بسم الله الرحمن الرحيم
السلام عليكم ورحمة الله وبركاته
حيّا الله رشيقات كل وحدة باسمها الجميل ..
بعطيكم معلومات أو قواعد نفسية مهمة وسهلة وبسيطة تساعدك بعملية تخفيف حمل جسدك المثقل !
طبعاً أنا طبقتها نسبياً ولما شفت بوادر نجاحها جيتكم هنا طيااااارة أخبركم فيها ..
وللحين ما شفت نتائجها صراحةً .. لكن شفت تأثيرها الايجابي على نفسي ورغبتي بإكمال مشوار الرشاقة على العكس من محاولاتي السابقة ..
طبعاً نظامي الحالي .. تخفيف + رياضة مشي وأوربت تراك + ترك النشويات والحلويات ماعدا يومي الاربعا والخميس افتح لنفسي المجال وآكل فيهم الي أبي وأرجع يوم الجمعة لنظامي المعهود !!
بالعادة يوم الجمعة أكمل تخبيصي وآكل بقايا حلوياتي وشيبساتي الي ما آكلتها باليومين المفتوحة ..
ودائماً أكون في هذا اليوم حرب مع نفسي اصمد وأبدأ المشوار والا أخربها وارجع التزم السبت ودائماً يكون النصيب من هوى نفسي ويكون يوم الجمعة تخبيص .. !
لكن بهالمعلومتين الحمد لله قدرت أقاوم وأصمد وأسكت الصوت الي يناديني من الداخل ..
رغم أن المغريات أمامي بالثلاجة .. لكن الحمد لله صمدت وراح أكمل باقي الاسبوع ..
طولت عليكم بقصة حياتي هههههه
بعطيكم القاعدة الأولى /
أهدافك الي تبغين توصلين لها من خلال مشوار الرشاقة لاتحطيها بالخمسة كيلو والسبعة والعشرة !
حطيها إن شالله كيلو كيلو أو كيلوين أو ثلاثة براحتك ، عشان تحسي بالإنتاج وبطعم النجاح !
وبسهولة وسرعة الوصول للنتيجة .. جربوها وادعولي !
طبعاً .. هذه المعلومة توصلت لها من خلال تجربتي ورؤيتي لنتائج مشواري .. لكن وللأمانة بعد ماقريت واطلعت وجدت أنه هذه القاعدة معروفة ومطبقة في أمور كثيرة وماادري وش اسمها علمياً ..
لكن قرأتها في كتاب د: خالد المنيف " افتح النافذة ثمة ضوء "
وكان تكلم عن هالقاعدة وسماها " قضمة الفيل "
أنت لو بتأكلين مثل كمية أكل الفيل مرة وحدة ماقدرتِ ..
لكن قضمة .. مع قضمة .. مع قضمة موزعة على اليوم بتقدرين
تأكلين الكمية .. ونفس الشي انتاجيتك في اهدافك اتبعي معها هذه القاعدة أي هدف بحياتك أياً كان .. اتبعي معاه قاعدة قضم الفيل ..
وشوفي السهولة والسرعة بإنجاز وتحقيق اهدافك ..
مثلاً .. لو وزعت غسيلك على أيام الاسبوع
يوم للملابس البيضا ويوم للملونة ويوم لملابس الأطفال المتسخة جداً بتسهل عليك العملية ..
أما تجي يوم في نهاية الاسبوع وتلاقي جبل من كومة الملابس وتبغي تنجزيها بنفس اليوم صعب عليك جداً ..
راح تغسليها .. لكن النتيجة = ارهاق لجسدك ونفسيتك + عمل غير متقن + بالنهاية شعور من يتخلص من واجب وليس شعور بالسعادة والانجاز والحيوية
وخذوا مثال في تخفيف الوزن /
منار وزنها 76 كيلو
وتبي توصل للوزن المثالي 55 كيلو
تقريباً 21 كيلو تبي تنحفها ..
احضرت ورقة وحددت المدة الزمنية شهر
وقسمت أهدافها :
الهدف 1 : 70
الهدف 2 : 65
الهدف 3 : 60
الهدف 4 : 55
يعني تقريبا هي تبي تنحف في كل اسبوع تقريبا 5 كيلو
صعب جدا عليها ، وراح تحبط كلما زاد وزنها والا خبصت بأكلها ،
لكن لو زادت المدة الزمنية ، وقربت بين اهدافها أحست بهولة المشوار والرغبة في المواصلة وكلما انجزت هدف سعت بتحقيق الي بعده رغم التخبيص ورغم اهمال بعض المهمات مثل الرياضة والمشي ..
راح تكون لديها مرونة وتكيف مع النظام رغم المغربيات ، ورغبة في داخلها للاستمرار والصمود والارادة الفولاذية العجيبة راح تمتلكها ..
