء الله اذا تذكرت شي بعد بكتبه
واللي عندها اي استفسار اطرشه على الخاص مب هني
هالموضوع لجمع اكبر عدد من المعلومات اللي عندكم
واللي تبي تنقل فكرة الموضوع لمنتدى ثاني تذكر اسمي ومنتدى عالم حواء
لاتبخلون علي وعلى خواتكم بالمعلومات اللي عندكم
ولكم وان شـاء الله الأجر والثواب
أرجع واقول لحد يرد برد سلبي مثل مشكورة أو أو أو
ردي بمعلومة تفيدنا وإن شاء لله تكون في ميزان حسناتج