نعدل في أهداف منار /
المدة الزمنية / 3 أو 4 أشهر
وزنها 76
الهدف 1 : 74
الهدف 2 : 72
الهدف 3 : 70
الهدف 4 : 69
الهدف 5 : 67
الهدف 6 : 65
وهكذا حتى تصل ل هدفها ، وتنظر بهذه الفترة لهدفها القريب كأنه هو هدفها الاساسي بدون النظر للهدف البعيد
راح توصل لهدفها بسرعة وسهولة وانجاز وسعادة وراحة نفسية بإذن الله تعالى والمهم التوكل على الله والاستعانة به ومن يتوكل على الله ويطلب عونه فلن يخيب بحول الله قوته ..
القاعدة الثانية .. مهمممممممة جداً جداً جداً
أتمنى تقرأونها كم مرة وتفهمونها وتستوعبونها وتطبقونها بكل شي تتمنون تحقيقه وبتنبهرون بالنتائج
القاعدة تقول /
الوقت والطاقة تتناسب طردياً مع مقدار التركيز والانتباه
كيف ..؟!
وايش معنى هذا الكلام ..؟!!
أنا أفهمك بإذن الله .. وربي يفتح علي واقدر افهمكم وافيدكم ..
مثلاً .. أنتِ دائماً تقولين أنا مشغولة وأنا تعبانة ومافيني حيل أطلع من البيت ولا أسوي أي شيء
ولا أقدر اتفرغ للطاعة والعبادة وحتى قراة القرآن ما ألقى لها وقت ..
فجأة .. الله يبعد عنا وعنك الشر ..
تعب طفلك الصغير وتنوم بالمستشفى 7 أيام ..
ماقدرت تتخلين عنه ونمتي معاه هالسبع أيام وختمتي القرآن وانت تنفثي على جسمه مرتين وصرت تدعين له وتقومين الثلث الأخير كامل صلاة واستغفار ودعاء ..
من وين لك هالوقت وأنت كنت مشغولة !!
ومن وين لك كل هالطاقة وختمت القرآن ب 7 أيام ، وقمت الثلث الأخير كله ..
وأنت كنت تعبانة !!
لأنك كنت منتبهة على ولدك بسسسس ، و كنت مركزة عليه ومهتمة به فقط !
لقيتي الوقت ، وحصلتي الطاقة عشان يشفى طفلك !
نفس الشي أيام الامتحانات ..
كنا مانقدر نقرأ صفحتين ع بعضها والا نكتب بحث صغير من 3 صفحات وبيوم ليلة نخلص منهج كامل ونحل تمارينه كلها ، وب أسبوعين نخلص 10 مناهج !!
من وين لنا هالطاقة وهالوقت الخرافي !
لأننا ركزنا وانتبهنا ع الرغبة في النجاح !
لاقينا الوقت والطاقة لدرجة واصلنا الليل بالنهار !
وش رأيكم صح هالكلام والا مو صح ؟!!
نفس الشي ..
نلاقي الوقت والطاقة كلها للسوالف والمحادثات والواتس آب وغيرها وغيرها ..
لكن .. ما نلاقي وقت للتنظيف والشغل ..
بس يرن التلفون بيجي ضيف ننسا كل شي وننجز أعمال كنا نسويها بشهر بظرف 3 ساعات ..
لأننا ركزنا وانتبهنا فقط !!
نقدر ننزل هالكلام ع رغبتنا جميعاً بالرشاقة !
الي تقول مااقدر امتنع عن الحلويات والاكل الدسم .. اتعب وتتعب نفسيتي !
والا ما ألاقي وقت أمشي فيه !
بس تنخطب والا يكون عندهم حفلة زواج بعد شهرين تلاقين نصف جسمها ذاب !
من وين لقت الوقت والطاقة عشان تنحف !
لأنها ركزت انتباهها كله ع الرشاقة وع الفستان الي تبغيه يكون جميل على جسدها !
قدرت تنحف وتنجز وتمشي وتتمرن بوقت قياسي ..
هذي هي المعلومتين استفدت منها وربي في أمور كثيرة بحياتي مو بس في الرشاقة ..
وماحبيت ابخل بها عليكم ..
أتمنى تستفيدون منها وأشوفكم رشيقات ومنجزات وتتغير حياتكم مليون ب المية !
وتكونون أسعد الناس وأرضاهم عن أنفسهم وعن حياتهم ..
والأهم من هذا أتمنى لكم حياة سعيدة وراقية بظل قربكم من الله ورضاه عنكم ومحبته لكم ..
واسأله كما جمعنا بهم واحد هم الرشاقة أن يملأ قلوبنا بهم الآخرة ورضاه وجنته ..
ولاتنسوني بدعوة .. كتبت كلماتي والله ووجهي ومنتفخ من الحساسية ومتضايقة مررة من تأثير السحر والحسد ،
الله يكفيكم من شر كل ذي شر من شياطين الانس والجن يااااربّ ..
نور , @nor_158
عضوة نشيطة
يلزم عليك تسجيل الدخول أولًا لكتابة تعليق.
اسأل الله رب العرش العظيم ان يشفيك شفاءً لايغادر سقماً.. كلامك درر ...اسأل الله رب العرش العظيم ان يشفيك شفاءً لايغادر سقماً.. كلامك درر ...
الصفحة الأخيرة
كلامك درر ...